Yobo 3:1-26
3 Nsima na yango nde Yobo abandaki koloba mpe kolakela mabe mokolo oyo abotamaki.+
2 Alobaki boye:
3 “Mokolo oyo nabotamaki elimwa,+Ná butu oyo moto moko alobaki ete: ‘Mobali moko asalemi na kati ya libumu!’
4 Mokolo yango ekóma molili.
Nzambe na likoló atyela yango likebi te;Pole ya moi engɛngɛla yango te.
5 Molili makasi* esɛnga yango.
Lipata ya mbula efandela yango.
Biloko nyonso oyo eyeisaka molili na moi elɛngisa yango na nsɔmɔ.
6 Mpo na butu yango, molili ekanga yango;+Esepela te na mikolo ya mbula mobimba,Ekɔta te na motángo ya basanza.
7 Ɛɛ! Butu yango ebotaka te;Koganga ya esengo eyokana na yango te.
8 Bato oyo balakelaka mokolo mabe, bálakela yango mabe,Baoyo bazali na likoki ya kolamwisa Leviatana.*+
9 Minzoto na yango ya ntɔngɔntɔngɔ eyinda;Ezela pole kasi pole ezala ata moke te;Mpe emona kongɛnga ya kotana ya ntɔngɔ te.
10 Mpo ekangaki baporte ya libumu ya mama na ngai te;+Ebombelaki miso na ngai mpasi te.
11 Mpo na nini nakufaki te na ntango ya kobotama?
Mpo na nini nakufaki te ntango kaka nabimaki na libumu?+
12 Mpo na nini mabɔlɔngɔ eyambaki ngai,Mpe mpo na nini mabɛlɛ emɛlisaki ngai?
13 Mbɛlɛ nalalá na ngai na kimya;+Mbɛlɛ nalalá mpɔngi mpe napemá na ngai na kimya+
14 Elongo na bakonzi ya mabele mpe bapesi-toli na bango,Baoyo bamitongelaki bisika oyo lelo etikalá mpamba,
15 To elongo na bankumu oyo bazalaki na wolo,Baoyo bandako na bango etondá na palata.
16 To, mpo na nini nazalaki te lokola zemi oyo esopani,Lokola bana oyo batikalá komona pole te.
17 Kuna, ata bato mabe batiki mobulu,Kuna, bato oyo balɛmbi bazali kopema.+
18 Kuna, bato ya bolɔkɔ, bango nyonso elongo bazali na kimya;Bazali koyoka te mongongo ya moto azali kotinda bango na makasi ete básala mosala.
19 Kuna, moto moke ná moto monene bazali ndenge moko,+Mpe moombo azwi bonsomi, alongwe na mabɔkɔ ya nkolo na ye.
20 Mpo na nini Nzambe apesaka pole na moto oyo azali komona mpasi,Mpe bomoi na baoyo bazali konyokwama mingi mpenza?*+
21 Mpo na nini bazali kozela liwa, kasi ezali koya te?+
Bazali kotimola mpo na koluka yango koleka biloko ya motuya oyo ebombani,
22 Baoyo bazali kosepela makasi mpenza,Baoyo bazali na esengo ntango bamoni nkunda.
23 Mpo na nini azali kopesa pole na mobali oyo abungi nzela na ye,Oyo Nzambe akangeli ye na lopango?+
24 Mawa na ngai ekómi lokola bilei na ngai,+Mpe kolela na ngai+ na mongongo makasi* ezali kosopana lokola mai.
25 Mpo eloko oyo nazalaki koyokela nsɔmɔ yango nde ekómeli ngai,Mpe likambo oyo nabangaki ekweli ngai.
26 Natungisami, nazali na kimya te, napemi te,Kasi mpasi ezali kaka kokómela ngai.”
Maloba na nse
^ To, “Molili mpe elili ya liwa.”
^ Nkombo yango ekoki komonisa ngando to nyama mosusu ya nguya mpe ya monene oyo ezalaka na mai.
^ To, “baoyo molimo ekómi bololo.”
^ To, “kokimela na ngai.”
