Yobo 11:1-20
11 Zofare+ Monaamate ayanolaki ete:
2 “Maloba oyo nyonso ekozanga nde eyano,To koloba ebele ekopesa nde moto elonga?*
3 Bilobaloba na yo ekokangisa nde bato monɔkɔ?
Moto moko te akopamela yo mpo na maloba na yo ya kotyola?+
4 Mpo olobi: ‘Liteya na ngai ezali pɛto,+Mpe nazali pɛto na miso na yo.’+
5 Kasi soki Nzambe alobakaMpe afungolelaka yo mbɛbu na ye!+
6 Mbɛlɛ amonisi yo basekele ya bwanya,Mpo bwanya ezali na makambo mingi ya koyekola.
Mpe okoyeba ete Nzambe asalaka ete bábosana mabunga na yo mosusu.
7 Okoki nde koyeba makambo mozindo ya NzambeTo koyeba eloko nyonso etali* Mozwi-ya-Nguya-Nyonso?
8 Etombwani mosika koleka likoló. Eloko nini yo okoki kosala?
Ezali mozindo koleka Nkunda.* Eloko nini yo okoki koyeba?
9 Ezali molai koleka mabeleMpe monene koleka mbu.
10 Soki Nzambe azali koleka, akangi moto mpe amemi ye na tribinale,Nani akopekisa ye?
11 Mpo ayebi ntango bato basali makambo na bokosi.
Akotya likebi te ntango amoni likambo ya mabe?
12 Kasi bolole akokanga ntinaKaka soki mpunda ya zamba eboti moto.*
13 Kaka soki obongisi motema na yoMpe osemboleli ye mabɔkɔ na yo.
14 Soki lobɔkɔ na yo ezali kosala mabe, bwaká mabe yango mosika,Mpe kotika te ete kozanga bosembo efanda na bahema na yo.
15 Mpo ndenge wana nde okoki kotombola elongi na yo kozanga mbeba;Mpe okoki kopikama makasi, kozanga kobanga.
16 Mpo okobosana mpasi na yo;Okobosana yango lokola mai oyo eleki.
17 Bomoi na yo ekongɛnga makasi koleka moi ya midi;Ata molili na yango ekozala lokola ntɔngɔ.
18 Okotya mpenza motema mpo elikya ezali,Okotala epai na epai mpe okolala na kimya.
19 Okolala mpe moto ata moko te akobangisa yo.Mpe bato ebele bakoluka ete ondima bango.
20 Kasi miso ya bato mabe ekolɛmba;Mpe bakozwa esika ya kokima te,Mpe elikya na bango ekozala kaka liwa.”+
Maloba na nse
^ To, “moto oyo azali komikumisa akozala nde na elonga?”
^ To, “koyeba ndelo ya bonene ya.”
^ To, “Sheole,” elingi koloba, nkunda ya bato nyonso. Talá Ndimbola ya maloba.
^ To, “soki mpunda ya zamba abotami moto.”
