Yirimia 8:1-22
8 Yehova alobi boye: “Na ntango yango bato bakobimisa na malita mikuwa ya bakonzi ya Yuda, ya bankumu na yango, ya banganga-nzambe, ya basakoli ná mikuwa ya bato oyo bafandi na Yerusaleme.
2 Bakotanda yango liboso ya moi, ya sanza mpe ya limpinga mobimba ya likoló oyo balingaki, oyo basalelaki, oyo balandaki, oyo balukaki mpe oyo bagumbamelaki.+ Ekosangisama esika moko te, mpe ekokundama te. Ekokóma lokola nyɛi na etando ya mabele.”+
3 “Baoyo bakotikala na libota oyo ya mabe na bisika nyonso oyo nakopalanganisa bango, bakopona liwa na esika ya kopona bomoi,” Yehova ya mampinga alobi bongo.
4 “Mpe osengeli koloba na bango boye: ‘Talá oyo Yehova alobi:
“Bakokwea mpe bakotɛlɛma lisusu te?
Soki moko azongi, mosusu akozonga mpe te?
5 Mpo na nini bato oyo, bafandi ya Yerusaleme, bazali kokoba kozanga bosembo epai na ngai?
Bazali kaka kosala makambo na bokosi;Mpe baboyi kobongwana.+
6 Natyaki likebi mpe nazalaki kaka koyoka, kasi balobaki likambo moko te ya solo.
Moto moko te abongolaki motema na mabe na ye to amitunaki: ‘Nasali nini?’+
Moto na moto azali kokoba kosala makambo ndenge bato nyonso basalaka, lokola mpunda oyo ezali kopumbuka mpo na kokɔta na etumba.
7 Ata nkɔngi na likoló eyebaka bileko* na yango;Epopo* ná ndɛkɛ babengi martinɛ mpe ndɛkɛ babengi bulubulu ezongaka na ntango oyo esengeli kozonga.
Kasi bato na ngai bayebi te ekateli ya Yehova.”’+
8 ‘Ndenge nini bokoki koloba: “Tozali na bwanya, mpe tozali na mobeko* ya Yehova”?
Ya solo mpenza, ekomeli ya lokuta+ ya bakomeli* esalelami mpo na kokoma makambo ya lokuta.
9 Bato ya bwanya bayokisami nsɔni.+
Bakómi na nsɔmɔ mpe bakokangama.
Talá! Babwaki liloba ya Yehova,Mpe bwanya nini bazali na yango?
10 Na yango, nakopesa basi na bango epai ya mibali mosusu,Bilanga na bango epai ya bankolo mosusu;+Mpo banda na oyo aleki moke tii na oyo aleki monene, mokomoko azali kozwa litomba na ndenge ya mabe;+Banda na mosakoli tii na nganga-nzambe, mokomoko na bango azali kobuba.+
11 Bazali komeka kobikisa bampota* ya mwana mwasi ya bato na ngai likolólikoló, na ndenge bazali koloba na bango:“Kimya ezali! Kimya ezali!”
Nzokande kimya ezali te.+
12 Bayokaki nde nsɔni mpo basalaki likambo moko oyo eyinamá?
Bazali koyoka nsɔni ata moke te!
Bayebi ata te ndenge bayokaka nsɔni!+
Yango wana bakokwea na kati ya bato oyo bazali kokwea.
Ntango nakopesa bango etumbu, bakobɛta libaku,’+ Yehova alobi bongo.
13 ‘Ntango nakoyanganisa bango, nakosilisa bango,’ Yehova alobi bongo.
‘Na nzete ya vinyo, mbuma ekozala te, na nzete ya figi, figi ekozala te, mpe nkasa ekokauka.
Mpe bakobungisa biloko oyo napesaki bango.’”
14 “Mpo na nini tofandi awa?
Tóyangana esika moko, tókɔta na bingumba oyo ebatelami makasi,+ mpe tókufa kuna.
Mpo Yehova Nzambe na biso alingi kosilisa biso,Mpe apesi biso mai oyo ezali na pwazɔ mpo tómɛla,+Mpamba te tosaleli Yehova lisumu.
15 Tozalaki kozela kimya, kasi eloko moko te ya malamu eyaki,Tozalaki kozela ntango ya kobika, kasi nsɔmɔ nde ezali!+
16 Longwa na Dani, makɛlɛlɛ ya bampunda ya banguna ezali koyokana.
Mpo na makɛlɛlɛ ya koganga ya bampunda na ye,Mokili mobimba ezali koningana.
Banguna bakɔti mpe babebisi mokili ná nyonso oyo ezali na kati,Engumba ná bafandi na yango.”
17 “Mpo talá! nazali kotinda banyoka kati na bino,Banyoka ya ngɛngɛ, oyo ekoki kolengolama te,Mpe ekoswa bino mpenza,” Yehova alobi bongo.
18 Mawa na ngai ezali na nkisi te;Motema na ngai ezali kobɛla.
19 Uta na mosika mongongo ya kolela mpo na kosɛnga lisalisi ezali koyokanaEzali mongongo ya mwana mwasi ya bato na ngai:
“Yehova azali na Siona te?
To mokonzi ya Siona azali kati na yango te?”
“Mpo na nini basilikisi ngai na bikeko na bango,*Na banzambe na bango ya mpambampamba ya bapaya?”
20 “Ntango ya kobuka mbuma eleki, eleko ya molunge esili,Kasi biso, tobikisami te!”
21 Nayoki mpasi makasi mpo na bampota ya mwana mwasi ya bato na ngai;+Nayoki mawa.
Nsɔmɔ ekangi ngai.
22 Balsame* ezali na Gileade te?+
To moto oyo abikisaka* azali kuna te?+
Mpo na nini mwana mwasi ya bato na ngai azali kobika te?+
Maloba na nse
^ To, “bantango oyo etyamá.”
^ Lolenge moko ya ebenga ya zamba oyo ezalaka moke.
^ To, “mateya.”
^ To, “basɛkrɛtɛrɛ.”
^ To, “kobukana.”
^ To, “bikeko na bango oyo eyemami.”
^ To, “pomade oyo ekitisaka motema.”
^ To, “monganga.”
