Yirimia 11:1-23
11 Talá maloba oyo Yehova alobaki na Yirimia:
2 “Bóyoka maloba ya kondimana oyo!
“Lobá* yango epai ya bato ya Yuda mpe epai ya bafandi ya Yerusaleme.
3 Yebisá bango boye: ‘Talá oyo Yehova Nzambe ya Yisraele alobi: “Alakelama mabe moto oyo azali kotosa te maloba ya kondimana oyo,+
4 oyo napesaki bankɔkɔ na bino mitindo na mokolo oyo nabimisaki bango na mokili ya Ezipito,+ na ndako ya mɔtɔ makasi ya konyangwisa bibende,+ nalobaki na bango ete: ‘Bótosa mongongo na ngai, mpe bósala makambo nyonso oyo napesi bino mitindo; bokokóma bato na ngai mpe ngai nakozala Nzambe na bino,+
5 mpo nakokisa ndai oyo nalapelaki bankɔkɔ na bino, ya kopesa bango mokili oyo etondi na miliki mpe na mafuta ya nzoi,+ lokola na mokolo ya lelo.’”’”
Mpe nayanolaki ete: “Amen,* Ee Yehova.”
6 Yehova alobaki na ngai lisusu ete: “Sakolá maloba oyo nyonso na bingumba ya Yuda mpe na babalabala ya Yerusaleme ete: ‘Bóyoka maloba ya kondimana oyo, mpe bósalela yango.
7 Mpo nakebisaki polelepolele bankɔkɔ na bino na mokolo oyo nalongolaki bango na mokili ya Ezipito tii na mokolo ya lelo, nakebisaki bango mbala na mbala* ete: “Bótosa mongongo na ngai.”+
8 Kasi bayokaki te mpe batyaki likebi te, kutu mokomoko na bango alandaki na motó makasi motema mabe na ye moko;+ napesaki bango etumbu na kolanda makambo oyo ekomami na kondimana yango, napesaki bango mitindo bátosa yango, kasi baboyaki kosalela yango.’”
9 Bongo Yehova alobaki na ngai ete: “Bato ya Yuda mpe bafandi ya Yerusaleme basali likita mpo na kotombokela ngai.
10 Bazongeli mabunga ya bankɔkɔ na bango, baoyo baboyaki kotosa maloba na ngai,+ bango mpe balandaki banzambe mosusu mpe basalelaki bango.+ Bato ya libota ya Yisraele mpe ya Yuda babuki kondimana na ngai oyo nasalaki ná bankɔkɔ na bango.+
11 Na yango, talá oyo Yehova alobi: ‘Nakomemela bango mpasi+ oyo bakokoka kokima yango te. Ntango bakobelela ngai mpo na kosɛnga lisalisi, nakoyoka bango te.+
12 Mpe bingumba ya Yuda mpe bafandi ya Yerusaleme bakokende epai ya banzambe oyo bazali kopesa bambeka* mpe bakobelela bango mpo na kosɛnga lisalisi,+ kasi banzambe yango bakobikisa bango ata moke te na ntango ya mpasi na bango.
13 Ee Yuda, banzambe na yo bakómi ebele lokola bingumba na yo; otongi bitumbelo mpe likoló na yango ozali kopesa bambeka epai ya nzambe ya nsɔni, Baala, bitumbelo yango ekómi ebele lokola babalabala na Yerusaleme.’+
14 “Kasi yo,* kobondela mpo na bolamu ya bato oyo te, kobelela ngai te mpo na bolamu na bango, mpe kobondela te mpo na bango,+ mpo nakoyoka te ntango bakobelela ngai mpo na mpasi na bango.
15 Bato oyo nalingaka bazali kosala nini na ndako na ngai,Nzokande bato mingi bazali na mikano ya mabe?
Bakopekisa nde mpasi ekómela yo ntango bazali kopesa mbeka ya mosuni mosantu?*
Okozala na esengo na ntango wana?
16 Yehova azalaki kobenga yo liboso, Nzete ya olive oyo etondi na nkasa,Oyo ezali komonana kitoko na mbuma.
Na lokito ya koganga makasi atye mɔtɔ na nzete,Mpe babuki bitape na yango.
17 “Yehova ya mampinga, Moto oyo aloni yo,+ alobi ete mpasi ekokómela yo mpo na mabe oyo bato ya Yisraele mpe ya Yuda basali, baoyo basilikisi ngai na ndenge bapesi bambeka epai ya Baala.”+
18 Yehova ayebisaki ngai mpo nayeba yango.Na ntango yango omonisaki ngai makambo oyo bazalaki kosala.
19 Nazalaki lokola mwana-mpate ya mobali, ya botosi, oyo amemami mpo na kobomama.
Nayebaki te ete bazalaki kosalela ngai likita:+
“Tóbebisa nzete ná mbuma na yango,Tólongola ye na mokili ya bato ya bomoi,Mpo nkombo na ye ekanisama lisusu te.”
20 Kasi, Yehova ya mampinga asambisaka na bosembo;Atalatalaka motema mpe makanisi oyo ebombaná mpenza.*+
Tiká namona ndenge okozongisela bango mabe,Mpo napesi likambo na ngai ya kosamba na mabɔkɔ na yo.
21 Na yango, talá oyo Yehova alobi mpo na bato ya Anatote+ oyo bazali koluka bomoi* na yo mpe bazali koloba: “Osengeli te kosakola na nkombo ya Yehova.+ Soki okobi kosala bongo, tokoboma yo”;
22 na yango, talá oyo Yehova ya mampinga alobi: “Nakosɛnga bango bázongisa monɔkɔ. Bilenge mibali bakokufa na mopanga.+ Bana na bango ya mibali mpe ya basi bakokufa na nzala.+
23 Ata moto moko te akotikala na bomoi, mpo nakomemela bato ya Anatote mpasi,+ na mbula oyo nakosɛnga bango bázongisa monɔkɔ.”
Maloba na nse
^ Emonani ete azali koloba na Yirimia.
^ To, “Ezala bongo.”
^ Lil., “Nazalaki kolamuka ntɔngɔntɔngɔ mpe kokebisa.”
^ To, “milinga ya bambeka.”
^ Elingi koloba, Yirimia.
^ Elingi koloba, “bambeka oyo epesami na tempelo.”
^ To, “mayoki na ngai ya kati.” Lil., “bangɛi na ngai.”
^ To, “baoyo bazali koluka molimo.”
