Nzembo 75:1-10
-
Nzambe asambisaka na bosembo
-
Bato mabe bakomɛla kɔpɔ ya Yehova (8)
-
Epai ya mokambi ya nzembo. Mondule ya “Kobebisa te.” Loyembo ya Asafe.+
75 Ee Nzambe, tozali kopesa yo matɔndi, tozali kopesa yo matɔndi;Nkombo na yo ezali pene na biso,+Mpe bato bazali kosakola misala na yo ya kokamwa.
2 Olobi ete: “Soki natye ntango mpo na kosambisa,Nasambisaka na bosembo.
3 Ntango mabele mpe bato nyonso oyo bafandi wana banyangwaki,Ngai nde napikaki makonzí na yango.” (Sela)
4 Nalobaki na bato ya lolendo ete: “Bómikumisa te,”
Mpe na bato mabe ete: “Bótombola makasi* na bino te.
5 Bótombola makasi na bino na likoló teMpe bóloba na lofundo te.
6 Mpo ezali te na ɛsti to na wɛstiTo na sudi nde kotombwama eutaka.
7 Mpo Nzambe azali Mosambisi.+
Akitisaka moto moko mpe atombolaka mosusu.+
8 Mpo kɔpɔ ezali na lobɔkɔ ya Yehova;+Vinyo ezali kobimisa fulufulu mpe etondi na biloko oyo esangisami.
Akosopa yango mpenza,Mpe bato mabe nyonso ya mabele bakomɛla yango nyonso tii bakosilisa yango.”+
9 Kasi mpo na ngai, nakoyebisa yango mpo na libela;Nakoyemba mpo na kosanzola* Nzambe ya Yakobo.
10 Mpo alobi ete: “Nakosilisa makasi* ya bato mabe,Kasi makasi ya bato ya sembo ekokumisama.”
