Ezera 7:1-28
7 Nsima ya makambo wana, na boyangeli ya Artazerezese mokonzi+ ya Perse, Ezera*+ azongaki. Azalaki mwana ya Seraya,+ mwana ya Azaria mwana ya Hilikiya,+
2 mwana ya Shalume, mwana ya Zadoke mwana ya Ahitube,
3 mwana ya Amaria, mwana ya Azaria,+ mwana ya Merayote,
4 mwana ya Zerahia, mwana ya Uzi, mwana ya Buki,
5 mwana ya Abishua, mwana ya Finehase,+ mwana ya Eleazare,+ mwana ya Arona+ nganga-nzambe mokonzi.
6 Ezera autaki na Babilone. Azalaki mosali-bakopi* oyo ayebaki malamu* Mobeko ya Moize,+ oyo Yehova Nzambe ya Yisraele apesaki. Mokonzi apesaki ye eloko nyonso oyo asɛngaki, mpo Yehova Nzambe na ye azalaki elongo na ye.*
7 Bayisraele mosusu, banganga-nzambe, Balevi,+ bayembi,+ bakɛngɛli ya baporte+ ná basaleli ya tempelo*+ bakendaki na Yerusaleme na mbula ya nsambo ya Mokonzi Artazerezese.
8 Mpe Ezera ayaki na Yerusaleme na sanza ya mitano, na mbula ya nsambo ya mokonzi.
9 Na mokolo ya liboso ya sanza ya liboso, alongwaki na Babilone, mpe na mokolo ya liboso ya sanza ya mitano akómaki na Yerusaleme, mpo lobɔkɔ malamu ya Nzambe na ye ezalaki likoló na ye.+
10 Ezera abongisaki motema na ye* mpo na koyekola Mobeko ya Yehova, mpo na kosalela yango+ mpe koteya malako mpe bikateli ya lisambisi na Yisraele.+
11 Talá maloba ya mokanda oyo Mokonzi Artazerezese apesaki nganga-nzambe Ezera mosali-bakopi,* moto oyo amipesá na boyekoli ya* mitindo ya Yehova mpe malako na ye oyo apesaki Yisraele:
12 * “Artazerezese,+ mokonzi ya bakonzi, epai ya Ezera nganga-nzambe, mosali-bakopi* ya Mobeko ya Nzambe ya likoló: Kimya mingi ezala na yo. Mpe sikoyo,
13 napesi etinda oyo: moto nyonso na bokonzi na ngai, oyo azali moto ya ekólo Yisraele, banganga-nzambe na bango ná Balevi, oyo alingi kokende na Yerusaleme elongo na yo, akende.+
14 Mpo mokonzi mpe bapesi-toli na ye nsambo batindi yo mpo okende kotala soki bato ya Yuda mpe ya Yerusaleme bazali kotosa Mobeko ya Nzambe na yo, oyo ozali na yango.*
15 Omema palata ná wolo oyo mokonzi ná bapesi-toli na ye bapesi na bolingo na bango moko epai ya Nzambe ya Yisraele, oyo esika na ye ya kofanda ezali na Yerusaleme.
16 Omema mpe palata nyonso ná wolo oyo okozwa* na etúká* mobimba ya Babilone, elongo na likabo oyo bato ná banganga-nzambe bazali kopesa na bolingo na bango moko mpo na ndako ya Nzambe na bango, oyo ezali na Yerusaleme.+
17 Na mbongo yango, okosomba nokinoki bangɔmbɛ-mibali,+ bampate-mibali,+ bana-mpate,+ ezala mpe makabo ya mbuma+ mpe makabo na bango ya masanga+ mpe okopesa yango na etumbelo ya ndako ya Nzambe na bino, oyo ezali na Yerusaleme.
18 “Mpe palata ná wolo oyo ekotikala, yo ná bandeko na yo bokoki kosala na yango oyo bomoni malamu na kolanda mokano ya Nzambe na bino.
19 Mpe bambɛki nyonso oyo bazali kopesa yo mpo na losambo na ndako ya Nzambe na yo, tyá yango liboso ya Nzambe, na Yerusaleme.+
20 Mpe biloko mosusu ya ntina mpo na ndako ya Nzambe na yo, oyo osengeli kopesa, okosomba yango na mbongo oyo ekouta na kɛsi ya mokonzi.+
21 “Ngai, Mokonzi Artazerezese, napesi etinda oyo na bakɛngɛli nyonso ya biloko ya motuya oyo bazali na etúká ya ngámbo mosusu ya Ebale:* eloko nyonso oyo nganga-nzambe Ezera,+ mosali-bakopi* ya Mobeko ya Nzambe ya likoló akosɛnga bino, bópesa ye yango nokinoki,
22 bokoki kopesa ye ata talanta* 100 ya palata, korosi* 100 ya blé, bati 100 ya vinyo,+ bati* 100 ya mafuta,+ ná mungwa+ nyonso oyo akosɛnga.
23 Tiká ete makambo nyonso oyo Nzambe ya likoló apesi mitindo esalema na molende mpo na ndako ya Nzambe ya likoló,+ mpo nkanda na ye ekwela te mokili oyo eyangelami na mokonzi mpe bana na ye.+
24 Bóyeba likambo oyo: bokosɛnga mpako te, lifuti te,+ to mpako ya nzela te epai ya banganga-nzambe ná Balevi, babɛti-miziki,+ bakɛngɛli ya baporte, basaleli ya tempelo*+ ná basali ya ndako oyo ya Nzambe.
25 “Mpe yo, Ezera, na bwanya oyo Nzambe* na yo apesi yo, tyá bamajistra ná basambisi mpo básambisaka ntango nyonso bato oyo bazali na etúká ya ngámbo mosusu ya Ebale, baoyo nyonso bayebi mibeko ya Nzambe na yo; mpe bosengeli koteya moto nyonso oyo ayebi yango te.+
26 Mpe moto nyonso oyo aboyi kotosa Mobeko ya Nzambe na yo mpe mobeko ya mokonzi, basengeli kokatela ye etumbu nokinoki, ezala ya liwa, ya kobengana ye na mboka, ya kofutisa ye lomande to ya kotya ye na bolɔkɔ.”
27 Tiká ete Yehova Nzambe ya bankɔkɔ na biso asanzolama, ye oyo atye likambo ya boye na motema ya mokonzi, mpo na kokómisa kitoko ndako ya Yehova na Yerusaleme!+
28 Mpe amoniseli ngai bolingo ya sembo na ndenge asali ete nandimama na miso ya mokonzi,+ bapesi-toli na ye+ mpe bankumu nyonso ya nguya ya mokonzi. Bongo nazwaki makasi,* mpo Yehova Nzambe na ngai azalaki elongo na ngai,* mpe nasangisaki bato ya lokumu* ya Yisraele mpo bámata elongo na ngai.
Maloba na nse
^ Elimboli, “lisalisi.”
^ To, “mokomeli.”
^ To, “Azalaki mosali-bakopi ya mayele ya.”
^ Lil., “lobɔkɔ ya Yehova Nzambe na ye ezalaki likoló na ye.”
^ To, “Banetinime.” Lil., “bato oyo bapesami.”
^ To, “akanaki na motema na ye.”
^ To, “mokomeli.”
^ To, “mosali-bakopi ya maloba ya.”
^ Ezera 7:12 tii na 7:26 ekomamaki liboso na monɔkɔ ya Aramɛyɛ.
^ To, “mokomeli.”
^ Lil., “oyo ezali na lobɔkɔ na yo.”
^ To, “etúká oyo eyangelami.”
^ Lil., “okokuta.”
^ To, “na ngámbo mosusu ya Efrate.”
^ To, “mokomeli.”
^ To, “Banetinime.” Lil., “bato oyo bapesami.”
^ Lil., “na kolonda bwanya ya Nzambe na yo oyo ezali na lolɔkɔ na yo.”
^ To, “nalendisamaki.”
^ Lil., “lobɔkɔ ya Yehova Nzambe na ngai ezalaki likoló na ngai.”
^ Lil., “mitó.”
