Ezera 6:1-22
6 Na ntango yango nde Mokonzi Dariuse apesaki etinda, mpe balukalukaki na mikanda ya kala,* esika biloko ya motuya etyamaki na Babilone.
2 Mpe bamonaki rulo moko na ndako makasi na Ekebatana, na etúká* ya Media. Maloba oyo ekomamaki na kati ya rulo yango, yango oyo:
3 “Na mbula ya liboso ya Mokonzi Siruse, Mokonzi Siruse apesaki etinda mpo na ndako ya Nzambe na Yerusaleme,+ ete: ‘Ndako yango etongama lisusu mpo ezala esika ya kopesaka bambeka, mpe miboko na yango etyama na esika na yango. Banda na nse tii na likoló ekozala mapeko 60, mpe bonene na yango ekozala mapeko* 60.+
4 Ekozala na milɔngɔ misato ya mabanga minene oyo bazali kobalola mpo na kotya yango na bisika na yango mpe molɔngɔ moko ya mabaya;+ mpe mbongo ya misala ekouta na kɛsi ya mokonzi.+
5 Lisusu, biloko ya wolo mpe ya palata ya ndako ya Nzambe oyo Nebukadenezare abimisaki na tempelo oyo ezalaki na Yerusaleme mpe amemaki yango na Babilone+ ezonga, mpo ezongisama na esika na yango, na tempelo oyo ezali na Yerusaleme, mpe etyama na kati ya ndako ya Nzambe.’+
6 “Bongo sikoyo, yo Tatenai, guvɛrnɛrɛ ya etúká ya ngámbo mosusu ya Ebale,* mpe yo Shetare-bozenai, ná baninga na bino ya mosala, baguvɛrnɛrɛ mike oyo bazali na etúká ya ngámbo mosusu ya Ebale,+ bótika kokɔta na likambo oyo.
7 Bópekisa misala ya ndako wana ya Nzambe te. Guvɛrnɛrɛ ya Bayuda ná bankulutu ya Bayuda bakotonga lisusu ndako wana ya Nzambe, na esika oyo ezalaki liboso.
8 Lisusu, napesi etinda mpo na oyo bokosala mpo na kosalisa bankulutu wana ya Bayuda, mpo ete ndako wana ya Nzambe etongama lisusu: Na mosolo ya kɛsi ya mokonzi,+ oyo eutaka na mpako ya etúká ya ngámbo mosusu ya Ebale, bokopesa mibali yango mbongo ya misala nokinoki, mpo bákoba kosala mosala.+
9 Mokolo na mokolo, esengeli kopesa bango biloko nyonso oyo basengeli na yango; esengeli kozanga te: bana-ngɔmbɛ+ mibali ná bampate-mibali+ ná bana-mpate+ mpo na makabo ya kotumbela Nzambe ya likoló, blé,+ mungwa,+ vinyo+ ná mafuta,+ kaka ndenge banganga-nzambe oyo bazali na Yerusaleme bakosɛnga;
10 mpo bákoba kopesa makabo oyo ekosepelisa Nzambe ya likoló mpe bábondelaka mpo na bomoi ya mokonzi mpe ya bana na ye.+
11 Napesi mpe etinda ete moto nyonso oyo akobuka mobeko oyo akozwa etumbu: bakolongola libaya moko na ndako na ye, bakotombola ye mpe bakobaka ye na yango,* bongo bakokómisa ndako na ye kabinɛ* ya bato nyonso, mpo na mabe yango.
12 Tiká ete Nzambe oyo afandisi nkombo na ye kuna+ akweisa mokonzi nyonso mpe bato ya ekólo nyonso oyo bakoboya kotosa etinda oyo mpe bakobebisa ndako wana ya Nzambe, oyo ezali na Yerusaleme. Ngai, Dariuse nde napesi etinda oyo. Esalema nokinoki.”
13 Bongo Tatenai, guvɛrnɛrɛ ya etúká ya ngámbo mosusu ya Ebale, Shetare-bozenai+ ná baninga na bango ya mosala, basalaki nokinoki makambo oyo Mokonzi Dariuse apesaki mitindo.
14 Mpe bankulutu ya Bayuda bakobaki kotonga mpe misala ezalaki kokende liboso.+ Balendisamaki na maloba ya esakweli ya mosakoli Hagai+ ná Zekaria+ mwana ya mwana ya Ido. Basilisaki kotonga yango na kolanda etinda ya Nzambe ya Yisraele,+ na kolanda etinda ya Siruse,+ ya Dariuse,+ mpe ya Artazerezese+ mokonzi ya Perse.
15 Basilisaki kotonga ndako yango na mokolo ya misato ya sanza ya Adare,* na mbula ya motoba ya boyangeli ya mokonzi Dariuse.
16 Bongo Bayisraele, banganga-nzambe, Balevi,+ mpe bato mosusu oyo kala bamemamaki na mboka mopaya basalaki molulu ya bofungoli ya* ndako oyo ya Nzambe na esengo.
17 Mpo na bofungoli ya ndako oyo ya Nzambe, bapesaki ngɔmbɛ-mibali 100, mpate-mibali 200, bana-mpate 400, mpe mpo na likabo mpo na lisumu ya Yisraele mobimba, bapesaki ntaba-mibali 12, na kolanda motángo ya mabota ya Yisraele.+
18 Batyaki banganga-nzambe na bituluku na bango mpe Balevi na bituluku na bango, mpo na kosala mosala ya Nzambe na Yerusaleme,+ na kolanda oyo ekomami na buku ya Moize.+
19 Bato oyo kala bamemamaki na mboka mopaya basalaki Elekeli na mokolo ya 14 ya sanza ya liboso.+
20 Banganga-nzambe ná Balevi, bango nyonso bamipɛtolaki,+ na bongo bango nyonso bazalaki pɛto. Babomaki banyama ya mbeka mpo na Elekeli, mpo na bato nyonso oyo kala bamemamaki na mboka mopaya, mpo na banganga-nzambe mosusu mpe mpo na bango moko.
21 Na nsima, Bayisraele oyo bautaki na mboka mopaya epai bamemamaki balyaki yango elongo na moto nyonso oyo asanganaki na bango mpe oyo atikaki mimeseno ya mbindo ya bikólo ya mokili yango mpo na kosambela* Yehova Nzambe ya Yisraele.+
22 Na esengo nyonso, basalaki mpe fɛti ya Mampa ezangá levire+ mikolo nsambo, mpo Yehova asalaki ete básepela mpe asimbaki motema ya mokonzi ya Asiri mpo asalela bango bolamu.+ Bongo mokonzi asalisaki* bango na mosala ya ndako ya Nzambe ya solo, Nzambe ya Yisraele.
Maloba na nse
^ Lil., “ndako ya kobomba mikanda ya kala.”
^ To, “etúká oyo eyangelami.”
^ To, “na ngámbo mosusu ya Efrate.”
^ To, “twalɛti to wc.” To mbala mosusu, “esika ya kobwaka bosɔtɔ.”
^ To, “bakobaka ye na yango.”
^ To, “molulu ya kopesa.”
^ Lil., “koluka.”
^ Lil., “alendisaki mabɔkɔ na.”
