Mokanda ya liboso ya Petro 4:1-19
4 Lokola Kristo amonaki mpasi na mosuni,+ bino mpe bózala na makanisi ya ndenge wana;* mpamba te moto oyo amoni mpasi na mosuni atiki masumu,+
2 mpo alekisa ntango oyo atikali na yango na bomoi ya mosuni, mpo na kokokisa bamposa ya bato lisusu te,+ kasi mpo na mokano ya Nzambe.+
3 Mpo ntango oyo bolekisi na kosala mokano ya bikólo ekoki bongo,+ ntango bomipesaki na misala ya etamboli ya nsɔni na nko,* bamposa makasi ya mabe, komɛla masanga mingi, bafɛti ya lokoso, kolangwa masanga, mpe losambo mabe ya bikeko.*+
4 Bazali kokamwa lokola bozali lisusu kopota mbangu te elongo na bango na makambo wana ya mbindo mpenza, yango wana bazali koloba mabe mpo na bino.+
5 Kasi bato yango bakozongisa monɔkɔ epai ya moto oyo azali pene ya kosambisa bato ya bomoi mpe bato bakufá.+
6 Kutu, ezali mpo na yango nde nsango malamu esakolamaki mpe epai ya bakufi,+ mpo ete, atako basambisami na mosuni na miso ya bato, bákoka kozala na bomoi na boyokani na elimo na miso ya Nzambe.
7 Kasi nsuka ya makambo nyonso ekómi pene. Yango wana, bózala bato ya makanisi malamu+ mpe bózala ekɛngɛ* na oyo etali mabondeli.+
8 Koleka nyonso, bólinganaka makasi,+ mpo bolingo ezipaka masumu ebele.+
9 Bózala bayambi bapaya kozanga koimaima.+
10 Na ndenge oyo moto na moto azwi likabo, bósalela yango mpo na kosalelana lokola bakapita malamu ya boboto monene ya Nzambe, oyo emonisami na ndenge mingi.+
11 Soki moto azali koloba, aloba lokola nde azali koloba maloba ya Nzambe; soki moto azali kosalela bamosusu, atya motema na makasi oyo Nzambe apesaka;+ mpo ete na makambo nyonso, Nzambe azwa nkembo+ na nzela ya Yesu Kristo. Nkembo mpe nguya ezali ya ye libela na libela. Amen.
12 Bandeko ya bolingo, bókamwa te ndenge bozali na kati ya komekama makasi,+ lokola nde likambo moko oyo esalemá naino te ezali kokómela bino.
13 Kasi, bókoba nde kosepela+ na ndenge bino mpe bozali kosangana na bampasi ya Kristo,+ mpo ete bósepela mpe bótonda na esengo mingi na ntango oyo nkembo na ye ekomonana.+
14 Soki bazali kofinga* bino mpo na nkombo ya Kristo, bozali bato ya esengo,+ mpo elimo ya nkembo, ɛɛ elimo ya Nzambe, efandi likoló na bino.
15 Kasi, moko te na kati na bino amona mpasi mpo azali mobomi-bato to moyibi to mosali-mabe to moto oyo amikɔtisaka na makambo ya bato.+
16 Kasi soki moto moko azali komona mpasi mpo azali mokristo, ayoka nsɔni te,+ kasi akoba kopesa Nzambe nkembo wana amemi nkombo yango.
17 Mpo oyo ezali ntango oyo etyamá mpo lisambisi ebanda na ndako ya Nzambe.+ Sikoyo, soki ebandi liboso epai na biso,+ baoyo batosaka nsango malamu ya Nzambe te bakosuka ndenge nini?+
18 “Mpe soki moto ya sembo azali kobika na mpasi, ekozala boni mpo na moto oyo atyolaka Nzambe mpe mosumuki?”+
19 Yango wana, baoyo bazali komona mpasi na boyokani na mokano ya Nzambe bákoba komitika* na mabɔkɔ ya Mozalisi oyo azali sembo wana bazali kosala malamu.+
Maloba na nse
^ To, “bózala na ekateli wana.”
^ To, “misala ya etamboli ezangá nsɔni.” Boike ya liloba ya Grɛki asélgéïa. Talá Ndimbola ya maloba.
^ To, “oyo eyokani na mibeko te.”
^ To, “bólala mpɔngi te.”
^ To, “kotyola.”
^ To, “bátika milimo na bango.”
