Mokanda ya liboso ya Ntango 15:1-29
15 Mpe Davidi akobaki kotonga bandako mpo na ye moko na Sité ya Davidi, mpe abongisaki esika moko mpo na Sanduku ya Nzambe ya solo mpe atɛlɛmisaki hema mpo na yango.+
2 Na ntango yango nde Davidi alobaki: “Moto moko te asengeli komema Sanduku ya Nzambe ya solo, longola kaka Balevi, mpo bango nde Yehova aponá mpo na komema Sanduku ya Yehova mpe kosalela ye ntango nyonso.”+
3 Na nsima, Davidi ayanganisaki Yisraele mobimba na Yerusaleme mpo na komema Sanduku ya Yehova na esika oyo abongisaki mpo na yango.+
4 Davidi ayanganisaki bakitani ya Arona+ mpe Balevi.+
5 Na bakitani ya Kohate ayanganisaki: kapita Uriele ná bato ya libota na ye 120;
6 na bakitani ya Merari: kapita Asaya+ ná bato ya libota na ye 220;
7 na bakitani ya Gereshome: kapita Yoele+ ná bato ya libota na ye 130;
8 na bakitani ya Elizafane:+ kapita Shemaya ná bato ya libota na ye 200;
9 na bakitani ya Hebrone: kapita Eliele ná bato ya libota na ye 80;
10 na bakitani ya Uziele:+ kapita Aminadabe ná bato ya libota na ye 112.
11 Lisusu, Davidi abengaki Zadoke+ ná Abiatare+ banganga-nzambe, mpe Balevi: Uriele, Asaya, Yoele, Shemaya, Eliele, ná Aminadabe,
12 mpe alobaki na bango: “Bozali bankumu ya mabota ya batata ya Balevi. Bómisantisa,* bino ná bato ya mabota na bino. Na nsima, bómema Sanduku ya Yehova Nzambe ya Yisraele tii na esika oyo nabongisi mpo na yango.
13 Lokola na mbala ya liboso bomemaki yango te,+ nkanda ya Yehova Nzambe na biso engalelaki biso,+ mpo tolukaki te koyeba lolenge malamu ya komema yango.”+
14 Na yango, banganga-nzambe mpe Balevi bamisantisaki mpo na komema Sanduku ya Yehova Nzambe ya Yisraele.
15 Na nsima, Balevi bamemaki Sanduku ya Nzambe ya solo na mapeka na bango, na nzete na yango,+ kaka ndenge Moize apesaki mitindo, na kolanda liloba ya Yehova.
16 Nsima na yango Davidi ayebisaki bakapita ya Balevi bápona na kati ya mabota na bango bato oyo bazalaki bayembi. Basengelaki koyemba na esengo, elongo na bibɛtɛlo ya miziki: bibɛtɛlo ya bansinga, banzɛnzɛ,+ mpe basɛmbalɛ.+
17 Bongo Balevi baponaki na libota na bango Hemane+ mwana ya Yoele, Asafe+ mwana ya Berekia, mpe Etane+ mwana ya Kushaya, na libota ya Merari.
18 Bazalaki elongo na bandeko na bango ya etuluku ya mibale:+ Zekaria, Bene, Yaaziele, Shemiramote, Yehiele, Uni, Eliabe, Benaya, Maaseya, Matitia, Elifelehu, Mikeneia, mpe Obede-edome ná Yeyele bakɛngɛli ya baporte.
19 Hemane,+ Asafe,+ ná Etane, oyo bazalaki bayembi, bazalaki na mokumba ya kobɛta basɛmbalɛ ya kwivre;+
20 mpe Zekaria, Aziele, Shemiramote, Yehiele, Uni, Eliabe, Maaseya ná Benaya bazalaki kobɛta bibɛtɛlo ya bansinga oyo babongisi mpo ekokana na lolaka ya Alamote;*+
21 mpe Matitia,+ Elifelehu, Mikeneya, Obede-edome, Yeyele, ná Azazia bazalaki kobɛta banzɛnzɛ oyo babongisi mpo ekokana na lolaka ya Sheminite,*+ mpo bázala bakambi ya nzembo.
22 Kenania,+ kapita ya Balevi, azalaki kotambwisa mosala ya komema Sanduku, mpo ayebaki mpenza mosala,
23 mpe Berekia ná Elekana bazalaki bakɛngɛli ya baporte pembeni ya Sanduku.
24 Shebania, Yoshafate, Netanele, Amasai, Zekaria, Benaya, ná Eliezere oyo bazalaki banganga-nzambe bazalaki kobɛta kelelo makasi liboso ya Sanduku ya Nzambe ya solo.+ Obede-edome ná Yehia bazalaki mpe kosala lokola bakɛngɛli ya baporte pembeni ya Sanduku.
25 Bongo Davidi ná bankulutu ya Yisraele mpe bakonzi ya bato nkóto bakendaki na esengo makasi+ mpo na kozwa Sanduku ya kondimana ya Yehova oyo ezalaki na ndako ya Obede-edome.+
26 Lokola Nzambe ya solo asalisaki Balevi oyo bazalaki komema Sanduku ya kondimana ya Yehova, bapesaki mbeka ya bana-ngɔmbɛ nsambo ya mibali mpe bampate nsambo ya mibali.+
27 Davidi alataki kazaka moko ezangá mabɔkɔ oyo basalá na elamba ya kitoko, ndenge moko na Balevi nyonso oyo bazalaki komema Sanduku, bayembi, mpe Kenania kapita ya mosala ya komema Sanduku mpe kapita ya bayembi. Davidi alataki mpe efode ya lini.+
28 Bayisraele nyonso bazalaki koya na Sanduku ya kondimana ya Yehova. Bazalaki koganga na esengo,+ koyula liseke, kobɛta bakelelo,+ basɛmbalɛ, mpe kobɛta makasi bibɛtɛlo ya bansinga mpe banzɛnzɛ.+
29 Kasi ntango Sanduku ya kondimana ya Yehova ekómaki na Sité ya Davidi,+ Mikale+ mwana ya Saulo ya mwasi, atalaki na nse, na fɛnɛtrɛ, mpe amonaki Mokonzi Davidi azali kopumbwapumbwa mpe kosepela; bongo abandaki kotyola ye na motema na ye.+
