Yobo 20:1-29
20 Bongo Zofare Monaamate ayanolaki mpe alobaki ete:
2 “Yango wana makanisi na ngai oyo ezali kotungisa ngai eyanoli ngai,Ɛɛ, mpo na mobulungano oyo ezali na kati na ngai.
3 Nayoki elendiseli moko ya kofinga ngai;Mpe elimo moko oyo ezangi mayele oyo ngai nazali na yango ezali koyanola ngai.
4 Oyebi likambo oyo banda kala,Banda moto atyamaki na mabele,+
5 Ete koganga ya esengo ya bato mabe eumelaka te+Mpe kosepela ya mopɛngwi ezalaka ya mwa ntango moke?
6 Ata soki nkembo na ye emati tii na likoló mpenza+Mpe motó na ye ekómi na mapata,
7 Abebaka seko lokola nyɛi na ye;+Bato oyo bamonaki ye bakoloba: ‘Wapi ye?’+
8 Akopumbwa lokola ndɔtɔ, mpe bakomona ye te;Mpe bakobengana ye lokola emonaneli ya butu.+
9 Liso oyo emonaki ye ekomona ye lisusu te,+Mpe esika na ye ekomona ye lisusu te.+
10 Bana na ye bakoluka bato oyo bazangá bámonisela bango boboto,Mpe mabɔkɔ na ye moko ekozongisa biloko ya motuya oyo ye azwaki.+
11 Mikuwa na ye etondaki mɛkɛ na nguya ya bolenge na ye,Kasi ekolala esika moko na ye na putulu.+
12 Soki makambo ya mabe ezali elɛngi na monɔkɔ na ye,Soki azali konyangwisa yango na nse ya lolemo na ye,
13 Soki ayokeli yango mawa mpe atiki yango te,Mpe soki azali kokoba kokanga yango na kati ya monɔkɔ na ye,
14 Bilei na ye ekokóma ndenge mosusu na kati ya misɔpɔ na ye;Ekokóma nsɔngi ya kobra na kati na ye.
15 Amɛli bomɛngo, kasi akosanza yango;Nzambe akobimisa yango na libumu na ye.
16 Akomɛla ngɛngɛ ya kobra;Lolemo ya etupa ekoboma ye.+
17 Akomona mikɛli ata mokolo moko te,+Bibale oyo etondi na mafuta ya nzoi ná manteka.
18 Akozongisa biloko na ye oyo azwaki mpe akomɛla yango te;Ekozala mpe bongo mpo na bozwi oyo euti na mombongo na ye, kasi azweli yango litomba te.+
19 Mpo abukibuki, asundoli bato oyo bazangá;Abɔtɔli ndako oyo ye atongaki te.+
20 Mpo akozwa kopema ata moke te na libumu na ye;Na nzela ya biloko na ye ya motuya, akobika te.+
21 Ezali na eloko moko te oyo etikali mpo ye alya;Yango wana bolamu na ye ekoumela te.
22 Ntango ebele ya biloko na ye ekómi mpenza beboo, akozala motema likolólikoló;+Nguya nyonso ya mpasi ekoyela ye.
23 Esalema boye, mpo na kotondisa libumu na ye:Nzambe atindela ye nkanda na ye+Mpe anɔkisela ye yango kino na kati ya misɔpɔ na ye.
24 Akokima+ bibundeli ya bibende;Litimbo ya motako ekokata ye.
25 Ebundeli ya kobwakela ekobima na mokɔngɔ na ye,Mpe ebundeli oyo ezali kongɛnga ekotɔbɔla nsɔngi na ye;+Biloko ya nsɔmɔ ekoyela ye.+
26 Molili nyonso ebombameli biloko na ye ya malamu oyo ebombami;Mɔtɔ oyo moto moko te apupoli ekolya ye;+Ekozala mpasi mpenza mpo na moto oyo akobika na hema na ye.
27 Likoló ekobimisa libunga na ye polele,+Mpe mabele ekotombokela ye.
28 Mbula monene ekomema ndako na ye;Biloko ekosopama na mokolo ya nkanda na ye.+
29 Wana nde likabo Nzambe apesaka moto mabe,+Ɛɛ, libula na ye oyo Nzambe ayebisá.”
