Yisaya 58:1-14
58 “Belelá na mongongo makasi; kotika te.+ Tombolá mongongo na yo lokola liseke, mpe yebisá bato na ngai botomboki na bango,+ mpe ndako ya Yakobo masumu na bango.
2 Kasi mokolo na mokolo, bazali koluka ngai, mpe bazali komonisa ete basepeli koyeba banzela na ngai,+ lokola ekólo moko oyo ezali kosalela boyengebene mpe oyo etiki bosembo ya Nzambe na bango te,+ bazali se kosɛnga ngai bikateli ya boyengebene, na ndenge bazali kobɛlɛma na Nzambe oyo bazali kosepela na ye,+
3 “‘Mpo na nini tokilaki bilei mpe omonaki yango te,+ mpe tomonisaki molimo na biso mpasi+ kasi otyaki likebi te?’+
“Ya solo, bozalaki nde kosepela na mokolo mpenza oyo bozalaki kokila bilei, ntango bozalaki kotinda na makasi bato na bino nyonso oyo babomaka nzoto na mosala ete básala mosala.+
4 Ya solo, bozalaki kokila bilei nde mpo na koswana mpe kowelana,+ mpe mpo na kobɛta likofi na ndenge ya mabe.+ Bokobaki nde kokila bilei lokola na mokolo oyo boyokisaka mongongo na bino kuna na likoló, boye te?
5 Kokila bilei oyo nazali kopona esengeli kozala nde lokola mokolo oyo moto ya mabele asengeli komonisa molimo na ye mpasi?+ Esengeli nde kozala mpo na kogumba motó na ye lokola nkɛkɛlɛ, mpe mpo atanda ngɔtɔ mpe putulu ya mɔtɔ lokola mbeto na ye?+ Ezali yango nde ozali kobenga kokila bilei mpe mokolo oyo Yehova andimi?+
6 “Kokila bilei oyo ngai nazali kopona ezali oyo te? Kofungola bikangeli ya mabe,+ kofungola bansinga ya ekanganeli,+ mpe kotika baoyo banyatami bákende na bonsomi,+ mpe ete bóbuka ekanganeli nyonso, boye te?+
7 Ezali nde kokabola limpa na yo na moto oyo azali na nzala,+ mpe ete okɔtisa na ndako na yo bato ya mpasi, bato oyo bazangá ndako, boye te?+ Soki omoni moto moko bolumbu, olatisa ye,+ mpe omibomba te liboso ya moto oyo azali ndeko na yo, boye te?+
8 “Soki bongo, pole na yo ekobima lokola kotana ya ntɔngɔ;+ mpe kobika na yo ekobima nokinoki.+ Mpe boyengebene na yo ekotambola mpenza liboso na yo;+ nkembo ya Yehova ekokɛngɛla yo na nsima.+
9 Soki bongo, okobenga, mpe Yehova ye moko akoyanola; okobelela mpo na kosɛnga lisalisi,+ mpe ye akoloba: ‘Ngai oyo!’
“Soki olongoli ekanganeli epai na yo,+ soki otiki kolakisalakisa mosapi+ mpe kolobaloba makambo ya koyokisa mpasi;+
10 mpe soki opesi moto oyo azali na nzala biloko oyo molimo na yo moko ezalaka na mposa na yango,+ mpe soki otondisi molimo oyo ezali komona mpasi, pole na yo mpe ekobima mpenza ata na kati ya molili, mpe molili na yo ekozala lokola midi.+
11 Mpe Yehova akokamba+ yo mpenza ntango nyonso+ mpe akotondisa molimo na yo ata na mokili oyo ezikaziká,+ mpe akokembisa mikuwa na yo;+ mpe okokóma lokola elanga oyo ezwaka mai mpenza,+ mpe lokola liziba ya mai, oyo mai na yango ekosaka te.
12 Mpe ntango okosɛnga bato bátonga mpenza bisika oyo ebebisamá uta kala, bakotonga;+ okotɛlɛmisa miboko oyo ebebá banda mabota na mabota.+ Mpe bakobenga yo mpenza moto oyo abambaka madusu,+ moto oyo abongisaka babalabala oyo bato bakoki kofanda pembenipembeni na yango.
13 “Soki mpo na sabata ozongisi lokolo na yo nsima mpo na kosala makambo oyo ezali kosepelisa yo na mokolo na ngai mosantu,+ mpe soki ya solo obengi sabata bisengo mpenza, mokolo mosantu ya Yehova, mokolo oyo ezali kokumisama,+ mpe soki ya solo okumisi yango na esika ya kotambola na banzela na yo moko, na esika ya komona makambo oyo ezali kosepelisa yo mpe na esika ya koloba liloba ya mpamba;
14 soki bongo okosepela mpenza na Yehova,+ mpe nakomatisa yo likoló ya bisika ya mabele oyo etombwaná;+ mpe nakoleisa yo biloko euti na libula ya Yakobo nkɔkɔ na yo,+ mpo monɔkɔ ya Yehova nde elobi yango.”+
