Yirimia 30:1-24
30 Liloba oyo eyelaki Yirimia uta na Yehova ete:
2 “Talá oyo Yehova Nzambe ya Yisraele alobi: ‘Komá na buku maloba nyonso oyo nakoloba na yo.+
3 Mpo, “talá! mikolo ezali koya,” yango nde liloba ya Yehova, “mpe nakoyanganisa bakangami ya bato na ngai, Yisraele mpe Yuda,”+ Yehova alobi bongo, “mpe nakozongisa bango na mokili oyo napesaki bankɔkɔ na bango, mpe bakozwa mpenza yango lisusu.”’”+
4 Mpe talá maloba oyo Yehova alobi na Yisraele mpe na Yuda.
5 Mpo talá oyo Yehova alobi: “Toyoki lokito ya kolɛnga, nsɔmɔ,+ mpe kimya ezali te.
6 Nabondeli bino, bótuna, mpe bómona soki mobali abotaka. Mpo na nini namoni mobali makasi nyonso atye mabɔkɔ na loketo lokola mwasi oyo azali kobota,+ mpe bilongi nyonso ekómi pɛɛ?+
7 Aa mawa! Mpo mokolo yango ezali mokolo moko monene,+ mpe mosusu lokola yango ezali te,+ mpe ezali ntango ya mpasi mpo na Yakobo.+ Kasi akobika na yango.”
8 “Mpe na mokolo yango ekosalema mpenza boye,” yango nde liloba ya Yehova ya mampinga, “nakobuka ekanganeli na ye uta na nkingo na yo, mpe nakokata bansinga na yo,+ mpe bapaya bakozwa ye lisusu te mosaleli oyo azali kosala mosala ya mpunda.
9 Mpe bakosalela mpenza Yehova Nzambe na bango mpe Davidi mokonzi na bango,+ oyo nakotɛlɛmisela bango.”+
10 “Nde yo, kobanga te, Ee mosaleli na ngai Yakobo,” yango nde liloba ya Yehova, “mpe kozala na nsɔmɔ te, Ee Yisraele.+ Mpo talá nazali kobikisa yo uta na mosika mpe bana na yo uta na mokili oyo bakangamaki.+ Mpe Yakobo akozonga mpenza mpe akotungisama lisusu te mpe akozala na kimya, mpe moto ata moko te akozala mpo na kolɛngisa ye.”+
11 “Mpo nazali elongo na yo,” yango nde liloba ya Yehova, “mpo na kobikisa yo;+ kasi nakosilisa bato nyɛɛ kati na bikólo nyonso epai napalanganisaki yo.+ Kasi yo, nakosilisa yo nyɛɛ te.+ Mpe nasengeli kosembola yo na ndenge oyo ekoki, mpo nakozanga te kopesa yo etumbu.”+
12 Mpo talá oyo Yehova alobi: “Nkisi ezali te mpo na mpasi na yo.+ Mpota na yo ekoki kosila te.+
13 Moto ya kolobela likambo na yo azali te, mpo na kosilisa mpota na yo.+ Nkisi ya kobikisa yo ezali te, nkisi ya kobelisa mpota na yo ezali te.+
14 Baoyo nyonso bazalaki kolinga yo makasi bango nde babosani yo.+ Ezali yo te nde bazali kolukaluka. Mpo nabɛti yo na fimbo ya monguna,+ na etumbu ya moto ya nko,+ mpo libunga+ na yo ekómi monene; masumu na yo ekómi mingi.+
15 Mpo na nini ozali kolela mpo na mpasi na yo?+ Mpasi na yo ekoki kosila te mpo libunga na yo ekómi monene; masumu na yo ekómi mingi.+ Nasali yo makambo wana.
16 Na yango, baoyo nyonso bazali kolya yo bango moko bakolyama;+ mpe banguna na yo bakokende bango nyonso bakangami na mboka mopaya.+ Mpe baoyo bazali kopunza yo bakopunzama, mpe baoyo nyonso bazali kobɔtɔla yo biloko nakosala ete biloko na bango ebɔtɔlama.”+
17 “Mpo nakozongisela yo nzoto makasi, mpe nakobikisa yo na bampota na yo,”+ yango nde liloba ya Yehova. “Mpo bazalaki kobenga yo nde mwasi oyo babenganá:+ ‘Ezali Siona, oyo moto moko te azali koluka.’”+
18 Talá oyo Yehova alobi: “Talá nazali koyanganisa bakangami ya bahema ya Yakobo,+ mpe nakoyokela batabernakle na ye mawa. Mpe engumba ekotongama lisusu likoló ya libondo na yango;+ mpe ndako molai ya kofanda ekozala likoló ya esika na yango mpenza.+
19 Mpe matɔndi ekobima mpenza kuna, ná mongongo ya baoyo bazali kosɛka.+ Mpe nakokómisa bango mingi, mpe motángo na bango ekokita te;+ mpe nakokómisa bango ebele, mpe bakokóma eloko mpamba te.+
20 Mpe bana na ye bakokóma ndenge bazalaki na ntango ya kala, mpe liyangani na ye mpenza ekopikama makasi liboso na ngai.+ Mpe nakotya likebi na ngai epai ya bato nyonso oyo bazali konyokola ye.+
21 Mpe moto na ye ya nguya akouta mpenza epai na ye,+ mpe moyangeli na ye akobima na kati na ye;+ mpe nakobɛlɛmisa ye, mpe akopusana mpenza penepene na ngai.”+
“Mpo sikoyo, nani wana apesi motema na ye ndanga mpo abɛlɛma epai na ngai?”+ yango nde liloba ya Yehova.
22 “Mpe bokokóma mpenza bato na ngai,+ mpe ngai nakokóma Nzambe na bino.”+
23 Talá! Mopɛpɛ makasi ya Yehova, nkɛlɛ na ye mpenza, ebimi, mopɛpɛ makasi oyo ezali kokɔmbɔla.+ Ekobalukabaluka likoló ya motó ya bato mabe.+
24 Nkanda ya kongala ya Yehova ekozonga nsima te kino akosilisa kosala mpe kino akosilisa kokokisa makanisi ya motema na ye.+ Bokotyela likambo yango likebi na eleko ya nsuka ya mikolo.+
