Masese 4:1-27
4 Ee bana, bóyoka disiplini ya tata+ mpe bótya likebi, mpo bóyeba eloko babengi mayele.+
2 Mpo ya solo, liteya ya malamu nde nakopesa bino.+ Bótika mobeko na ngai te.+
3 Mpo ngai nazalaki mwana mpenza epai ya tata na ngai,+ mwana ya motau mpe mwana se moko na miso ya mama na ngai.+
4 Mpe tata azalaki koteya ngai+ mpe koloba na ngai boye: “Motema+ na yo esimba makasi maloba na ngai.+ Batelá mitindo na ngai mpe kobá kozala na bomoi.+
5 Zwá bwanya,+ zwá mayele.+ Kobosana te, mpe kotangwa na maloba ya monɔkɔ na ngai te+.
6 Kotika yango te, mpe ekokɛngɛla yo. Lingá yango, mpe ekobatela yo.
7 Bwanya ezali eloko ya liboso.+ Zwá bwanya; mpe na nyonso oyo ozali kozwa, zwá mpe mayele.+
8 Zwá yango na motuya monene, mpe ekotombola yo.+ Ekopesa yo nkembo mpo oyambi yango.+
9 Ekotya motole ya fololo ya monzɛlɛ na motó na yo;+ ekokabela yo motole ya kitoko.”+
10 Mwana na ngai, yoká, mpe ndimá maloba na ngai.+ Boye bambula ya bomoi na yo ekokóma mingi.+
11 Ɛɛ, nakolakisa yo na nzela ya bwanya;+ nakotambolisa yo na banzela ya kolongobana.+
12 Ntango okotambola, matambe na yo ekozala na nkaka te;+ mpe soki opoti mbangu, okobɛta libaku te.+
13 Simbá disiplini;+ kotika yango te.+ Batelá yango, mpo yango nde bomoi na yo.+
14 Kokɔta na nzela ya bato mabe te,+ mpe kokende te komikɔtisa na nzela ya bato mabe.+
15 Kimá yango,+ koleka kuna te;+ longwá na yango, leká na yo.+
16 Mpo balalaka te soki basali mabe te,+ mpe bazwaka mpɔngi te soki babɛtisi moto libaku te.+
17 Mpo balei limpa ya makambo ya mabe,+ mpe vinyo ya makambo ya mobulu nde bazali komɛla.+
18 Kasi nzela ya bayengebene ezali lokola pole oyo ezali kongɛnga, oyo ezali kongɛnga se kongɛnga kino moi ekokóma makasi.+
19 Nzela ya bato mabe ezali lokola molili;+ bayebi te na eloko nini bazali kobɛtabɛta libaku.+
20 Mwana na ngai, tyá likebi na maloba na ngai.+ Sembolá litoi na yo na maloba na ngai.+
21 Elongwa na miso na yo te.+ Batelá yango na kati ya motema na yo.+
22 Mpamba te ezali bomoi mpo na bato oyo bazali kozwa yango+ mpe bokolɔngɔnɔ mpo na nzoto na bango mobimba.+
23 Koleka biloko mosusu nyonso oyo esengeli kobatelama, batelá motema na yo,+ mpo maziba ya bomoi eutaka na yango.+
24 Longolá maloba oyo etɛngamá+ epai na yo; mpe longolá mosika na yo mbɛbu ya maloba ya mbilingambilinga.+
25 Miso na yo esengeli kotala alima liboso na yo,+ ɛɛ, miso na yo oyo ezali kongɛnga esengeli kotala alima liboso na yo.+
26 Yeisá patatalu nzela ya lokolo na yo,+ mpe tiká banzela na yo nyonso ezala semba.+
27 Kokende na lobɔkɔ ya mobali te to na lobɔkɔ ya mwasi te.+ Longolá lokolo na yo na makambo oyo ezali mabe.+
