“Moto oyo aboyi kolimbisa basusu azali kobuka gbagba (pont) oyo ye moko asengeli koleka likoló na yango.” Maloba oyo ya Edward Herbert, moto moko ya istware ya siɛklɛ ya 17 emonisi ntina oyo tosengeli kolimbisaka basusu, mpo lelo to lobi, biso mpe tokozala na mposa ya kosɛnga basusu bolimbisi. (Matai 7:12) Kasi, ezali na likambo oyo eleki ntina oyo esengeli kotinda biso tólimbisaka. Talá maloba ya ntoma Paulo oyo ezali na Bakolose 3:13.​—Tángá.

Lokola biso nyonso tozali bato ya kozanga kokoka, na bantango mosusu tokoki kosilikisa basusu to bango mpe bakoki kosilikisa biso. (Baroma 3:23) Ndenge nini tokoki kobatela kimya na bato ya kozanga kokoka lokola biso? Na litambwisi ya elimo ya Nzambe, Paulo apesaki biso toli ete tólandelaka makambo nyonso te mpe tólimbisaka. Toli yango ezali na ntina mingi lelo oyo kaka ndenge ezalaki na ntango oyo ekomamaki eleki sikoyo mbula soki 2 000. Tótalela naino malamumalamu maloba ya Paulo.

“Bókoba kokanga motema moto na moto na makambo ya mosusu.” Maloba “bókoba kokanga motema” euti na liloba ya Grɛki oyo elimboli koboya kolandela makambo nyonso to kozala motema molai. Buku moko elobi ete bakristo bamonisaka ezaleli yango ntango “bandimaka mpenza kokanga motema na libunga to na ezaleli moko ya mabe oyo epesi bango nkanda.” Maloba “moto na moto na makambo ya mosusu” emonisi ete ezaleli yango esengeli komonana na ngambo nyonso mibale. Elingi koloba, soki toyebi ete tozali na bizaleli oyo ekoki kosilikisa basusu, tokotika te ete makambo na bango oyo esepelisaka biso te ebebisa kimya na biso ná bango. Kasi tokosala nini soki basusu basali biso mabe?

“Bókoba . . . kolimbisana na motema moko.” Moto moko ya mayele alobi ete maloba ya Grɛki oyo ebongolami na “kolimbisa na motema moko” “ezali te maloba oyo bato basalelaka mingi mpo na kosɛnga bolimbisi . . . kasi ezali moko ya maloba oyo emonisaka bolimbisi oyo euti mpenza na motema.” Buku mosusu elobi ete maloba yango ekoki kolimbola “kokómisa likambo moko malamu, komonisa boboto, to litomba.” Tomonisaka boboto ntango tondimaka na motema moko kolimbisa ata soki tozali na “likambo ná mosusu.” Kasi, mpo na nini tosengeli kondima kosala bongo? Mpo mokolo mosusu, tokozala mpe na mposa ete moto oyo asalaki biso mabe, alimbisa biso ndenge biso mpe tolimbisaki ye.

“Kaka ndenge Yehova alimbisaki bino na motema moko, bino mpe bósala bongo.” Ntina ya libosoliboso oyo tosengeli kolimbisa basusu na motema moko ezali mpo Yehova mpe alimbisaka biso na motema moko. (Mika 7:18) Kanisá naino boboto monene oyo Yehova amoniselaka basumuki oyo babongoli motema! Yehova asalaka lisumu te, kasi biso tosalaka yango. Ata bongo, na motema moko andimaka mpenza kolimbisa basumuki oyo babongoli motema atako ayebi ete akozala na mposa te basumuki yango bámonisela ye motema boboto to bálimbisa ye. Ya solo mpenza, Yehova azali ndakisa oyo eleki malamu na likambo etali kolimbisa!

Motema mawa ya Yehova ebendaka biso epai na ye mpe etindaka biso tómekola ye. (Baefese 4:32–5:1) Ekozala malamu tómituna boye: ‘Lokola Yehova alimbisaka ngai na motema moko, mpo na nini naboya kolimbisa moto ya kozanga kokoka lokola ngai oyo abongoli mpenza motema na mabe oyo asalaki ngai?’​—Luka 17:3, 4.