YESU azalaki mpenza na bomoi ya esengo? Akolaki na libota ya bozwi te, mpe azalaki na biloko mingi te bomoi na ye mobimba. Azalaki kutu na “esika ya kolalisa motó te.” (Luka 9:57, 58) Lisusu, bayinaki ye, bakoselaki ye makambo mpe nsukansuka banguna na ye babomaki ye.

Mbala mosusu okoki koloba boye: ‘Mpo na ngai, bomoi ya ndenge wana ezali ya esengo te!’ Kasi ezali na makambo mosusu ya bomoi ya Yesu oyo tosengeli kotalela. Tótalela naino makambo minei ya bomoi na ye.

“Bilei na ngai nde kosala mokano ya moto oyo atindaki ngai.”​—Yoane 4:34.

Yesu alukaki kokokisa mokano ya Yehova, * Tata na ye ya likoló, ezala na maloba to na misala. Kosala mokano ya Nzambe epesaki ye esengo mingi. Ndenge vɛrsɛ oyo ezali awa emonisi yango, Yesu akokanisaki kosala mokano ya Nzambe na bilei. Tótalela makambo oyo etindaki ye aloba bongo.

Ekoki kozala ete Yesu alobaki maloba wana na midi. (Yoane 4:6) Atambolaki ntɔngɔ mobimba na mokili ya ngombangomba ya Samaria, mpe na ntembe te, ayokaki nzala. Kutu, bayekoli na ye babondelaki ye boye: “Rabi, lyá.” (Yoane 4:31) Eyano oyo Yesu apesaki emonisaki ete kosala mosala ya Nzambe ezalaki lokola bilei oyo ezalaki kopesa ye makasi. Yango emonisi te ete moto ya boye azalaki mpenza na bomoi ya esengo?

“Nalingaka Tata.”—Yoane 14:31.

Na likoló, Yesu azalaki koyokana malamu na Tata na ye. Bolingo makasi oyo azalaki na yango mpo na Nzambe, etindaki ye alakisa bato nkombo ya Tata na ye, mikano mpe bizaleli na ye. Yesu amekolaki mpenza Tata na ye na maloba, na misala mpe na bizaleli; na boye ete na nzela ya Yesu, ezali lokola tozali komona Nzambe na miso. Yango wana, ntango Filipe atunaki Yesu: “Lakisá biso Tata,” ayebisaki ye boye: “Moto oyo amoni ngai amoni mpe Tata.”​—Yoane 14:8, 9.

Yesu alingaki Tata na ye mingi yango wana andimaki kotosa ye tii na liwa. (Bafilipi 2:7, 8; 1 Yoane 5:3) Kolinga Nzambe ndenge wana esalaki ete Yesu azala na bomoi ya esengo.

“Ata moto moko te azali na bolingo koleka oyo, ete moto akaba molimo na ye mpo na baninga na ye.”​—Yoane 15:13.

Toboyi te, lokola tozali bato ya kozanga kokoka, avenire na biso ezali mabe mpenza. Biblia elobi boye: “Lisumu ekɔtaki na mokili mpo na moto moko [Adama] mpe liwa mpo na lisumu, ndenge moko mpe liwa epalangani epai ya bato nyonso mpo bango nyonso basalaki lisumu.” (Baroma 5:12) Tokoki te kokima likambo oyo lisumu ememelá biso; elingi koloba liwa.​—Baroma 6:23.

Likambo ya esengo, Yehova azwaki bibongiseli mpo na kosilisa likambo yango. Atikaki ete Yesu, Mwana na ye ya kokoka, oyo azangi lisumu, anyokwama mpe akufa mpo na kopesa lisiko oyo esengeli mpo na kolongola bato na boombo ya lisumu mpe ya liwa. Bolingo ya Yesu mpo na Tata na ye mpe bato etindaki ye andima kopesa bomoi na ye ya kokoka mpo na biso. (Baroma 5:6-8) Bolingo wana oyo ezangi moimi esalaki ete Yesu azala na bomoi ya esengo. *

“Oyo azali Mwana na ngai ya bolingo, oyo nandimi.”​—Matai 3:17.

Yehova alobaki maloba wana na ntango ya batisimo ya Yesu. Na ndenge yango, amonisaki polele ete alingaka mpe andimaka Mwana na ye, Yesu. Yango wana, Yesu alobaki polele ete: “Tata alingi ngai”! (Yoane 10:17) Lokola ayebaki ete Tata na ye azalaki kolinga mpe kondima ye, Yesu ayikaki mpiko na botɛmɛli mpe maloba mabe ya bato. Kutu, esalisaki ye abanga liwa te. (Yoane 10:18) Koyeba ete Tata na ye azalaki kolinga mpe kondima ye, esalaki ete Yesu azala mpenza na bomoi ya esengo.

Yesu azalaki mpenza na bomoi ya esengo. Yango wana, bomoi ya Yesu ekoki koteya biso makambo mingi oyo etali ndenge ya kozala na bomoi ya esengo. Lisolo oyo elandi ekotalela batoli mosusu oyo Yesu apesaki bayekoli na ye mpo na ndenge ya komitambwisa na bomoi.