YEHOVA amonaka milende oyo basaleli na ye basalaka mpo na kosepelisa ye? Ɛɛ, amonaka yango! Kasi asukaka kaka wana te, amonaka mpe makambo oyo basalelaka ye mpe masanzoli oyo bapesaka ye. Atyaka kutu likebi ata ntango bakanisaka bolamu oyo asalelaka bango. Likambo eleki ntina ezali ete Yehova akobosana bato na ye soki moke te mpe makambo oyo basalaki. Nini endimisi biso yango? Maloba oyo mosakoli Malaki akomaki epesi biso eyano.​—Tángá Malaki 3:16.

Ntango Malaki asakolaki na siɛklɛ ya mitano liboso ya ntango na biso, bizaleli mpe losambo ya Bayisraele ebebaki mpenza. Banganga-nzambe bazalaki kokipe lisusu mosala na bango te, mpe bato mingi bakómaki kosala makambo oyo esepelisaka Nzambe te, na ndakisa bonganga-nkisi, ekobo, mpe kobuba bato. (Malaki 2:8; 3:5) Atako bizaleli ya bato ebebaki ndenge wana, ezalaki mpe na Bayisraele mosusu oyo batikalaki sembo. Bazalaki kosala nini?

Malaki alobi boye: “Baoyo babangaka Yehova balobanaki, moto na moto na moninga na ye.” Kobanga Nzambe ezali ezaleli moko ya malamu. Awa Malaki alobeli Bayisraele oyo bazalaki na limemya mozindo epai ya Nzambe mpe bazalaki kobanga kosala makambo oyo ekosepelisa ye te. Simbá ete bato yango oyo bazalaki kobanga Nzambe “balobanaki, moto na moto na moninga na ye.” Emonani ete bazalaki kokutana mpo na koloba makambo ya malamu mpo na Yehova mpe kolendisana mpo bálɛmba nzoto te mpe bálanda te bizaleli mabe ya ntango wana.

Bayisraele ya sembo bamonisaki mpe limemya mpo na Yehova na lolenge mosusu oyo ya malamu: Bazalaki ‘kokanisa nkombo na ye.’ Libongoli mosusu elobi “kopesa nkombo na ye lokumu.” Bato yango oyo bazalaki kobanga Nzambe bakumisaki Yehova ata na makanisi na bango. Na mitema na bango, bazalaki komonisa bɔtɔndi epai ya Yehova mpe komanyola na ntina etali nkombo na ye monene. Yehova ayebaki oyo bango bazalaki kosala?

Malaki alobi lisusu boye: “Yehova azalaki kotya likebi mpe koyoka.” Kuna na likoló, na esika na ye ya kofanda ya nkembo, Yehova atyaki litoi na ye mpo na koyoka masanzoli nyonso oyo basaleli na ye bazalaki kolobelana. Azalaki mpe kotya likebi na makambo oyo bazalaki kokanisa na mitema na bango. (Nzembo 94:11) Kasi asukaki kaka wana te.

Malaki amonisi ete “buku ya kokanisama ebandaki kokomama liboso na ye.” Buku yango ezali nde makambo ya baoyo nyonso basalelaki Yehova na bosembo. Simbá ete babengi yango “buku ya kokanisama.” * Yango emonisi biso ete Yehova akobosana soki moke te basaleli na ye ya sembo mpe nyonso ya malamu oyo basalaka mpo na kokumisa ye; ezala na misala, na maloba to na makanisi. Kasi ezali na ntina moko oyo Nzambe akanisaka bango. Alaki kopesa bomoi ya seko epai ya baoyo nkombo na bango ekomami libela na buku na ye ya kokanisama. *​—Nzembo 37:29.

Koyeba ete Yehova azwaka na valɛrɛ makambo nyonso oyo tosalaka mpo na kosambela ye na ndenge oyo ebongi, elendisaka mpenza! Maloba oyo ezali na Malaki 3:16 esengeli kotinda biso tókanisa malamu. Ekozala malamu tómituna boye: ‘Nkombo na ngai ezali na “buku ya kokanisama” ya Nzambe?’ Ekozala na buku yango, soki mokolo na mokolo, tozali kosala, koloba mpe kokanisa na ndenge oyo ekosala ete Yehova abosana yango te.