Ndenge emonisami na elilingi oyo ezali awa na lobɔkɔ ya mobali, bato mingi bakanisaka ete na Mokolo ya Kosambisama, bamiliare ya bato bakotɛlɛma liboso ya kiti ya bokonzi ya Nzambe mpo na kosambisama na kolanda makambo oyo basalaki kala​—bamosusu bakozwa lifuti ya bomoi na likoló mpe basusu bakonyokwama na lifelo. Kasi, Biblia emonisi ete Mokolo ya Kosambisama ekozala nde mpo na kosikola bato na makambo ya kozanga bosembo. (Nzembo 96:13) Nzambe aponi Yesu azala Mosambisi oyo akozongisela bato bosembo.​—Tángá Yisaya 11:1-5; Misala 17:31.

Ntango Adama moto ya liboso atombokelaki Nzambe, atikelaki bakitani na ye nyonso lisumu, mpasi mpe liwa. (Baroma 5:12) Mpo na kobongisa likambo yango ya kozanga bosembo, Yesu akozongisa na bomoi to akosekwisa bamiliare ya bato oyo bakufá. Mokanda ya Emoniseli emonisi ete yango ekosalema na boumeli ya mbula nkóto ya boyangeli ya Yesu Kristo.​—Tángá Emoniseli 20:4, 11, 12.

Bato oyo bakosekwa bakosambisama te na kotalela makambo oyo basalaki liboso bákufa, kasi nde na kotalela oyo bakosala ntango makambo oyo ezali na “barulo” oyo elobelami na Emoniseli mokapo 20 ekoyebana. (Baroma 6:7) Ntoma Paulo alobaki ete ‘bayengebene mpe bato oyo bazangi boyengebene’ bakozala na kati ya bato oyo bakosekwisama mpe bakozwa libaku ya koyekola makambo ya Nzambe.​—Tángá Misala 24:15.

Baoyo bakufaki kozanga ete báyeba Yehova Nzambe mpe básalela ye, bakozwa libaku ya kobongwana mpe kosala makambo ya malamu. Soki basali bongo, lisekwa na bango ekozala “lisekwa ya bomoi.” Kasi, bato mosusu oyo bakosekwisama bakolinga te koyekola makambo ya Yehova. Lisekwa na bango ekozala “lisekwa ya kosambisama.”​—Tángá Yoane 5:28, 29; Yisaya 26:10; 65:20.

Na nsuka ya Mokolo ya Kosambisama oyo ekoumela mbula nkóto, Yehova akozongisa bato ya botosi na bomoi ya kokoka ndenge ezalaki na ebandeli. (1 Bakorinti 15:24-28) Oyo nde elikya kitoko mpo na bato nyonso ya botosi! Na komekama ya nsuka, Nzambe akofungola Satana Zabolo na libulu mozindo epai akangamaki na boumeli ya mbula nkóto. Satana akomeka lisusu kolongola bato na nzela ya Yehova, kasi baoyo bakoboya kolanda ye bakozwa bomoi ya seko awa na mabele.​—Tángá Yisaya 25:8; Emoniseli 20:7-9.

Biblia esalelaka mpe maloba “mokolo ya kosambisama” mpo na kolobela mokolo oyo nsuka ya mokili oyo ekoya. Mokolo yango ya kosambisama ekoya na mbalakaka ndenge esalemaki na Mpela ya Noa, oyo ekɔmbɔlaki bato nyonso ya mabe ya ntango wana. Likambo ya esengo ezali ete kobebisama ya “bato oyo batyolaka Nzambe,” oyo ekosalema mosika te ekobongisa esika mpo na libota ya sika ya bato, epai “boyengebene ekozala.”​—Tángá 2 Petro 3:6, 7, 13.