OLINGAKA ETE BOMOI NA YO NA MIKOLO EKOYA EZALA NDENGE NINI? Bato mosusu bakanisaka ete makambo nyonso oyo ekómelaka biso na bomoi eutaka te na makambo oyo toponaka kosala, kasi etángamá bongo. Soki balongi te kokokisa mokano moko oyo bamityelaki, bakanisaka ete ebongisamá kaka bongo. Balobaka: “Etángamá ete ekolonga te!”

Bamosusu balɛmbaka nzoto ntango bamonaka te ndenge ya kokima bampasi mpe kozanga bosembo ya mokili oyo. Ntango mosusu, basalaka nyonso mpo bázala na bomoi ya malamu koleka, kasi makambo lokola bitumba, mobulu, makama oyo ebimaka yango moko, mpe maladi ezongisaka bango nsima. Yango wana, bamitunaka boye: ‘Mpo na nini tozali komona mpasi boye?’

Ya solo, makambo oyo ekómelaka biso na bomoi ekoki kopekisa biso tókokisa makambo oyo tokanaki. (Mosakoli 9:11) Kasi, soki olingi kozala na bomoi ya seko na mikolo ekoya, yo moko nde osengeli kopona. Kutu, Biblia emonisi ete makambo oyo ozali kopona lelo nde ekomonisa soki olingi bomoi ya seko na mikolo ekoya. Talá oyo Biblia elobi.

Moize, mokambi ya bana ya Yisraele ya kala ayebisaki bato ya ekólo yango boye ntango balingaki kokɔta na Mokili ya Ndaka: “Natye mpenza liboso na yo lelo bomoi ná malamu, mpe liwa ná mabe. Nazali mpenza kozwa likoló ná mabele batatoli liboso na bino lelo, ete natye bomoi ná liwa liboso na yo, lipamboli ná elakeli mabe; mpe osengeli kopona bomoi mpo otikala na bomoi, yo ná bana na yo, na kolingáká Yehova Nzambe na yo, koyokáká mongongo na ye mpe kokangamáká na ye.”​—Kolimbola Mibeko 30:15, 19, 20.

“Natye bomoi ná liwa liboso na yo, lipamboli ná elakeli mabe; mpe osengeli kopona bomoi.”​—Kolimbola Mibeko 30:19

Ya solo, Nzambe abimisaki Bayisraele na boombo na Ezipito mpe apesaki bango libaku ya kozala na bonsomi mpe na bomoi ya esengo na Mokili ya Ndaka. Kasi nyonso wana ekokaki koyela bango kaka boye te. Mpo na kozwa mapamboli yango, basengelaki “kopona bomoi.” Ndenge nini? ‘Na kolingáká Nzambe, na koyokáká mongongo na ye mpe na kokangamáká na ye.’

Lelo oyo, biso mpe tosengeli kopona; mpe nzela oyo toponi kolanda nde ekomonisa soki tolingi kozala na bomoi ya seko na mikolo ekoya. Soki oponi kolinga Nzambe, koyoka mongongo na ye, mpe kokangama na ye, ekomonisa ete oponi bomoi: bomoi ya seko na paradiso awa na mabele. Kasi kolinga Nzambe, koyoka mongongo na ye mpe kokangama na ye elimboli nini?

Bolingo ezali ezaleli ya Nzambe oyo eleki monene. Na litambwisi ya elimo santu, ntoma Yoane akomaki: “Nzambe azali bolingo.” (1 Yoane 4:8) Yango wana, ntango batunaki Yesu mobeko nini eleki monene, alobaki: “Osengeli kolinga Yehova Nzambe na yo na motema na yo mobimba mpe na molimo na yo mobimba mpe na makanisi na yo nyonso.” (Matai 22:37) Boyokani malamu na Yehova Nzambe esengeli kosimbama nde na bolingo, kasi te na kobanga to na kotosa kaka mpo na kotosa. Kasi mpo na nini tosengeli kopona kolinga Nzambe?

Bolingo oyo Yehova alingaka bato ezali lokola bolingo oyo baboti balingaka bana na bango. Atako baboti bazali bato ya kozanga kokoka, bateyaka bana na bango, balendisaka bango, basungaka bango, bapesaka bango disiplini, mpo balingi ete bana yango bázala na esengo mpe bákola malamu. Na nsima, baboti bazelaka bana básalela bango nini? Balingaka ete bana bálinga bango mpe bábosana te makambo oyo bateyaki bango mpo na bolamu na bango. Ndenge moko mpe, ebongi mpenza ete Tata na biso ya likoló azala na mposa ete tólinga ye mpo na nyonso oyo asalelá biso!

Na minɔkɔ oyo bakomaki na yango Biblia, mbala mingi liloba “koyoka” epesaka likanisi ya “kotosa.” Yango wana, toyebisaka bana: “Yokelá baboti na yo.” Na yango, koyoka mongongo ya Nzambe elakisi koyekola mpe kotosa makambo oyo alobi. Atako tokoki te koyoka mongongo ya Nzambe ndenge toyokaka mongongo ya moto, ntango totángaka Biblia mpe tosalelaka makambo oyo ezali na kati, tomonisaka ete tozali koyoka ye.​—1 Yoane 5:3.

Mpo na komonisa ntina ya koyoka mongongo ya Nzambe, na libaku moko, Yesu alobaki: “Moto asengeli kobika, kaka na mampa te, kasi na liloba nyonso oyo ezali kobima na monɔkɔ ya Yehova.” (Matai 4:4) Kaka ndenge bilei ezalaka na ntina mingi mpo na nzoto, kozwa boyebi ya Nzambe ezali na ntina mingi koleka. Mpo na nini? Salomo, mokonzi ya bwanya, alobaki boye: “Bwanya ebatelaka ndenge mpe mbongo ebatelaka; kasi litomba ya boyebi ezali ete bwanya ebatelaka na bomoi baoyo bazali na yango.” (Mosakoli 7:12) Boyebi mpe bwanya ya Nzambe ekoki kobatela biso lelo mpe kosalisa biso tópona nzela oyo ekomema biso na bomoi ya seko na mikolo ekoya.

Kanisá ndakisa ya Yesu oyo tolobelaki na lisolo oyo eleki; alobaki: “Bókɔta na porte ya moke; mpamba te nzela ya monene mpe oyo efungwamá nde oyo ememaka na libebi, mpe bato oyo bazali kokɔta kuna bazali mingi.” (Matai 7:13, 14) Mpo na kotambola malamu na nzela ya ndenge wana mpe kokóma na esika oyo tozali kokende, elingi koloba kozwa bomoi ya seko, tosengeli kotambola elongo na motambwisi oyo ayebi nzela malamu mpe kokangama na ye. Yango wana, ezali na ntina mingi tókangama na Nzambe. (Nzembo 16:8) Kasi, ndenge nini tokosala yango?

Mokolo na mokolo, ezali na makambo mingi oyo tosengeli kosala mpe makambo mosusu mingi oyo tolingaka kosala. Makambo yango ekoki kozangisa biso ntango to kolongola likebi na biso mpo tózala na ntango mingi te to tózanga ntango ya kokanisa makambo oyo Nzambe alingi tósala. Yango wana, Biblia ekundweli biso maloba oyo: “Bókeba mpenza ete ndenge na bino ya kotambola ezala te lokola bato bazangá bwanya kasi lokola bato ya bwanya, bómisombela ntango oyo ebongi, mpo mikolo ezali mabe.” (Baefese 5:15, 16) Soki totye boyokani na biso na Nzambe na esika ya liboso na bomoi na biso, tokokangama na ye.​—Matai 6:33.

Atako okoki te kobongola bomoi na yo ya kala, ezali na makambo oyo okoki kosala mpo yo ná bato oyo olingaka bózala na bomoi ya malamu na mikolo ekoya. Biblia emonisi ete Yehova Nzambe, Tata na biso ya likoló, alingaka biso mingi mpe ayebisaka biso makambo oyo alingaka tósala. Talá makambo oyo mosakoli Mika alobaki:

“Ee yo moto ya mabele, ye ayebisi yo oyo ezali malamu. Mpe eloko nini Yehova azali kosɛnga yo, soki bobele komonisa bosembo, kolinga boboto mpe kotambola na bopɔlɔ elongo na Nzambe na yo?”​—Mika 6:8.

Okondima libyangi ya Yehova ya kotambola elongo na ye mpo na kozwa mapamboli ya seko oyo abombeli bato oyo batambolaka elongo na ye? Yo nde osengeli kopona!