MPO NA BILENGE
9: Komiyeba
YANGO ELIMBOLI NINI?
Komiyeba esuki kaka te na koyeba nkombo na yo mpe ndenge oyo ozali komonana. Etaleli mpe bizaleli na yo, makambo oyo ondimaka, mpe bomoto na yo. Mpo na koloba solo, komiyeba elimboli koyeba makambo nyonso oyo ekesenisaka yo na bato mosusu, ezala na kati to libándá.
MPO NA NINI EZALI NA NTINA?
Soki omiyebi malamu, okokangama na bindimeli na yo, na esika ya kotika baninga bátambwisa bomoi na yo.
“Bato mingi bazalaka lokola ekeko oyo balatisi bilamba oyo tomonaka na magazini. Bango moko baponaka te bilamba oyo balataka; basusu nde baponelaka bango.”—Adrian.
“Nayekolá kosala makambo oyo ezali malamu, ata soki kosala bongo ezali pɛtɛɛ te. Nayebaka banani bazali baninga ya malamu, na makambo oyo basalaka, mpe na makambo oyo ngai nasalaka elongo na bango.”—Courtney.
TOLI YA BIBLIA: “Bótika kolanda makambo ya ntango oyo, kasi bóbongwana, bókómisa makanisi na bino makanisi ya sika.”—Baroma 12:2.
OYO OKOKI KOSALA
Talelá makasi na yo, bolɛmbu na yo, mpe makambo oyo ondimaka mpo na koyeba ndenge oyo ozali lelo mpe ndenge oyo olingi kokóma. Lolenge malamu ya kobanda ezali koyanola na mituna oyo elandi.
Makasi: Makoki nini mpe mayele nini nazali na yango? Makambo nini nasalaka malamu mingi? (Na ndakisa: natosaka ngonga? namipekisaka? nazalaka makasi na mosala? nakabaka?) Makambo nini ya malamu nasalaka?
TOLI: Ozali na mokakatano mpo na koyeba makambo nini ya malamu osalaki to olobaki? Tuná moboti na yo to moninga moko ya motema ayebisa yo bizaleli ya malamu oyo amonaka epai na yo mpe ntina oyo alobi bongo.
TOLI YA BIBLIA: “Moto na moto ameka mosala na ye moko ndenge ezali, bongo akozwa likambo ya komikumisa na yango mpo na ye moko, kasi mpo azali komikokanisa na moto mosusu te.”—Bagalatia 6:4.
Bolɛmbu: Makambo nini namonaka ete nasengeli kobongisa? Ntango nini namonaka ete namekamaka mpo na kosala likambo moko ya mabe? Na makambo nini nasengeli komonisa ezaleli ya komipekisa mingi?
TOLI YA BIBLIA: “Soki tolobi ete: ‘Tozali na lisumu te,’ tozali komikosa.”—1 Yoane 1:8.
Makambo oyo ondimaka: Batoli nini etali bizaleli malamu nasengeli kolanda, mpe mpo na nini? Nandimelaka Nzambe? Nini endimisaka ngai ete Nzambe azali? Makambo nini namonaka ete ezali sembo te, mpe mpo na nini? Makambo nini nandimaka ete ekosalema na mikolo ekoya?
TOLI YA BIBLIA: “Likoki ya kokanisa ekokɛngɛla yo, bososoli ekobatela yo.”—Masese 2:11.
Talá mpe...
BIYANO NA MITUNA 10 OYO BILENGE BATUNAKA
Nazali nani?
Koyeba makambo oyo ondimaka, oyo osalaka malamu, oyo osalaka malamu te, mpe mikano na yo ekosalisa yo ozwa bikateli ya malamu ntango bazali kotya yo mbamba.
MITUNA OYO BILENGE BATUNAKA
Ndenge nini nakoki kopona moto oyo azali ndakisa malamu ya komekola?
Moto oyo azali ndakisa malamu ya komekola akoki kosalisa yo okima mikakatano, okokisa mikano na yo mpe olonga na bomoi. Kasi okomekola nani?
