LISOLO YA TITRE YA EZIPELI | OYEBAKA ETE EZALI MISALA YA BADEMO?
Misala ya bademo ekómi kobenda likebi ya bato!
“Liboso, bafilme ezalaki kolobela ba-vampire, bilima to bazombi kasi sikoyo ekómi nde kolobela ndenge bademo bakɔtelaka bato mpe ndenge bato babenganaka bademo na nzela ya mabondeli.”—The Wall Street Journal.
BABUKU, bafilme mpe masano ya video ekómi kolobela mingi bato ya maji, ezala bana to mikóló, basi ya kitoko oyo bazali bandɔki mpe ba-vampire ya kitoko. Mpo na nini ekómi bongo?
Claude Fischer, profesɛrɛ moko ya sosioloji akomaki boye: “Na bambula oyo euti koleka, bato moke ya Amerika (1/10) bazalaki kondima ete bilima bazalaka, kasi sikoyo mingi na bango (1/3) bakómi kondima likambo yango. Motángo ya bilenge oyo balobi ete bakɔtaki ndako ya nganga, bandimaka ete bilima bazalaka mpe bandako ya bilima ezalaka, eleki na mbala mibale motángo ya mikóló oyo balobi mpe bongo.”
Yango wana tokoki kokamwa te soki masolo etali bilimo mabe oyo bakɔtaka na nzoto ya bato ezongi lisusu makasi. Michael Calia akomaki boye na zulunalo The Wall Street Journal: “Soki masolo ya bademo oyo bakɔtelaka bato ekómi kolobelama mingi ezali mpo na bambula oyo eleká, bato bazalaki kobɛta mingi masolo ya bazombi, bilima mpe ba-vampire.”
Lapolo moko elobi ete “na mokili mobimba, bato mingi (25 tii 50%) bandimaka ete bilima bazalaka mpe na bamboka mingi batyaka bafɔtɔ ya bilima na babuku na bango.” Na États-Unis, ankɛtɛ oyo baprofesɛrɛ mibale ya sosioloji basalaki, Christopher Bader ná Carson Mencken “emonisaki ete bato mingi ya Amerika (70 tii 80%) bandimaka mpenza ete ezali na makambo mosusu oyo esalemaka na ndenge ya bomoto te.”
Koluka koyeba misala ya bilimo mabe to makambo oyo esalemaka na ndenge ya bomoto te, ezali kaka lisano?
