YO MOKO OMONAKA ETE OZALAKA MOTO YA ESENGO? Soki ezali bongo, nini epesaka yo esengo yango? Libota na yo, mosala na yo, to bindimeli ya lingomba na yo? Mbala mosusu ozali kozela likambo moko oyo ekopesa yo esengo, na ndakisa kosilisa kelasi, kozwa mosala ya malamu, to kosomba vuatire ya sika.

Bato mingi bayokaka esengo soki bakokisi mokano moko oyo bamityelaki to bazwi eloko moko oyo bazalaki na mposa na yango. Kasi esengo yango eumelaka ntango boni? Mbala mingi, eumelaka mingi te, mpe koyeba bongo ekoki kolɛmbisa nzoto.

Moto azalaka na esengo ntango azali komiyoka malamu, ntango azali kosepela na bomoi ata soki azali na biloko mingi te, mpe ntango alingi kokoba kozala na bomoi.

Lisusu, lokola moto azalaka na esengo na ntango azali komiyoka malamu, tokoki kokokanisa esengo na mobembo, kasi te na esika oyo moto akómi to na mokano oyo akokisi. Na yango, koloba ete: “Nakozala na esengo soki . . .” ezali lokola kopusa esengo mosika.

Na ndakisa: tókokanisa esengo ná kozala na sante malamu. Tosalaka nini mpo tózala na sante malamu? Esɛngaka tólyaka malamu, tósalaka mwa ngalasisi, mpe tózala na bokatikati na bomoi. Ndenge moko mpe, esengo eutaka nde na makambo ya malamu oyo tosalaka na bomoi mpe na ndenge oyo tosalelaka batoli oyo ebongi.

Batoli nini to bomoi ya ndenge nini epesaka esengo? Atako batoli mosusu ezali na ntina mingi koleka mosusu, batoli mpe bizaleli oyo elandi esalisaka mingi:

• KOSEPELA NA OYO OZALI NA YANGO MPE KOKABA

• KOZALA NA SANTE MALAMU MPE KOYEBA KOKANGA MOTEMA

• BOLINGO

• KOLIMBISA

• KOZALA NA BOMOI OYO EZALI NA NTINA

• ELIKYA

Buku moko oyo etondi na bwanya elobi: “Esengo na bato oyo bazangi mbeba na nzela na bango.” (Nzembo 119:1) Sikoyo, tótalela makambo oyo epesaka esengo.