SEICHE ekoki kobongola langi ya nzoto na yango mpo na komibomba na ndenge oyo ata liso ya moto ekoki komona yango te. Lapolo moko emonisi ete mwa nyama yango “eyebani mpo na makambo ndenge na ndenge oyo esalamaka na nzoto na yango mpe makambo yango ekoki kobongwana na mbala moko.” Makambo yango esalemaka ndenge nini?

Tókanisa naino: Mwa nyama yango esalelaka lolenge moko ya baselile oyo ezalaka na nse ya loposo na yango mpo na kobongola langi na yango. Baselile yango ezalaka na mwa baposhɛ oyo etondá na biloko oyo epesaka langi mpe ezingamá na misisa mikemike. Soki mwa nyama yango elingi komibomba, bɔɔngɔ na yango esalaka ete misisa oyo ezingi baposhɛ yango ekóma moke. Na nsima, baposhɛ yango mpe biloko oyo ezali na kati na yango oyo epesaka langi efungwamaka mpe nokinoki mwa nyama yango ebongolaka langi mpe nzoto na yango. Mwa nyama yango esalelaka likoki yango kaka te mpo na komibomba kasi mpe mpo na oyo ya mobali abenda ya mwasi mpe oyo ya mwasi abenda ya mobli to mpe mpo na kosolola.

Ba-ingénieur ya iniversite ya Bristol na Angleterre basali mposo moko lokola ya seiche. Bakɔtisaki badiskɛ ya ndembo ya moindo (caoutchouc) na katikati ya baaparɛyi moko ya mike oyo esalaka lokola misisa ya mwa nyama yango. Ntango batyaki kura na mposo yango, baaparɛyi yango efinanaki mpe efungolaki badiskɛ yango, eyindaki mpe ebongolaki langi ya mposo yango.

Ingénieur Jonathan Rossiter alobi ete bolukiluki oyo bazali kosala na misisa ya mwa nyama yango, oyo ezali na kati ya “biloko oyo Nzambe akelá, oyo ezali malamu mpenza mpo na komekola,” ekoki kosalisa biso tóbimisa bilamba oyo na basɛgondɛ ekoki kobongolaka balangi na yango. Rossiter alobi ete bato bakoki kolata bilamba yango mpo na komibomba to kaka mpo na monzɛlɛ.

Okanisi nini? Likoki oyo nzoto ya mwa nyama babengi seiche ezalaka na yango ya kobongola balangi ebimá kaka yango moko to basalaki yango kosala?