Petro ayokaki toli oyo Yesu apesaki mpo na kosilisa matata oyo ebimi kati na bandeko. Kasi, emonani ete alingi koyeba soki mbala boni mpenza moto asengeli kolimbisa ndeko na ye.

Petro atuni: “Nkolo, mbala boni ndeko na ngai akosalela ngai lisumu mpe ngai nakolimbisa ye? Tii mbala nsambo?” Bakonzi mosusu ya mangomba balobaka ete moto asengeli kolimbisa tii mbala misato. Yango wana, mbala mosusu Petro akanisi ete ye akomonisa boboto mingi soki alimbisi ndeko moko “tii mbala nsambo.”​—Matai 18:21.

Nzokande, likanisi ya kotánga mabunga ya basusu eyokani te na likambo oyo Yesu alingi koteya. Bongo Yesu asemboli Petro na maloba oyo: “Nalobi na yo te: Tii mbala nsambo, kasi: Tii mbala ntuku nsambo na nsambo.” (Matai 18:22) Na maloba mosusu, esengeli kolimbisa ntango nyonso. Petro asengeli te kokata mbala boni akolimbisa ndeko na ye.

Na nsima, mpo na komonisa Petro mpe bato mosusu ete basengeli kolimbisaka, Yesu apesi bango ndakisa moko. Ndakisa yango elobeli moombo oyo amekoli te motema mawa ya nkolo na ye. Mokonzi yango asɛngi baombo na ye báfuta nyongo na bango. Bamemeli ye moombo moko oyo azali na nyongo ya monene, ya talanta 10 000 [to denari milio 60]. Kasi azali na likoki ya kofuta yango te. Bongo mokonzi apesi mitindo ete bátɛka ye, mwasi na ye, mpe bana na bango, mpo nyongo na ye efutama. Ntango moombo yango ayoki bongo, afukameli nkolo na ye mpe abondeli ye: “Pesá ngai ntango mpe nakofuta yo nyonso.”​—Matai 18:26.

Mokonzi yango ayoki mawa mpe alimbisi nyongo monene oyo moombo yango azalaki na yango. Na nsima, moombo yango abimi mpe akutani na moninga na ye moombo oyo azali na nyongo na ye ya denari 100. Akangi moninga na ye moombo mpe abandi kofina ye nkingo mpe koloba na  ye: “Futá nyongo na ngai nyonso.” Kasi moninga yango afukameli ye mpe abondeli ye: “Pesá ngai ntango mpe nakofuta yo.” (Matai 18:28, 29) Kasi, moombo oyo mokonzi alimbisaki ye nyongo amekoli nkolo na ye te. Azwi moninga na ye moombo, oyo azali na nyongo na ye ya moke, abwaki ye na bolɔkɔ tii akofuta ye nyongo na ye.

Na nsima, Yesu alobi ete ntango baombo mosusu bamoni ete moombo wana azali na mawa te, bakei koyebisa nkolo na bango; nkolo yango asiliki, abengi moombo yango mpe alobi na ye: “Moombo mabe, nalimbisaki nyongo na yo nyonso, ntango obondelaki ngai. Yo mpe osengelaki te koyokela moninga na yo moombo mawa, ndenge ngai mpe nayokelaki yo mawa?” Mokonzi apesi moombo oyo aboyaki kolimbisa moninga na mabɔkɔ ya bakɛngɛli ya bolɔkɔ, tii ntango akofuta nyongo na ye nyonso. Yesu asukisi na maloba oyo: “Tata na ngai ya likoló akosala bino mpe bongo soki mokomoko na bino azali kolimbisa ndeko na ye na motema mobimba te.”​—Matai 18:32-35.

Yango esengeli mpenza koteya biso ete tosengeli kolimbisaka basusu! Nzambe alimbisi biso nyongo moko monene: lisumu. Libunga nyonso oyo ndeko na biso akoki kosalela biso ezali moke mpenza. Lisusu, Yehova alimbisi kaka mbala moko te, kasi alimbisaka biso mbala ebele mpenza. Biso mpe tosengeli kolimbisa ndeko na biso mbala na mbala, ata soki tozali mpenza na likambo ya komilela na yango. Ndenge Yesu ateyaki yango na Lisolo likoló ya Ngomba, Nzambe ‘akolimbisa biso banyongo na biso, ndenge biso mpe tolimbisaka bato oyo bazali na nyongo na biso.’​—Matai 6:12.