MAKOMAMI Mosantu elobi ete: “Moyengebene​—na kondima akozala na bomoi.” (Baroma 1:17) Maloba wana ezali na elikya moko malamu mpenza oyo etali yo. Na ndenge nini?

Nsima ya kosilisa mosala na ye awa na mabele, Yesu Masiya amataki na likoló epai ya Nzambe. Wana bayekoli na ye bazalaki kotala ye, “atombwamaki mpe lipata ezipaki ye na miso na bango.” (Misala 1:9) Kuna na likoló, Nzambe atyaki ye Mokonzi ya nguya. Etikali moke, Yesu, “Mwana ya moto,” aya “na nkembo na ye mpe baanzelu nyonso elongo na ye, bongo akofanda na kiti na ye ya bokonzi ya nkembo. Mpe bikólo nyonso bakoyangana liboso na ye, mpe akokabola bato, mosusu epai oyo mosusu epai oyo, ndenge mobateli ya mpate akabolaka bampate ná bantaba.” (Matai 25:31, 32) Yango ekosalema ntango nini?

Makomami Mosantu esakolaki ete ekozala na eleko moko oyo mokili mobimba ekozala na yikiyiki, mpe yango ekozala elembo oyo ekomonisa ete ntango oyo Masiya akosambisa mabota ekómi pene. Yesu ayebisaki makambo oyo ekomonisa elembo yango: “Ekólo ekobunda na ekólo, mpe bokonzi ekobunda na bokonzi; mpe mabele ekoningana makasi na bisika ndenge na ndenge, mpe bamaladi mabe mpe nzala ekozala bisika ndenge na ndenge; makambo ya nsɔmɔ ekomonana.”​—Luka 21:7, 10, 11.

Lelo oyo, tokoki komona ndenge maloba wana ya Yesu ezali kokokisama. Mosika te, Yesu akoya koboma bato mabe. Nsukansuka, ata Satana mpe akobomama! Mabele mobimba ekokóma paradiso. Bato nyonso bakozala na kimya bango na bango mpe bango ná banyama. “Mbwa ya zamba ekofanda elongo na mwana-mpate, mpe nkoi ekolala esika moko na mwana-ntaba, mpe mwana-ngɔmbɛ ná mwana-nkɔsi oyo nkingo etondi na nsuki ná nyama oyo eleisami malamu, yango nyonso esika moko; mpe mwana moke ya mobali akokamba yango. Bakosala eloko moko te ya mabe mpe bakobebisa eloko moko te.” (Yisaya 11:6, 9) “Moto moko te oyo afandi kuna akoloba: ‘Nazali na maladi.’ . . . Na ntango yango miso ya bato oyo bakufá miso ekofungwama, mpe matoi ya bato oyo bakufá matoi ekofungwama.” (Yisaya 33:24; 35:5) Ata bato oyo bakufá bakosekwisama. “Yehova akopangwisa mpenza mpisoli na bilongi nyonso” mpe “liwa ekozala lisusu te, ná lilaka ná koganga ná mpasi ekozala lisusu mpe te.” (Yisaya 25:8; Emoniseli 21:4) Na ntango yango, mokano oyo Nzambe azalaki na yango na ebandeli mpo na mabele ekokokisama. Oyo nde elikya malamu!

Bato ya lolenge nini Nzambe akopesa bango likabo ya bomoi na Paradiso? Bato oyo bazali na kondima ya solosolo!

Kobosana te ete kondima ya solosolo eutaka na boyebi ya sikisiki ya Liloba ya Nzambe. Yango wana, kobá koyekola mpo na koyeba Nzambe mpe Yesu malamumalamu!

Kondima ya solosolo emonanaka na misala ya boyengebene. Liloba ya Nzambe elobi: “Kondima oyo ezali na misala te ekufi.” (Yakobo 2:26) Soki ozali kosala misala yango ya malamu, okomonisa  ete ozali na bizaleli oyo ya Nzambe: nguya, bosembo, bwanya, mpe bolingo. Kobá kosala makasi mpo na kokolisa bizaleli wana ya malamu!

Soki ozali na kondima ya solosolo, okozwa mapamboli mingi. Yango nde ekosalisa yo ozala na bomoi ya esengo, sikoyo mpe libela na libela!