Mokapo ya zomi na misato

Ebele ya bato liboso ya kiti ya bokonzi ya Yehova

1. (a) Yambo ete basaleli ya Nzambe ya liboso ya ntango ya boklisto to ba 144000 bázwa lifuti na bango, nini esengeli kokómela bango? (b) “Ebele ya bato” oyo bazali na bomoi lelo oyo bakoki kozwa nini?

 BANDA Abele tii Yoane Mobatisi, basaleli ya Nzambe ya sembo batyaki mokumba ya kosala mokano ya Nzambe na esika ya liboso na bomoi na bango. Kasi, bango nyonso bakufá, bazali kozela lisekwa mpo na kozala na bomoi awa na mabele na mokili ya sika ya Nzambe. Bato 144000 oyo bakoyangela elongo na Klisto na Bokonzi ya Nzambe na likoló, basengeli mpe kokufa liboso ya kozwa lifuti na bango. Kasi, Emoniseli 7:9 ezali komonisa ete na mikolo oyo ya nsuka, ekozala na “ebele ya bato” ya mabota nyonso oyo bakokufa te kasi bakozwa libaku ya kozala na bomoi ya seko awa na mabele. Ozali na kati ya bato yango?

Ebele ya bato yango bazali banani?

2. Nini epesi nzela na koyeba polele soki ebele ya bato oyo balobelami na Emoniseli 7:9 bazali banani?

² Na 1923, basaleli ya Yehova basosolaki ete “bampate” ya lisese ya Yesu oyo ezali na Matai 25:31-46 mpe “bampate mosusu” oyo alobelaki na Yoane 10:16 ezali bato oyo bakozwa libaku ya kozala na bomoi ya seko awa na mabele. Na 1931 batalelaki mpe bato oyo balobelami na Ezekiele 9:1-11 ete bazali kotyama elembo na bilongi na bango lokola baoyo bakozwa bomoi ya seko awa na mabele. Bongo na 1935, bakangaki ntina ete ebele ya bato yango bazali eteni moko  ya bampate mosusu oyo Yesu alobelaki. Lelo oyo, ebele ya bato yango bakómi bamilio.

3. Mpo na nini elobeli “batɛlɛmi liboso ya kiti ya bokonzi” ezali komonisa te ete bato yango bakokende na likoló?

³ Na Emoniseli 7:9, ebele ya bato yango bamonani ete bazali na likoló te. Ata ndenge “batɛlɛmi liboso ya kiti ya bokonzi” ya Nzambe, yango esɛngi na bango te ete bázala na likoló. Elingi kaka koloba ete Nzambe azali komona bango. (Nzembo 11:4) Likambo oyo emonisi ete ebele ya bato yango, “oyo ata moto moko te akokaki kotánga,” bazali etuluku oyo ekokende na likoló te oyo emonani polele soki tokokanisi motángo na bango oyo eyebani te na oyo ekomami na Emoniseli 7:4-8 mpe Emoniseli 14:1-4. Kuna, motángo ya bato oyo bakamatami na mabele mpo na kokende na likoló emonisami ete ezali 144000.

4. (a) “Bolɔzi monene” oyo ebele ya bato yango bakobika na yango ezali nini? (b) Lokola elobelami na Emoniseli 7:11, 12, banani bazali kotala ebele ya bato yango mpe basangani na bango na losambo?

⁴ Emoniseli 7:14 elobi mpo na ebele ya bato yango ete: “Bango bazali bato oyo bauti na bolɔzi monene.” Bakobika na ntango ya mpasi ya nsɔmɔ oyo bato bamoná naino te na lisolo mobimba ya bato. (Matai 24:21) Ntango bakoloba na botɔndi nyonso ete lobiko na bango euti na Nzambe mpe na Klisto, na nsima bikelamu nyonso ya likoló bakosangana na bango mpe bakoloba ete: “Amen! Lipamboli mpe nkembo mpe bwanya mpe matɔndi mpe lokumu mpe nguya mpe makasi ezala na Nzambe na biso libela na libela seko. Amen.”​—Emoniseli 7:11, 12.

Basengeli komonisa ete babongi na kobika

5. Ndenge nini tokoki koluka koyeba nini esɛngami mpo na kozala kati na ebele ya bato yango?

⁵ Ebele ya bato yango bakobika na bolɔzi monene na  boyokani na mitinda ya boyengebene ya Yehova. Bizaleli mpo na koyeba baoyo bakobika elobelami polele na kati ya Biblia. Yango wana, bapesi bato oyo balingaka boyengebene likoki ya komitambwisa na lolenge oyo ekomonisa ete babongi mpo na kobika. Bato yango basengeli kosala nini?

6. Mpo na nini ebongi mpenza kokokanisa ebele ya bato yango na bampate?

⁶ Bampate bazalaka na boboto mpe na botosi. Yango wana, ntango Yesu alobaki ete azali na bampate mosusu oyo bazali na kati ya etuluku ya baoyo bakokenda na likoló te, alingaki kolobela kaka te bato oyo balingi kozala na bomoi ya seko awa na mabele, kasi mpe baoyo bakolinga kotosa mateya na ye. Yesu alobaki ete: “Bampate na ngai bayokaka mongongo na ngai, mpe nayebi bango, mpe balandaka ngai.” (Yoane 10:16, 27) Bazali bato oyo bayokaka mpe batosaka mpenza oyo Yesu azali koloba, mpe bazali kokóma bayekoli na ye.

7. Bizaleli nini bayekoli ya Yesu basengeli kolona?

⁷ Bizaleli mosusu nini mokomoko ya bayekoli yango ya Yesu asengeli kolona? Liloba ya Nzambe eyanoli ete: “Bosengeli kolongola bomoto ya kala oyo eyokani na etamboli na bino ya liboso mpe . . . bosengeli kolata bomoto ya sika oyo ezalisamaki engebene mokano ya Nzambe na kati ya boyengebene ya solosolo mpe bosembo.” (Baefese 4:22-24) Bazali kolona bizaleli oyo ekolisaka bomoko ya basaleli ya Nzambe​—“bolingo, esengo, kimya, motema molai, motema malamu, bolamu, kondima, boboto, komipekisa.”​—Bagalatia 5:22, 23.

8. Ebele ya bato yango bakokutana na nini lokola bazali kopesa batikali mabɔkɔ?

⁸ Ebele ya bato yango bazali kopesa mabɔkɔ na bato moke baoyo bazali na elikya ya bomoi na likoló, oyo bazali kotambwisa  mosala ya kosakola. (Matai 24:14; 25:40) Bampate mosusu bazali kopesa mabɔkɔ na mosala yango atako bayebi ete bakokutana na mitungisi, mpamba te na ebandeli ya mikolo oyo ya nsuka, Klisto Yesu na baanzelu na ye babenganaki Satana na bademo na ye na likoló. Yango elimbolaki “mawa na mabele . . . mpamba te Zabolo akiteli bino, azali na nkanda makasi, mpo ayebi ete azali na eleko moko ya ntango mokuse.” (Emoniseli 12:7-12) Yango wana, Satana azali kobakisela basaleli ya Nzambe mitungisi lokola nsuka ya ebongiseli ya makambo ya ntango oyo ekómi pene.

9. Basaleli ya Nzambe bazali solo kolonga na mosala ya kosakola nsango malamu, mpe mpo na nini?

 ⁹ Atako mitungisi makasi ezali, mosala ya kosakola ezali kokenda se liboso. Kobanda na mwa bankóto ya basakoli ya Bokonzi na nsuka ya Etumba ya Liboso ya mokili mobimba, bakómi sikawa bamilio, mpamba te Yehova alakaki ete: “Ebundeli na ebundeli oyo esalemi mpo na kotɛmɛla yo ekolonga te.” (Yisaya 54:17) Kutu moto moko ya tribinale monene ya Bayuda andimaki ete mosala ya Nzambe ekoki kokweisama te. Ayebisaki Bafalisai na ekeke ya liboso mpo na bayekoli ete: “Bótika bango; (mpamba te, soki mwango wana to mosala wana euti na bato, ekokweisama; kasi soki euti na Nzambe, bokokoka kokweisa bango te;) soki boye te, bokoya mbala mosusu komona ete bozali bato oyo bazali mpenza kobunda na Nzambe.”​—Misala 5:38, 39.

10. (a) “Elembo” oyo etyami likoló ya ebele ya bato yango elimboli nini? (b) Ndenge nini basaleli ya Nzambe bazali kotosa “mongongo . . . euti na likoló”?

¹⁰ Ebele ya bato yango bamonisami ete batyami elembo mpo na kobika. (Ezekiele 9:4-6) “Elembo” ezali elembeteli oyo ezali komonisa ete bamipesi na Yehova, babatisami lokola bayekoli ya Yesu, mpe bazali kosala makasi mpo na kolona bomoto lokola oyo ya Klisto. Bazali kotosa “mongongo . . . euti na likoló” oyo ezali kolobela lisangani ya mangomba ya lokuta ya Satana na mokili mobimba ete: “Bóbima na kati na ye, bato ya ekólo na ngai, soki bolingi te kosangana na ye na masumu na ye, mpe soki bolingi te kozwa ndambo ya malɔzi na ye.”​—Emoniseli 18:1-5.

11. Wapi lolenge eleki ntina oyo ebele ya bato yango bamonisaka ete bazali mpenza basaleli ya Yehova?

¹¹ Yesu ayebisaki mpe bayekoli na ye ete: “Na ndenge wana bato nyonso bakoyeba ete bozali bayekoli na ngai, soki bozali na bolingo kati na bino.” (Yoane 13:35) Nzokande, na ntango ya bitumba, bandimi ya mangomba ya mokili babomaka  bato ya lingomba na bango moko, mbala mingi kaka mpo bakeseni bikólo! Liloba ya Nzambe elobi ete: “Bana ya Nzambe na bana ya Zabolo bayebanaka na likambo oyo: Moto nyonso oyo azalaka na momeseno ya kosala boyengebene te auti na Nzambe te, ndenge moko mpe moto oyo azali te kolinga ndeko na ye . . . Tólinganaka; ezala te lokola Kaina, oyo autaki na moto mabe mpe abomaki ndeko na ye.”​—1 Yoane 3:10-12.

12. Na ntango ya bolɔzi monene, Yehova akosala nini na ‘nzete’ ya mangomba oyo ezali kobota mbuma ezangá ntina?

¹² Yesu alobaki ete: “Nzete nyonso ya malamu ebotaka mbuma ya malamu, kasi nzete nyonso oyo epɔlá ebotaka mbuma oyo ezangá ntina; nzete ya malamu ekoki te kobota mbuma oyo ezangá ntina, nzete oyo epɔlá mpe ekoki kobota mbuma ya malamu te. Nzete nyonso oyo ebotaka mbuma ya malamu te ekatamaka mpe ebwakamaka na mɔtɔ. Boye, ya solo mpenza, bokoyeba bato wana na bambuma na bango.” (Matai 7:17-20) Mbuma oyo mangomba ya mokili eboti ezali komonisa ete bazali ‘nzete’ oyo epɔlá, oyo etikali moke Yehova akata yango na ntango ya bolɔzi monene.​—Emoniseli 17:16.

13. Ndenge nini ebele ya bato yango bazali komonisa ete bazali na bomoko mpenza ndenge “batɛlɛmi liboso ya kiti ya bokonzi” ya Yehova?

¹³ Emoniseli 7:9-15 ebendi likebi na makambo oyo ekobikisa ebele ya bato yango. Bamonisi bango ete bazali mpenza na bomoko, “batɛlɛmi liboso ya kiti ya bokonzi” ya Yehova, bazali kosimba boyangeli na ye ya molɔ́ngɔ́ mobimba. “Basukoli bazambala na bango mpe bakómisi yango mpɛmbɛ na kati ya makila ya Mwana-Mpate,” bazali komonisa ete bandimi mbeka oyo Yesu apesaki mpo na kosikola bango na masumu. (Yoane 1:29) Basili komipesa na Nzambe mpe bamonisi yango na batisimo, ntango bazindisaki bango na mai. Yango wana, bazali pɛto liboso ya Nzambe,  ndenge emonisami na elilingi ya bazambala ya mpɛmbɛ oyo balati, mpe bazali kosalela ye “mosala mosantu butu moi.” Ezali na makambo mosusu oyo okoki kosala mpo na koyokanisa bomoi na yo malamu koleka na ndenge oyo elobelami awa?

Bazali kozwa matomba sikoyo

14. Tángá mwa matomba oyo ekokani na mosusu te oyo basaleli ya Yehova bazali kozwa sikoyo.

¹⁴ Mbala mosusu osilá komona matomba oyo ekokani na mosusu te oyo bato oyo bazali kosalela Yehova bazali kozwa. Na ndakisa, ntango oyekolaki mikano ya boyengebene ya Yehova, okangaki ntina ete elikya moko kitoko ezali kozela yo na mikolo oyo ezali koya. Yango wana, sikoyo bomoi na yo ezali mpenza na ntina​—kosalela Nzambe na elikya malamu ya kozwa bomoi ya seko awa na mabele. Ya solo, Mokonzi Yesu Klisto “akomema [ebele ya bato yango] na maziba ya mai ya bomoi.”​—Emoniseli 7:17.

15. Ndenge nini Batatoli ya Yehova bazali kozwa matomba lokola bazali kotosa mitinda ya Biblia oyo etali makambo ya politiki mpe ya bizaleli malamu?

¹⁵ Litomba monene oyo ebele ya bato yango bazali kozwa ezali bongo bolingo, bomoko, mpe boyokani oyo ezali na kati ya basaleli ya Yehova na mokili mobimba. Lokola biso nyonso toleisamaka na mesa kaka moko, biso nyonso totosaka mibeko mpe mitinda kaka moko wana ya Liloba ya Nzambe. Yango wana makambo ya politiki to bolingo ya ekólo ekabolaka biso te. Lisusu, tozali kotosa mitinda ya bizaleli malamu oyo Nzambe azali kosɛnga na basaleli na ye. (1 Bakolinti 6:9-11) Yango wana, na esika ete bázala na matata, bokabwani, mpe bizaleli ya mbindo oyo etondi na mokili oyo, basaleli ya Yehova bazali kosepela na kati ya oyo ekoki kobengama paladiso ya elimo. Talá ndenge Yisaya 65:13, 14 elobeli yango.

16. Atako bakutanaka na mikakatano lokola bato nyonso, ebele ya bato yango bazali na elikya nini?

 ¹⁶ Basaleli ya Yehova bazali bato ya kokoka te. Bakutanaka mpe na mikakatano oyo bato nyonso bakutanaka na yango na bomoi na mokili oyo, na ndakisa bampasi to konyokwama mpe kokufa na ntango ya bitumba kati na bikólo. Babɛlaka mpe banyokwamaka, mpe bakufaka. Kasi bazali na kondima ete na mokili ya sika, Nzambe “akopangwisa mpisoli nyonso na miso na bango, mpe liwa ekozala lisusu te, na mawa na koganga na mpasi ekozala lisusu te.”​—Emoniseli 21:4.

17. Atako likambo nini ekoki kokómela biso sikoyo, makambo nini ya kitoko ezali kozela baoyo basambelaka Nzambe ya solo?

¹⁷ Ata soki okufi sikoyo mpo okómi mobange, mpo na maladi, likama, to minyoko, Yehova akosekwisa yo mpo na kozala na bomoi na Paladiso. (Misala 24:15) Mpe okokoba kosepela na elambo ya elimo na Boyangeli ya Mbula Nkóto ya Klisto. Bolingo na yo mpo na Nzambe ekokola ntango ozali komona mikano na ye ezali kokokisama. Mpe mapamboli oyo Yehova akopesa yo mpo na bokolɔngɔnɔ ya nzoto na yo ekokolisa lisusu bolingo na yo mpo na ye. (Yisaya 25:6-9) Makambo ya kitoko ezali kozela basaleli ya Nzambe mpo na mikolo ezali koya!

Bozongeli

• Likambo nini ya kokamwa Biblia ezali kolobela mpo na ebele ya bato yango?

• Soki tolingi mpenza kozala na kati ya ebele ya bato yango oyo Nzambe andimi, tosengeli kosala nini?

• Mapamboli oyo ebele ya bato yango bazali kozwa mpe oyo bakozwa na mokili ya sika ya Nzambe ezali na ntina nini mpo na yo?

[Mituna ya boyekoli]

[Elilingi na lokasa 123]

Bamilio ya bato bazali kosambela Nzambe ya solo na bomoko