Liteya 4

Ndenge nini koluka koyeba Nzambe

Okoki koyekola koyeba Yehova soki ozali kotánga Biblia. Esili koleka bambula mingi, Nzambe asololaki na bato mpe bato yango bakomaki makambo oyo ye azalaki koloba, bakomaki yango na mokanda. Babengaka mokanda yango Biblia. Lelo oyo, tozali koyekola koyeba Nzambe ntango tozali kotánga Biblia. Babengaka Biblia mpe Liloba ya Nzambe, mpamba te ezali na maloba ya Yehova, to nsango oyo ye atindeli bato. Tosengeli kondima makambo Biblia elobi, mpamba te Yehova akosaka te. “Nzambe akoki kokosa te.” (Baebele 6:18, NW) Liloba ya Nzambe ezali solo.​—Yoane 17:17.

Biblia ezali moko ya makabo malamu oyo Nzambe apesi biso. Ezali lokola mokanda oyo tata oyo alingaka bana na ye mingi atindeli bango. Ezali koyebisa biso ete Nzambe alaki ete akokómisa mabele esika moko kitoko ya kofanda​—paladiso. Ezali koyebisa biso makambo oyo Nzambe asalaki na ntango ya kala, makambo azali kosala sikoyo, mpe makambo akosala na mikolo ezali koya mpo na bana na ye oyo bazali sembo. Esalisaka biso mpe mpo na kosilisa mikakatano na biso mpe kozwa bolamu.​—2 Timote 3:16, 17.

 Batatoli ya Yehova bazali baninga ya Nzambe; bakosalisa yo okanga ntina ya makambo Biblia ezali koteya. Yebisá bango ete olingi koyekola Biblia. Bakofutisa yo mbongo te mpo na koyekola Biblia. (Matai 10:8) Lisusu, okoki koyangana na makita ya boklisto. Makita yango esalemaka na bisika ya losambo oyo babengaka Ndako ya Bokonzi. Soki obandi koyangana na makita ya boklisto, okoyekola koyeba Nzambe noki mpenza.

Okoki koyekola koyeba Nzambe na kotala biloko oyo asalá. Na ndakisa, Biblia elobi ete: “Nzambe azalisaki likoló mpe mokili.” (Genese 1:1) Ntango Yehova azalisaki “likoló,” asalaki moi. Yango ezali mpenza komonisa biso nini mpo na Nzambe? Ezali komonisa biso ete Yehova azali na nguya mingi. Kaka ye nde akoki kosala eloko moko ya nguya lokola moi. Ezali mpe komonisa biso ete Yehova azali na mayele mingi, mpamba te esɛngaki kozala na mayele mpo na kosala moi, oyo epesaka biso molunge mpe engɛngisaka biso mpe ekufaka te.

Biloko Yehova asalá ezali komonisa ete alingaka biso. Kanisá naino mbuma ndenge na ndenge oyo ezali awa na mabele. Yehova akokaki kopesa biso kaka motindo moko ya mbuma​—to kopesa biso ata mbuma moko te. Na esika ete asala bongo, Yehova apesi biso mbuma ndenge na ndenge, ya minene mpe ya mike, mosusu moindo, mosusu motane mpe mbuma yango ezali na elɛngi ndenge moko te. Yango ezali mpenza komonisa ete Yehova azali kaka Nzambe ya bolingo te kasi mpe akabaka mingi, akanisaka basusu mpe azali na boboto mingi.​—Nzembo 104:24.