Mokapo 38

Nakosala nini na bomoi na ngai?

“Liboso, nazalaki komitungisa te mpo na avenire na ngai. Kasi, ntango nakómaki pene ya kosilisa kelasi, namonaki ete etikali moke nabanda bomoi na ngai moko, oyo ekosɛnga ete ngai moko nakóma komilukela.”​—Alex.

KANISÁ ete olingi kokende na mboka moko ya mosika. Na ntembe te, okotala liboso na karte mpo oyeba nzela ya malamu. Ezali mpe bongo ntango ozali kokanisa makambo oyo okosala na bomoi na yo. Michael, elenge mobali moko oyo azali kosala na biro ya filiale moko ya Batatoli ya Yehova, alobi boye: “Makambo ya kopona ezalaka ebele.” Lokola makambo ya kopona ezalaka ebele, ndenge nini okoyeba kopona oyo ya malamu? Michael abakisi boye: “Mikano oyo omityeli nde ekosalisa yo opona malamu.”

Talelá mokano na yo lokola mboka oyo olingi kokende. Okokóma na mboka yango te soki obandi kaka koyengayenga. Ekozala malamu otala naino na karte mpo oyeba nzela nini ekomema yo na mboka yango. Soki osali bongo, okolanda mpenza toli ya Masese 4:26, oyo elobi ete: “Yeisá patatalu nzela ya lokolo na yo.” Bible na lingala ya lelo oyo ebongoli maloba ya vɛrsɛ yango boye: “Kanisáká malamu po na nzela oyo olingi kolanda.”

Na mikolo ezali koya, ekosɛnga ozwa bikateli na makambo mingi ya ntina lokola losambo, mosala, libala, kobota mpe makambo mosusu. Ekozala mpasi te oyeba kopona malamu soki  oyebi liboso epai wapi olingi kokende. Mpe ntango ozali kopona oyo okosala na bomoi na yo, ezali na likambo moko oyo osengeli kobosana te.

“Kanisá Mozalisi na yo”

Mpo na kozala mpenza na esengo, osengeli kolanda maloba oyo ya Mokonzi Salomo: “Kanisá mozalisi wa yo ntango ozali naino elenge.” (Mosakoli 12:1, Liloba lya Nzambe) Na maloba mosusu, makambo nyonso oyo ozali kopona kosala na bomoi na yo, esengeli komonisa ete ozali na mposa ya kosepelisa Nzambe.

Mpo na nini kotya likambo yango na esika ya liboso ezali na ntina mingi? Biblia elobi na Emoniseli 4:11 ete: “Yehova, ɛɛ Nzambe na biso, obongi kozwa nkembo mpe lokumu mpe nguya, mpo yo ozalisaki biloko nyonso, mpe mpo na mokano na yo yango ezalaki mpe ezalisamaki.” Bikelamu nyonso, oyo ezali na likoló mpe awa na mabele esengeli kotɔnda Mozalisi. Opesaka ye matɔndi na ndenge apesá yo “bomoi mpe mpema mpe biloko nyonso”? (Misala 17:25) Omonaka te ete osengeli kosala mwa likambo moko mpo na kopesa Yehova matɔndi mpo na nyonso oyo apesá yo?

 Mpo na kokanisa Mozalisi na bango, bilenge mingi ya Batatoli bákɔta na mosala ya ntango nyonso. Tótalela mwa mabaku ndenge na ndenge ya mosala oyo ezali liboso na yo.

Mosala ya mobongisi-nzela. Babongisi-nzela ya sanza na sanza balekisaka bangonga mingi na mosala ya kosakola. Formasyo oyo bazwaka mpe makambo oyo bakutanaka na yango na mosala ya kosakola esalisaka bango bákóma mpenza koteya Biblia malamu.

Kokende kosakola epai mposa ya basakoli ezali makasi. Babongisi-nzela mosusu bakendaka kosala epai basakoli ya Bokonzi bazali mingi te. Basusu bayekolaka minɔkɔ mosusu mpo na kopesa mabɔkɔ na lisangá moko ya monɔkɔ ya bapaya oyo ezali mosika te na bango to mpe bakendaka na mokili mosusu. a

Mosala ya misionɛrɛ. Babongisi-nzela ya makoki, oyo bazali nzoto kolɔngɔnɔ mpe makasi, bazwaka formasyo mpo na kokende kosakola na mikili mosusu. Mosala ya misionɛrɛ ezali mosala moko oyo esalisaka moto azala na bomoi ya malamu mpe ya esengo.

Mosala ya Betele. Bandeko ya Betele basalaka na babiro ya filiale ya Batatoli ya Yehova. Na mikili mosusu, mosala na bango esɛngaka kobimisa mikanda mpe kotinda yango.

 Mosala ya botongi. Bandeko mosusu bakendaka na mikili mosusu mpo na kotonga Bandako ya Bokonzi, Bandako ya mayangani, mpe babiro ya filiale.

Eteyelo ya Biblia mpo na bandeko mibali minzemba. Bankulutu mpe basaleli na misala ya makoki, oyo bazali minzemba, bazwaka formasyo mpo na koyeba kotambwisa masangá mpe koloba liboso ya bato. Bandeko mosusu oyo bakɔtaka eteyelo yango batindamaka na mikili mosusu.

Bongisá makambo liboso

Mosala ya mobongisi-nzela ezali mokano moko malamu oyo okoki komityela mpe mosala yango epesaka matomba ebele. Kasi esɛngaka kokanisa malamu mpe kobongisa makambo liboso. Na ndakisa, okoki komituna boye: ‘Makoki nini nazali na yango mpe mosala nini nayebi kosala oyo ekosunga ngai?’

Elenge mwasi moko na nkombo Kelly azalaki na mposa mpenza ya kokóma mobongisi-nzela; yango wana akanisaki malamu liboso mpo na mosala oyo akoki kosala. Alobi boye: “Nasengelaki kopona mosala oyo ekobanda kosunga ngai na mosala ya mobongisi-nzela.”

Ntango azalaki naino na eteyelo ya ntei, Kelly ayekolaki mosala moko.  Yango esalisaki ye akokisa mokano oyo amityelaki. Alobi boye: “Kokóma mobongisi-nzela ezalaki mokano na ngai ya libosoliboso. Makambo mosusu nyonso ezalaki na nsima.” Kelly asepelaka mingi na ekateli oyo azwá; alobi boye: “Namonaka ete nazwaki ekateli ya malamu koleka.”

Sɛngáká básalisa yo

Soki ozali kokende na mboka moko oyo okómá naino te, na ntembe te ekokóma na ntango mosusu, oyo ekosɛnga otuna mpo bálakisa yo nzela. Okoki kosala mpe bongo ntango ozali kobongisa makambo oyo okosala na mikolo ezali koya. Tuná makanisi ya bato mosusu. Na Masese 20:18, tozali kotánga boye: “Myango epikamaka makasi na toli.”

Baboti na yo bakoki mpenza kosalisa yo. Kasi okoki mpe koluka toli epai ya bakristo mosusu oyo bakɔmɛlá, elingi koloba  oyo balandaka toli ya Nzambe banda kala. Roberto, elenge mobali ya mbula 27 oyo asalaka na Betele, alobi ete: “Sololá na mikóló oyo bazali ndakisa malamu na lisangá na bino to na masangá mosusu ya zingazinga.”

Koleka bato nyonso, Yehova Nzambe azali na mposa ya kosalisa yo ozwa bikateli oyo ekopesa yo esengo mingi. Na yango, sɛngá ye asalisa yo ‘okoba kososola soki mokano na ye ezali nini’ mpo na bomoi na yo. (Baefese 5:17) Na makambo nyonso okosala na bomoi na yo, landá toli oyo ezali na Masese 3:5, 6, oyo elobi ete: “Tyelá Yehova motema na yo mobimba mpe kondimela mayele na yo moko te. Na banzela na yo nyonso, kanisá ye, mpe ye akosembola banzela na yo.”

Mpo na koyeba makambo mosusu, talá DVD “Les jeunes s’interrogent... Que vais-je faire de ma vie?” Ebimá na minɔkɔ koleka 30

[Maloba na nse ya lokasa]

VƐRSƐ OYO EKOSALISA YO

“‘Bómeka ngai . . . ,’ Yehova ya mampinga alobi bongo, ‘bómona soki nakofungwela bino baporte ya mai ya likoló te mpe soki nakosopela bino lipamboli te kino bosɛnga ekozala lisusu te.’”​—Malaki 3:10.

TOLI

Sololá na bandeko mosusu oyo baumeli mingi na mosala ya ntango nyonso. Luká koyeba mpo na nini baponaki mosala yango mpe mapamboli oyo bazwá.

OYEBAKI YANGO . . . ?

Kura esalaka ete aparɛyi esala. Ndenge moko mpe, elimo santu ya Nzambe ekoki kotinda yo osala makambo mingi na mosala ya Nzambe.​—Misala 1:8.

MAKAMBO OYO NAKOSALA

Mpo nazwa esengo mingi na mosala ya kosakola, nakosolola na ․․․․․

Na mokapo oyo, nakosepela kotuna moboti (baboti) na ngai boye: ․․․․․

OKANISI NINI?

● Mosala nini oyebi malamu?

● Ndenge nini okoki kosalela makoki na yo mpo na kokumisa Yehova?

● Lolenge nini ya mosala ya ntango nyonso oyo balobeli na mokapo oyo esepelisi yo mingi?

[Likanisi ya paragrafe na lokasa 313]

“Nazalaka na limemya makasi mpo na baboti na ngai. Molende na bango na mosala ya kosakola, ndenge bayikaki mpiko na mikakatano ya mbongo, mpe batoli oyo bazalaki kopesa ngai mpo nakóma mobongisi-nzela, esalisaki ngai mingi.”​—Joël

 [Etanda na lokasa 314]

Etanda ya mituna

Mikano na ngai

Tyá elembo na mikano oyo olingi komityela mpe na bisika oyo etikali polele, komá mikano mosusu oyo balobeli awa te mpe yokanisá yango na ndenge oyo olingaka.

Mikano oyo etali mosala ya kosakola

□ Nakobakisa bangonga na mosala ya kosakola mpe nakobanda kosakola ngonga ․․․․․ sanza na sanza

□ Nakokabola mikanda ․․․․․ sanza na sanza

□ Nakosalela Biblia ntango nazali koteya bato

□ Nakozongela bato mbala ․․․․․ sanza na sanza

□ Nakobanda koyekola na moto Biblia

□ Mikano mosusu: ․․․․․

Mikano na oyo etali boyekoli na ngai moko

□ Nakotánga Biblia miniti ․․․․․ mikolo nyonso

□ Nakobongisa makita ya pɔsɔ

□ Nakosala bolukiluki na masolo ya Biblia oyo: ․․․․․

Mikano na oyo etali makambo ya lisangá

□ Nakopesa ata eyano moko na likita nyonso

□ Nakobanda lisolo na ndeko moko ya mokóló oyo nalingi koyeba malamu mpenza

□ Nakokende kotala ndeko moko ya lisangá oyo azali maladi to ebɔsɔnɔ

□ Mikano mosusu: ․․․․․

Komá dati ya lelo ․․․․․

Nsima ya sanza motoba, zongelá liste oyo mpe talá mikano nini okokisi. Okoki kobongola yango lisusu to kobakisa mikano mosusu soki esengeli.

[Elilingi na lokasa 312]

Komityela mikano ekosalisa yo oboma nzoto te kaka mpamba, mpe okobaluka te kaka esika moko