Ndenge ekomami na 1 Bakorinti 6:1-8, ntoma Paulo alobelaki likambo ya bakristo oyo bazalaki kofundana na tribinale. Alobaki ete epesaki ye mawa koyoka ete bakristo mosusu ya Korinti bazalaki “komeka kokende na tribinale liboso ya bato oyo bazangi boyengebene.” (Vɛrsɛ 1) Paulo amonisaki bantina oyo bakristo oyo bazali na matata kati na bango basengeli te komema likambo na bango na tribinale ya mokili, kasi kosilisa yango na kati ya lisangá. Tótalela naino mwa bantina oyo Paulo apesaki toli yango na lisalisi ya elimo ya Nzambe; na nsima tokolobela makambo oyo, mbala mosusu, etalelami te na toli yango.

Ntango tozwani matata ná ndeko moko mpo na makambo ya mombongo, tosengeli liboso koluka kosilisa yango na kolanda toli ya Yehova, kasi te na ndenge na biso moko. (Masese 14:12) Yesu amonisaki ete eleki malamu kosilisa matata nokinoki, liboso makambo eya ndongo. (Matai 5:23-26) Nzokande, ezali mawa ete bakristo mosusu bakómaka mpenza makambo makasi, bamonaka malamu kutu kofunda makambo na tribinale. Paulo alobaki boye: “Ya solo bokwei mpenza kokwea na ndenge bozali kofundana bino na bino na tribinale.” Mpo na nini? Libosoliboso, makambo ya ndenge wana ekoki kobebisa lokumu ya lisangá mpe ya Nzambe na biso. Yango wana, tosengeli kokanisa malamu motuna oyo Paulo atunaki: “Kutu mpo na nini te kondima ete básalela bino mabe?”​—Vɛrsɛ 7.

Lisusu, Paulo amonisaki ete Nzambe atye ebongiseli moko malamu mpenza na kati ya lisangá mpo na kosilisa matata. Bankulutu bazali bakristo oyo bazali na bwanya oyo euti na boyebi ya Biblia, mpe Paulo alobaki ete ‘bakoki kosambisa na kati ya bandeko’ na “makambo ya bomoi oyo.” (Vɛrsɛ 3-5) Yesu amonisaki ete matata oyo ebimi mpo na mabe monene oyo basali moto, na ndakisa babubi ye to bayibi ye, esengeli kosilisama na kolanda matambe misato: ya liboso, bato oyo batalelami na likambo yango basengeli kosala makasi básolola mpo bábongisa; ya mibale, soki bayokani te, bakoki kozwa temwɛ moko to batemwɛ mibale; mpe ya misato, soki esimbi kaka te, bakoki komema likambo yango epai ya bankulutu, oyo bazali bamonisi ya lisangá.​—Matai 18:15-17.

 Ya solo, bankulutu bazali bazuzi to baavoka te, mbala mosusu mpe bazali bato ya mombongo te; bakataka mpe makambo lokola bato wana te. Bango te nde batyaka masɛngami mpo na kosilisa matata oyo ebimi na kati ya bandeko mpo na makambo ya mombongo. Bango balukaka nde kosalisa bandeko oyo bazali na matata bálanda toli ya Biblia mpe básilisa likambo na kimya. Soki likambo ezali mpenza mindɔndɔ, batunaka makanisi epai ya mokɛngɛli ya zongazonga to na biro ya filiale ya Batatoli ya Yehova. Nzokande, ezali mpe na makambo oyo etalelami te na toli ya Paulo. Na ndakisa makambo nini?

Na bantango mosusu, komema likambo na tribinale ezalaka kaka nzela oyo bato bayokani kosalela mpo likambo na bango esila na ndenge ya malamu to mpe nzela oyo esɛngami na mibeko ya Leta, ata soki matata to kobendana ezali te. Na ndakisa, kosamba na tribinale ekoki kozala nzela kaka moko oyo moto akoki koboma libala na ndenge oyo endimami na miso ya Leta, kozwa lotomo ya kotikala na bana, kozala na lotomo ya kozwaka mbongo ya kolya mpe koleisa bana, kozwa mbongo ya asiranse, mpo nkombo na ye ezala na liste ya bato oyo basengeli kofuta bango mbongo ntango kompanyi ekwei, to oyo akoki kozwa ndingisa ya kozwa bozwi to libula oyo mowei atikeli ye. Ezali mpe na makambo oyo ndeko mosusu akoki komona malamu amema yango na tribinale mpo Leta abatela ntomo na ye ntango moto mosusu afundi ye. a

Soki bakristo bamemi makambo ya ndenge wana na tribinale, kasi basali yango na elimo ya kowelana te, ekomonisa te ete balandi te toli oyo Paulo akomaki na lisalisi ya elimo santu. b Atako bongo, mokristo asengeli libosoliboso koluka ete nkombo ya Yehova esantisama mpe ete kimya mpe bomoko ya lisangá ebatelama. Bayekoli ya Kristo bayebani libosoliboso mpo na bolingo oyo bamonisanaka, mpe “bolingo . . . elukaka matomba na yango moko te.”​—1 Bakorinti 13:4, 5; Yoane 13:34, 35.