IMBATA 46
Le Mi Owi Mi Azini Mi Isu Baputizi Ra A’dusi?
Mi mi owi mini luzu Yehovani izita ma alea i le di eri inzi i a’dule azini i le azi eri niri ’ba idri mini ma alea oko risi. (Zaburi 40:8) ’Da ma vutia, mi di baputizi isu. Baputizi isuzu ri ni e’da ’ba azi ’diyi ni mi owi mi Yehova ni ’bo. Amani ama owizu azi ngazu Yehova niri peta azi onyiru amani pe idri amani ma alea agapi ni ri. A’duni fe mini peta azi okporu ’dile ri pezu ni?
1. A’duni fe ’ba azi ni pezu i owizu ni?
Ama ama owi Yehova ni amani eri lezu ra risi. (1 Yohana 4:10, 19) Biblia ’yo ani amani: “Mi nga Opi Mungu mini le mi asi driasi, mi idri driasi, mi asisile driasi, mi okpo driasi.” (Marako 12:30) Ama e’da ama leta Mungu niri e’yo nzeza si a’duke ku, te ’yeta amani risi indi. Ekile ’ba iri eyi lepi tu ’diyi ni eyi jezu ri le, leta amani Yehovani lezu ri ni fe amani ama owizu erini azini lezu baputizi isuzu.
2. Tusu coza Yehovani fe ’ba baputizi isupi ’bo ’diyi niri ngo yi?
Ika baputizi isu ’bo, mi eca aku ’ba Yehovani ayikoru ’diyi niri ma azi ru. Eri nga fe mini Yehova ma leta mini ri nezu geri kakau yi si, azini eri nga fe mini mi isizu erivu inyia aga oku drio ri ra. (Mi la Malaki 3:16-18.) Yehova ni nga eca mi Ata ru, mi nga vini adripi azini amvipi wudrikuru drisi Yehovani lepi saaru azini mi lepi saaru ’diyi isu. (Mi la Marako 10:29, 30.) Te, afa azi le mi ’ye de nga mi isu baputizi ku ’diyi ci. Le mi oni e’yo Yehova ma dria, mi oni eri lezu, azini le mi o’a a’ita be eri ma Mvi ma dria. Asizu, le mi owi mi idri Yehovani. Ika e’yo ’diyi ’ye azini ika baputizi isu, mi nga ovu geri mi jipi ayiko zuzu idri ma alea ’dani ’dani ri ma alea. Biblia ’yo: “Baputizi . . . eri pa emi” ’bo.—1 Petero 3:21.
OVAZU ALI
Mi ne eri e’yo azi okporu ni mini mi owizu Yehovani azini mini baputizi isuzu ci a’dusi yari.
3. Le ama alu alu ma pe aleki azi nga a’dini yari ci
Israeli ndra drio ’diyi ma azi egaki ndra yi eco inzita fe Yehova ni azini mungu inzoru Baali ni ra. Te Yehova pe ndra i nabi Eliya ma ti egata inzoru ’di otuzu ra. Mi la 1 Opi 18:21, zita ’di omvizu:
-
Anzi Israelini ’diyi ma driwala ndra peta ngo i pezu?
Ekile anzi Israelini ’diyi le, ama driwala pezu aleki azi nga a’dini yari ci. Mi la Luka 16:13, zita ’diyi omvizu:
-
Ama eco Yehovani inzi ’ba azi nduni be kaniku afa azi nduni be ku a’dusi?
-
Ama e’da Yehovani apeki lu eri inzizu i ngoniru?
4. Mi dro asisile leta Yehovani mi lezu ri ma dria
Yehova fe amani feta onyiru ’diyi kakau. Ama eco di erini a’du fe? Mi avi VIDIO ’di.
Geri azi Yehovani i leta e’dazu mini ’diyi ngo yi? Mi la Zaburi 104:14, 15 azini 1 Yohana 4:9, 10, zita ’diyi omvizu:
-
Feta Yehovani mini ani o’azu awa’difosi angiri ’diyi ngo yi?
-
Feta ’diyi fe mi e’yo ega eri ma dria ngoni?
Akaki feta azi amani le tu ’dile ni isu, ama le e’da agu fepi ri ni ama awa’difo si. Mi la Azita Amvizu 16:17, zita ’di omvizu:
-
Ika afa Yehova ni ’ye mini ’diyi ne, eri fe mini lezu a’du ’yezu erini?
5. Mi owizu Yehovani ri ni tusu coza kakau yi eji
’Ba kakau yi ega afa fepi yini ovuzu ayikosi ri ’ba karakara ni yi nizu ci ri, yini azi muke ni ngazu ri, kaniku yini ovuzu sende be angiri ri. ’Da e’yo adani ya? Mi avi VIDIO ’di, zita ’di omvizu.
-
Agu vidio ’di ma alea ri ni ndra mupira aviza lezu ra ti, ku mupira aviza a’dusi?
-
Pe di i owizu Yehovani, adrini mupira avizu ku. Mini ega risi peta erini pe ’da muke ya? A’dusi?
’Ba ti pele Paulo ni nga ecazu kristiani ru ku ria, eri ndra azi amboni nga. Imbapi onduaru ni imba ndra eri azita ’ba Yahudi ru ’diyi niri si ni. Te ku afa ’diyi woro ecozu ecazu kristiani ru. Paulo ega ndra e’yo afa ini ku ’diyi ma dria ra ya? Mi la ’Ba Filipia ’Diyi 3:8, zita ’diyi omvizu:
-
Paulo omve afa ndra ini isu de nga i ecani kristiani ru ku ’diyi afa avupi tokoruri i a’dusi?
-
Afa di erini isu ndu ri ngo i?
-
Afa azi mi idri ma alea mini eco o’bi azi mini nga Yehovani ri beni ci ya?
Paulo ni ndra ecazu Kristiani ru risi, afa erini isu ’diyi aga erini ndra ku ’diyi ra
’BA AZI ’DIYI ’YO “Mi idri owizu azi ngazu Munguni ri peta onzi ni.”
-
Mi ni ega risi mi idri owizu azi ngazu Yehovani ri peta azi muke ni a’dusi?
’BAZU ALIARU
Leta amani Yehovani lezu ri ni fe amani ama idri owizu erini azini baputizi isuzu.
Aleni amvizu
-
Le ama leki Yehovani asi driasi azini ama inzi eri a’dule si a’dusi?
-
Tusu coza Yehovani fe ’ba baputizi isupi ’bo ’diyi niri ngo i?
-
Mi le mi idri owi azi ngazu Yehovani ra ya?
ONIZU ANGIRI
Ine ’ba azi ongo copi ni azini ’ba azi ongu nzupi ni peki yi ma idri owizu Yehovani a’dusi yari.
Ine asisile amani ama owizu ’diyi ma azi yi.
“Le Mi ma Owi Mi Idri Yehovani ra A’dusi?” (Watchtower, Mba Alu 15, 2010)
Ongo nezaru ’di ma alea, ine ayiko ’ba yi owipi Yehovani ’bo ’diyi ni ovuzu alenia ri.
E’yo dri “Eli Kakau ma Ebi E’yo Ega, ‘Asisile ’Bani Ama O’bazu ri A’duni?’” ri ma alea, ine afa oku azi ma aza kopi e’yo orodriru ndeni idri ma alea ’diyi ’bazu ri.
“Biblia ni ’Ba Yi ma Idri Ojara” (Watchtower, Mba Mudri Drini Alu 1, 2012)
