Ari eri orodriru. Eri kokoru, ama econi o’a idriru ku. Mungu ni ama o’bazu ni risi, eri ’ba kililiru amani e’yo ecepi ari ma ayuta ma dria niri i. E’yo erini nze ari ma dria ri ngoni? ’Ba eco ari nya kaniku su ’ba rua ra ya? Dika mi eco peta kililiru ’diyi pe e’yo ari vuri ma dria ngoniru?

1. Yehovani ari ne ngoni?

Yehova ece ndra ’ba i inzipi ewu drio ’dasi ’diyi ni: “Rua dria ma idriri ari eriniri’i.” (’Ba Levini 17:14) Yehova ma milea ari sopa idri ma paria. Idri ni o’azu Mungu ma milea orodriru risi, ari vini eri ma milea orodriru.

2. Geri ari ayuzu Mungu ni le ku ri ngo i?

Yehova fe ndra azita ’ba i inzipi ewu drio ’dasi ’diyi ni ari nyazu ku. (Mi la E’doza 9:4 azini ’Ba Levini 17:10.) Amvi azita sa ’ba e’yo otupi ’diyi ni ndra ’yozu Kristiani yini “emi ma ga . . . ari” si risi.​—Mi la ’Yeta 15:28, 29.

Ari gazu si ri ma efi ngoni? Dakitari ka lu mini mi ma mvu ewa ku, mi eco ewa mvu ku. Te mi eco nyaka ewa be alea ri nya kaniku ewa su mi isu ma alea si ra ya? Mi eco ’dale ri ’yeku. Geri alu ’dasi, azita Munguni fe ari gazu ri ma efi ama econi ari mvu ku kaniku anyapa ’bani li ku ri nyaku. Ama econi vini nyaka ’bani ari ’bazu alenia ci ri nyaku indi.

Te di ari ayuzu e’yo azoni si ria? Geri ayule ’diyi ma azi yi azita Mungu niri nyo ra. Geri ’diyi ma azi ’bani ari pi ri suzu mi rua ri’i, kaniku ’bani ari ma esele omvele—red cells, white cells, platelets, azini plasma ru ’diyi suzu mi rua ri’i. Geri azi ’bani ayu arojoa ri ecoki e’da ’ba ’di azita Mungu vuri nyo ri ru ku. Ecetasi, ’ba eco ari ma esele su ’diyi ma azi ma alea afa azi werea ni nze. Azi ’diyi ovu geri ndu ndu ’bani ecozu mi ngulupi ma ari ayuzu ’diyi. Mini e’yo egaria geri ’diyi ma ayuta ma dria, le ’ba alu alu ma pe peta ima ngulupisi. a​—’Ba Galatia ’Diyi 6:5.

 OVAZU ALI

3. Mi pe peta aro ayuzu ayiko fepi Yehovani ra ri i

Mi eco peta aro ayuza ni i ecipi azita Munguni ri be ra ri pe ngoniru? Mi avi VIDIO ’di, dika mi oni eri orodriru e’yo ele ’diyi ’yezu ci a’dusi yari.

• Mi ma zi Mungu ondua isuzu.​—Yakobo 1:5.

• Mi ma nda azita Biblia ma alea ’diyi nezu mi eco yi ayu ngoniru yari.​—E’yo O’beza 13:16.

• Mi ma nda pari mini o’azu ri ma alea afa ecopi azi ngapi mini ra ’diyi.

• Le mi ma ni mini le ku ’diyi ci.

• Le peta mini pe ri ma fe mi asisile ni candi ku.​—’Yeta 24:16. b

• Le mi ma ni ra​—mi aje ma azi, mbaza azi, kaniku ’ba Biblia onipi mi beri—eco mini peta pe e’yo i ecipi asisile beri ma dria ku.​—’Ba Rumia ’Diyi 14:12.

• Mi si e’yo mini pe ri va.

4. ’Ba Yehova ma E’yo Eti Nzepi ’Diyi aro ayuza kililiru ri nda i

Ama eco azita Munguni ari ayuza ma dria ri ma vuti bi ra azini ama eco aro ayuza kililiru ari ayuza koko ri isu ra. Mi avi VIDIO ’di.

Mi la Tito 3:2, zita ’di omvizu:

• Le ama ma eci ti azini ama ovu asi e’yere si amani e’yo nzeria ’ba e’yo nipi aro ma dria angiri ’diyi pie a’dusi?

 5. Afa azi were ’bani inze engazu ari ma esele su ’diyi ma alea ri

Ari ma esele yi su​—red cells, white cells, platelets, azini plasma. Esele ’diyi ma alea, esele azi were were ’bani inze yi ma alea ’diyi vini ci. c ’Ba esele ni ’bani inze ’diyi ma azi ayu a’di ’dizu azo be kaniku ari raza atrizu.

Ka eca afa azi were were ’bani inze engazu ari ma esele su ’diyi ma alea ri ma dria, le Kristiani alu alu ma ayu e’yo ini oni Biblia ma alea ri peta pezu i. ’Ba azi ’diyi peki aro afa were were ’bani inze ’diyi pie ri ayuzu ku. ’Ba azi ’diyi neki ari ma esele were were ’diyi ayuzu ri ovuni yi ma asisile ni onzi ku.

Mini peta peria, izi mi zita ’disi:

• Ma eco asisile mani afa were were ’bani inze ari ma esele su ’diyi ma alea ri lezu ku kaniku lezu ra ri ece dakitari ni ngoniru?

 ’BAZU ALIARU

Yehova le ama ma ayu ari geri onzi risi ku.

ALENI AMVIZU

• Yehova ’ba ari ma e’yo orodriru a’dusi?

• Ama ni azita Mungu ni fe ari gazu si ri eci i ari suza rua ri be indi ngoniru?

• Mi eco peta kililiru ri pe ari ayuza ma dria e’yo azo ni si ngoniru?