IMBATA 07

Yehovani Ngole Ya?

MI AVI

Yehovani Ngole Ya?

Mi ka e’yo ega Yehova Mungu ma dria, a’du ma e’yo ni emu mi omia ni ya? Eri ’di osutaru azini mivu si ere ekile ’bi’bio yini o’azu ’bua ere ri le ya? Kani mi ’di eri ne okporu adriza kililiru ri koko, ekile ovi ni afiri le ya? Yehovani ada ada si ria ngole? Biblia ma alea, Yehova ece amani adriza ini ’diyi, azini ece vini ima ava mi dria ri ra.

1. Ama ecoki Mungu ni ne ku a’dusi?

“Mungu eri Orindini.” (Yohana 4:24) Yehova ma rua ’ba ada vu ’dile ri yo. Eri orindi ni, eri o’a ’bua pari azi amani eco ne kuni ma alea.

2. Adriza azi ’bani Yehovani nizu ’diyi ngo yi ya?

’Bani tro Yehovani nezu ku ra ti, eri ’ba azi adriza kililiru ’diyi pie ni, adriza ’diyi fe ’bani eri lezu. Bibilia ’yo: “Yehovani e’yo liza kililiruri le ra; eri kuni ’ba ini alatararu ’diyi ku.” (Zaburi 37:28) Eri vini “asi ndriza be tre azini yiki be tu,” tutu ni si, ’ba candi nyapi ’diyi vu. (Yakobo 5:11) “Yehovani ’ba asi nyozaru be ’diyi vu inyia, eri adri ’ba ovupi candisi asi ojapi ani ra ’diyi opa ra.” (Zaburi 34:18, footnote) Ini oku ’yeta amani ri eco Yehovani ayiko fe, kaniku candi fe ri ra ya? Agu pe pi e’yo onzi ri ’yepi ri ni fe Yehova ma asi ni o’a candi si. (Zaburi 78:40, 41) Te agu e’yo kililiru ri ’yepi ri ni fe Yehova ma asi ni o’a ayiko si.—Mi la E’yo O’beza 27:11.

3. Yehova e’da i le ama ra ri ngoniru?

Adriza Yehovani ndepi ni ri leta ni. “Munguni ovule letanirisi.” (1 Yohana 4:8) Yehova e’da ni lu ima leta Biblia ma alea a’dule si ku, eri vini e’da afa erini o’ba ’diyi ma alea si indi. (Mi la ’Yeta 14:17.) Eceta si, ine nga geri erini ama o’bazu ri. Fe amani ecozu wura ndriza ’diyi nezu, ongo onyiru ’diyi erizu, azini nyaka ma aji ’bizu. Le ama ma zu ki ayiko idri ma alea.

OVAZU ALI

Mi oni nga Yehova o’ba afa osutaru ’diyi ngoniru yari. Azini ine nga Yehovani adriza ini onyiru ’diyi e’da ngoniru yari.

4. Orindi alatararu ri—Okpo Mungu niri

Ekile amani ama dri yi ayuzu azi ngazu ri le, Yehovani ivu risi orindi alatararu ri ayu i. Biblia ni ece risi, orindi alatararu ri o’ani ’bani ku, te eri okpo Mungu ni ayu azi ngazu ri i. Mi la Luka 11:13 azini ’Yeta 2:17, zita ’diyi omvizu:

Mungu ni orindi alatararu i niri “osu” ’ba eri zi pi ’diyi ma dria. Mini ega risi orindi alatararu ri ni ’bani ya, kani okpo Mungu ni ri? E’yo ’dile a’dusi?

Yehovani orindi ini alatararu ri ayu e’yo osutaru ’diyi ’yezu. Mi la Zaburi 33:6 azini 2 Petero 1:20, 21, zita ’di omvizu:

Geri azi Yehovani ebizu ima orindi alatararu ri ayuzu ’diyi ngo yi?

5. Adriza Yehovani ’diyi onyiru

Musa ni ndra Mungu ni inzi a’ita si, te le ndra ima O’bapi i oni kililiru. Ani Musa ’yo: “Mi ece curu’do geri mini ’diyi ma dri, ma ma ni mi ani.” (Efuza 33:13) Yehova omvi eri, erini ima adriza ’diyi ma azi ki ecezu erini risi. Mi la Efuza 34:4-6, zita ’diyi omvizu:

Adriza Yehovani erini e’da Musa ni ’diyi ngo yi?
Adriza Yehovani ’diyi ma eselia mini le ndeni ri ngo i?

6. Yehova asi ’ba yi si ra

’Ba Mungu ni Ebrania ru ’diyi ndra Misiria ati’boru. Driciza yini ndra ovuzu alenia ri fe Yehovani i etrumu zu ngoni? Mi eri O’DUKO avi le ’di kaniku, Mi la Efuza 3:1-10. Zita ’diyi omvizu.

O’DUKO AVIZA: Yehova Ko Ndra Yi Ma Aza Driciza ma Alea si Ra (2:45)

E’yo siza ’di ece mini e’yo Yehova ma trumu ’ba ada ma driciza si ri ma dria ngoni?—Ine vasi 7 azini 8.
Mini ega risi Yehova le ’ba ada yi ma aza ko ra ya azini eco ra ya? A’dusi?