Yobu Ovu ’Ba A’ita Be Mungu Vuri
A’DIKO 26
Yobu Ovu ’Ba A’ita Be Mungu Vuri
MI O’A candisi agu azoru disi ra ya? Eri ma ru Yobu i, oku ’dari eri vile okuri i. Mi ni eri a’du e’yo nze Yobu ni’ari ra ya? ‘Mi tri Mungu azini mi ma dra te.’ Ama ma ndre di, nze e’yo ’diri ’dinile a’du e’yo si ya ri, azini Yobu nga candi angiri ’diri isu a’du e’yo si a’ri.
Yobu ovu ’ba aita be Yehovani rupi rari. Ovu ndra angu omvele Uzia ria, ovu ni Kanania ria ku. Yehova le Yobu ni saaru, te ’ba azi ’diyi ngu eri onzi. Mi ni a’du e’yo si ya ri ra ya?
Eri ndra Satani ’ba ’ba Olepiri i. Le mi ma nira Satani ni malaika onzi Yehovani ngu pi ri i. Nga fe Adamu pi Eva be eyini Yehova ma ti eri zu ku dika ega kini i eco ’ba dria eyi oja Yehova ma ti erizuku indi. Te nga di ’ba yi oja ra ya? Yo. Mi ega nga ’ba a’ita pie kakau agupi azini oku pie amani e’yo onizu eyi ma dria ’diyi. Mi ni ni rusi ’diyi si?
Yakobo pini drazu Yusufu be Misiria ’bori ma vutia, Yobu ovu ’ba a’ita be angiri tu Yehova vu aga ba nyaku dria ’diyi dria ra. Yehova fe Satani ma ni kini eco ni ’ba dria eyi oja ’ba onzi ru ku, nga ’yo kini: ‘Mi ndre, Yobu ni a’ita si ma vu.’
‘Eri a’ita si, a’dusiku mi co tusu drinia azini eri ni ovuzu afa muke kakau pie ri si. Satani ga agata. Te mika afa ’diyi ’du ra, eri nga mi tri ra.’
Yehova nga ’yo kini: ‘Mi ma mu drile. Mi ma ’du afa ’diyi dria te. Mi ma ’ye afa onzi ’diyi Yobu ma rua. Ama nga ndre eco ma tri ra ya’ani. Te mi ma ’di eri ku.’
Okorisi Satani fe ’ba ogu Yobu ma ti azini ngamia yi, azini eri ma kabilo odra ki woro. ’Da ma vutia o’di eri ma anzi 10 agupianzi pi ezoanzi pie oli akuku ozo opie ri ma alia. ’Da ma vutia Satani fe azo onzikanyaru ni Yobu ni bizu. Yobu nga dri ci angiri tu. E’yo ’disi Yobu vile okuri nga ’yo tinia kini: ‘Mi tri Munguni ma fe ani mi ma dra te.’ Te Yobu econi ’yezu ku. Azini, agyi na Yobu ni inzoruri nga imu eri vu nga ’yo tinia eri ma oku ni ovu adriza onzi be. Te Yobu o’a a’ita be.
’Di fe Yehova ni ovuzu ayikosi, ’da ma vutia nga tusu cozu Yobu ma dria, mini ndrele e’da ’di ma alia ri le. Ati eri azo eri bi pi ri ma alea ri si ra. Yobu nga ovu anzi azini 10 ndrizaru ’diyi pie, azini kalefe ti pini kabilo pie azini ngamia pie ri ezu pale iri ndra oko ’da ma kalafe si.
Mi nga ovu a’ita be Yehova vu ekile Yobu ni ovule ri le ra ya? Mi ka ovu ra, Mungu ni nga tusu co mi dria ra. Mi eco nga ovu idriru ’dani ’dani ’bani ngazu nyaku ’diri edezu kililiru ekile amvu Edeni le ’bo ria.
