Farau Vile Orobi Obiza ’Diyi
A’DIKO 23
Farau Vile Orobi Obiza ’Diyi
ELI iri ma vutia Yusufuni nga kiri arujoa. Ati’bo kopo fepiri egani e’yo eri ma dria ku. Ini alu orobi iri obi Farauni, ovu osutasi orobi ma ifi ni zu. Mi eco eri ndre o’dukoria ra ya? Drusi ’dini o’bitisi Farau omve ’ba ondua ru ’diyi woro orobi ’diyi ma efi oluzu. Te eyi econi orobi ’di ma efi oluzu ku.
’Dinile ati’bo kopo fepiri ega e’yo Yusufu ma dria. Nga ’yo Farau ma tia: ‘Mani ndra ovuria arujoa, agu azini alu arujoa ’da eco orubi ma efi ecezura.’ Farau fe ’bani Yusufuni ijizu arujoa risi amve mbeleru.
Farau nga Yusufu ni orobi i obipi ’di olu: ‘Andre ti aziri a’buza, ndrizaru ’diyi, andre vini ti aziri oyizaru ’diyi. Ti oyizaru ’diyi nga ti abuzaru ’diyi nyara.’
‘Orobi iriri ma alia kaka ’ya aziri kaka pati alu ma rua. Andre vini kaka ’ya pi odizaru aziri kaka pati alu ma rua. Kaka odiza ’diyi oki kaka abuza ’diyi ra.’
Yusufu ’yo Farau ni kini: ‘Orobi iri ’diyi ma efi alu. Ti a’buza aziri azini kaka abuza aziri ’diyi eli aziri. Azini ti oyizaru aziri ’diyi azini kaka odizaru aziri ’diyi vini eli azini aziri. Eli aziri ni nga ovu Misiria nyaka ni nga ’ya saaru. ’Da ma vutia eli azini aziri ni nga eca nyaka were ni nga zo alenia ni.’
Yusufu ’yo Farau ni: ‘Mima pe ’ba ondua ru ni, mi ma ’ba eri ’ba nyaka okupi ri ma drileru eli aziri nyakani ’yazu kililiru ri ma alia. ’Ba ngani ani dri jazu eli emupi aziri nyaka ni ovuzu werea ’diri ma alia siku beni.’
Farau le egata diri ra. Nga Yusufu ni pe nyaka ’diri okuzu, azini tani mbazu erojoa. Yusufu eca ’di ’ba angiri tu Farau ma vutia Misiria ri i.
Eli aro, liki ni ’dezu ri mavutia Yusufu ne ’ba azini yi emuria. Mi ni eyi ra ya? Adripika erima drilea 10 ’diyi! Eyi ma ati Yakobo epe eyi ma ti Misiria a’dusiku nyaka akua yi vile Kanania ri ’ye okoko. Yusufu nga ima adripika ’diyi nira te nini eri ku. Mi ni a’du e’yo si ’ari ra ya? Yusufu zo curudo angiri ’bo azini bongo erini sule ’diyi ni ovuzu ndu ’dinile ri si.
Yusufu ega kini ’i ni ndra ovuzu werea ru risi orobi o’bi ’i ima adripika osiki kumuti ima drilia vaa. Mi eco ega mila e’yo ’diri ra ya? Yusufu nga ndre kini Mungu pe ima ti muzu Misiria e’yo kililiru si. Mi ni egarisi Yusufu ’ye a’du afa ni ya? Ama ma ndre nga.
