Yesu Ni Efizu Opi Le Ri
A’DIKO 97
Yesu Ni Efizu Opi Le Ri
ERINI ’ba mile koko iri afa aipi geri tiasi ’diyi ma mile atizo boria, Yesu eca di aku azi were Yerusalemu ma ageyia ria. Nga ’yo ’ba ima vuti bipi iri ’diyi pi ma azi dri kini: ‘Efiki aku were ’di ma alea, ’dale emi nga akanya mva isu. Emi itruki eri, emi ijiki ma vu ’doa.’
Eyini akanya nde ijizu eri dri boria, nga tu drinia nzuzu Yerusalemua. Eri ni cazu aku ambo nde ma ageyia ogogo ria, obi ongulumu ru nga emu dri fuzu eri be. Eyi kakau nga ki bongo eyi rua ri otru o’bezu nzila dria. Aziniri nga ki ndende ma bi oli o’bezu nzila dria indi. Yi dria nga di oyu o’duko orusi kini: ‘Mungu mi co tusu opi emupi Yehova ma rusi ’di ma dria!’
Ndra e’dozu drio opi pele o’diru Israelia ’dinile ’di ki nzu akanya mva ma dria fizu Yerusalemua. ’Da i asisile Yesuni nzuzu ani akanya nde ma dria fizu Yerusalemua ri. Dika ’ba ’diyi ki dria bani e’da kini eyi leki Yesu ni ovuzu yi ma opi ru ra. Te ’ba dria leni eri ni ’dini ku. Ama eco ’diri ne e’yo i ’yepi Yesu ma rua sawa eri ni fizu hekalua ’borisi.
Hekalua ’dale, Yesu ati ’ba mile koko ’diki ’ba pa acoza ’diyi pie. Anzi nyiri ni e’yo ’diyi neria, ngaka ru kuza ngo Yesu dri. Fe ani a’oko atalo Yahudiru ’diyi dri saaru. Ngaki di Yesu ni zi kini: ‘Mi eri e’yo anzi nyiri ’diyi ni ’ye ’diyi ’bo ya?’
Yesu nga omvi yi tia: ‘Ee, ma eri ra.’ ‘Ila Biblia alea kini: “Anzi nyiri matia, Mungu ni nga ru kuza iji ri ku ya?”’ Ani e’yo ’disi anzi nyiri ngaki mu drile opi Mungu niri ma ru icuzu.
Aleki ni ovuzu anzi nyiri ’dayi le ku ya? ’Ba azini ecoki le ama atri e’yo Mungu ni ma oluza si. Te ama nga mu e’yo onyiru Yesu ni nga mu ’ye ’ba yini ewu drusi ri ma alea ’di olu drile drile.
Yesuni ndra ovuzu nyakua ’dia ria, sawa irini opi nyazu ri ecani nga ndra ku. ’Ba Yesu ma vuti bipi ’diyi ngaki zi kini, e’yo ’diyi nga eyi ’ye a’du nga ri ya? ’Di i bani e’yo amani mu oni ’di ma vutia ri.
