Geri Muzu Damasikia Ria
A’DIKO 108
Geri Muzu Damasikia Ria
MI NI agu i lapi va ’di ri ra ya? ’Di Saulo i. Mine eri agu ndra bongo ’ba Stefanoni o’bepi onisi ’diyi ri ma ta mbapi ri i. Mine nga diza engapi bua le ru di! A’du e’yo ni ’ye ni ya?
Drata Stefano ni ma vutia, Saulo nga inzata ’ba Yesu vuti bipi ’diyi pini ma dri ce ni. Nga aci aku alu alu ma alea si dria eyi obizu o’bezu arujoa. ’Ba Yesu vuti bipi ’diyi ma azi kakau ni nga apa aku ambo azi ’diyi pi ma alea dika muki drile “e’yo oluza” be. Te Saulo nga eyi vuti bi aku ambo ’diyi pi aleasi dria eyi obizu ani beni. Eri sawa disi mu geri Damasikia nia. Te geria ’dale, e’yo osuta ru ye i eri rua:
Coti diza nga i gba eri ageyi si kuru. Saulo nga e’de va nyakua ekile mini ne dile. O’duko nga di iku oru kini: ‘Saulo, Saulo! Mi ma inza ’dini a’du e’yo si ya?’ ’Ba Saulo be ’diyi ne ki diza nde ’di i dika eri ki o’duko ’diri ra, te vani e’yo nde ma efi ku.
Saulo nga zi: ‘Mi a’di i ya, Opi la?’
O’duko nga omvi: ‘Ma Yesu mini enzale ri i.’ Inzata Saulo ni ’ba Yesu vuti bipi ’diyi inzazu ri e’da ndra ekile Saulo ni Yesuni inza nile.
Saulo nga ’yo: ‘Ma ma ’ye a’du afani ya Opi la?’
Yesu nga ’yo kini: ‘Mi nga uru, mi mu Damasikia. Mi ma ’ye a’du afa ni ari nga ovu luza ru mini ’dale.’ Saulo ka enga uru ’bo dika erini mile ziria, mine econi afa azi ni nezu ku. Eri mile ase ra! Ani ’ba ovupi eri be ’diyi nga eri bi dria eri jizu Damasikia ’dale.
Yesu nga di e’yo nze ’ba i vuti bipi Damasikia ’da’ni ma azi be kini: ‘Mi nga oru Anania. Mi mu geri omvele Kilili ru ria. Aku Yuda nia mi zi agu omvele Saulo i ri. Eri ati’bo mani mani pele ri i.’
Anania obi azita ’diyi vuti ra. Nga mu Saulo vu, ’ba i dri eri dria ’yo kini: ‘Opi epe ma ti mivu mima nga angu nezu ani azini mi ma ga tre orindi alataeraru risi beni.’ Coti afa ede eri miliasi va ekile ongoro bole, eri nga angu ndre dika.
’Ba nga Sauloni ayu geri angiri rusi e’yo oluzu suru angiri dri. ’Ba nga di eri omve Paulo ’ba ti pele ama ’ye muzu e’yo onizu dria angiri ndo ri i. Te okokelerisi ama ma ne nga Mungu pe Petero ma ti a’du ’ye ari.
