Sulemani Si Hekalu
A’DIKO 64
Sulemani Si Hekalu
DE NGA Daudi drani ku, fe Sulemani dri otuta hekalu sizu engapi Yehova vu ri. Sulemani ni opi nyazu eli su ’bo ria, e’do di azi hekalu sizu ri dika azi nde ’du eli aziri nusu erini i dezu. ’Ba alifu mudri ma drilea nga ki azi hekalu nde ni dika azi hekalu ni ’di ’du silingi angiri tu. ’Da bani asisile ’bani mele pi ayuzu dahabu alenia tu ri.
Hekalu nde ma a’le ’ba awa ndra ambo ambo iri ekile pari ’bani edeta edezu ri le. Te eyi ndra wala ru pale iri aga pari ’bani edeta edezuri ra. Sulemani nga di fe sanduku oyo soza ni ri ’bazu hekalu nde ma a’leru azini afa ndra ’bani ’ba pari edeta edezuria ’diyi ’ba oja eyi ’ba hekalu ma o’oko aziria.
’Bani hekalu ma sita dezu ’boria, ’ba nga omu amboru ’ba. Sulemani nga kumuti si hekalu ma alea dika zi Mungu ekile mini ne e’da ma alea ’dile. Sulemani nga di Yehova ni zi dini: ‘’Bu ka eco ca mini o’azu alenia ku, hekalu ’di eco di ca mi ni ngoni ru. Te Mungu mani la, mima eri zita ’ba mini ni zi pari ’diri ma alea ri fo.’
Sulemani ka Mungu zi de ’bo, aci nga esi buarisi va. Aci nga anyapa ’bani owile hekalu ma alea ’diyi ve dria. Coti diza imveru engapi Yehova vu ri ga hekalu alea tre. ’Di e’da ada ada Yehova eri zita Sulemani ni ra, azini o’a ayikosi hekalu nde si. E’yo ’disi hekalu eca di pari ’bani inzita inzizu ri ru pari edeta edezu ri ma paria.
Sulemani nga ’ba ma dri ce ondua kilili ru si ani ’ba o’aki ayikosi. Te Sulemani nga oku Yehova ni inzipi ku ’diyi ’du kakau ru suru ndundu ma alea. Mi eco eyi ma azi ne inzita inziria wura inzile inzi ri ma drilea ’da ra ya? Asizu oku Sulemani ni nga eri ma dri ce Mungu inzoru ’diyi inzizu. Mi ni a’du e’yo ’ye i Sulemani be ni’ari ra ya? Ku di o’azu ’bayi be asi anzu si ri ra. Eca di adra ru ani ’ba o’aki di ayiko si ku.
A’oko nga Yehova ni nya Sulemani ni ani ’yo kini: ‘Ma nga opi nyaza ’di ’du mi dria risi ra ma nga eri fe ’ba ndu dri. Te angani ’diri ’ye ewu mi ni ovuzu idriru risi ku te ma nga ’ye ’dinile ewu mi mvi ni opi nyazu ni risi. Dika anga ni ’ba dria yi onze opi nyaza mi mvi ni ma aleasi te ’dini ku.’ Ama ma ne nga di ’ye i ngoni ngoni ya ri.
1 Suru ma E’yo 28:9-21; 29:1-9; 1 Opi 5:1-18; 2 Suru ma E’yo 6:12-42; 7:1-5; 1 Opi 11:9-13.
