1. Yobu chungʉe Mungu bblo pli lu ná ddikpa ri ká kʉ ngbá chu?

 YOBU tingʉelo bí kʉ ná ndrŭ na ndidhó maisha nǎ, ro bbo na mana kʉ nari kʉ Yova Mungu na kpa tingʉe ná lo. Nja ndi li Yobu dhó udha kpakpa ndidhó nyodyu ma, ndi adi ndidzá njí dhi ndrŭ ronga b’ob’o nari ma na djo d’e, Yova pongʉeri Yobu nja ndi no ná ke ka ndi ké le nanga ná ritsi. Loroji na, Mungu pongʉeri ndi adi zǎ dhó lo u ná ritsi bbʉbbʉ zǎ dho, føri dzá lo dho ndi ka ndi bbʉ kedhó lo u ná ritsi maddi ke dho. (Yob. 38:39-41; 39:1, 5, 13-16) Nononi ná ritsi djo ndi ngaddi nari chulu, Yobu chungʉe lo bbo Mungu dhó sifa djo.

2. Nja saa djo ká Yova no ná ritsi djo ko ngaddi ná rie kpakpa addudho?

² Ko maddi ko ka ko chu lo bbo kodhi Mungu djo njati ko di nó ke no ná ritsi nja li ko li ko dyu ro ró. Ro, nja saa djo fø ko rinji nari e kpakpa. Njati rie vile nǎ ko di ri ró, ko nzá ka ko nja Yova no ná bí kʉ ná ritsi ro krʉ ddo ró ri. Ro, rie nga ma ko kʉ vile nǎ ri ró, njaro ko ka ko di riddi nari kʉ, fø ritsi djo ko lo chu ná saa nga kʉ ko dho ri. Føri dzá lo dho akonja saa le ba le ddinga ndirigoti kpakpanga le nji le nja nononi ná ritsi d’e nari nǎ ro ko adi ba ná faida. Ko si ngbaribbai ma Yova ma, Yesu ma na njingʉe njí nononi ná ritsi na ndima ddi na longa nari ma, ngbaribbai ma ko ka ko ba somo bbo nononi ná ritsi nǎ ro nari ma na nja.

3. Yova jingʉeri Adamu ba hwè nononi ná ritsi nǎ ro nari ká addu dhǒ?

³ Yova jingʉeri ya kwanza ndi no ná ndrŭ ba hwè ndi no ná ritsi nǎ ro. Adamu Mungu nongʉe ro ke lingʉe ke bblo pli kʉ ná paradiso na, ke pongʉeri ke bbɨ ri nanga ndirigoti ke ndri  ri ki ndri. (Mwa. 2:8, 9, 15) Addinga ritsi kpa (mbegu) nga nari ma, maua dhi nari ma na ndi ngʉ nja ná saa djo Adamu ngʉ ba ná hwè djo di. Edeni ronga b’odha ngʉe bbo pendeleo Adamu dho! Føri kina Yova pongʉeri Adamu bbʉ dho njonjo kʉ ná zǎ ro. (Mwa. 2:19, 20) Yova ka ndi bbʉe zǎ ró dho ndi ndiro maddi, ro føri rɨngana ke bbʉngʉe fø njí Adamu dhona. Bbʉbbʉ dhé, dho Adamu bbʉ zǎ ro nari njí ke ngʉ adi ri nja li ndi li ndi dyu ro, ke ngʉ adi ri ká njini ngbaribbai ma nari nja bblo. Adamu ngʉ adi hwè ba fø njí nǎ ro. Føri kongʉe ke tsotso ke famu Yova kʉ na ná nyodyu ma, ke no ná bblo pli kʉ ná ritsi ma na d’e.

4. (a) Nononi ná ritsi ringani ko di nja dho ná ddikpa ri ká kʉ ngbá sababu? (b) Ni ká adi hwè ba bbo nononi ná ngbá ritsi dho?

⁴ Nononi ná ritsi ringani ko di nja dho ná ddikpa sababu kʉ, Yova adi riji ko njiri fø. Ke ripo ko dho, “Angbe ni nyǒ rakpa ro ndirigoti anjari,” ndirigoti ke ridhu: “Afø ritsi krʉ ká ie no?” Fø logoti kʉ pʉlʉ. (Isa. 40:26) Yova no krʉ kʉ ná ritsi ra nǎ ma, dz’ djó ma, dda nǎ ma, ndirigoti fø ritsi krʉ adi longaddi ko dho ke djo. (Zb. 104:24, 25) Anzi ngaddi ko Mungu nongʉe ná chu djo di. Ke nongʉe ko ko di hwè ba nononi ná bblo pli kʉ ná ritsi nǎ ro. Ke bbʉngʉe ko dho ko nyǒ ma, ko thó ma, ko bɨ ma, ko da ma, ko ndʉtʉ (pua) ma na ndiro ko di hwè ba nononi ná ritsi nǎ ro d’e.

5. Waroma 1:20 ridho nari bbai, Yova no ná ritsi djo ko lo chu nari nǎ ro ká ko adi faida ba ngbaribbai?

⁵ Biblia d’ra nononi ná ritsi ringani ko di nja dho ná ddikpa bbo na mana kʉ ná sababu maddi. Ri adi longaddi ko dho Yova dhó sifa djo. (Azø Waroma 1:20.) Loroji na, anja Yova no ná ritsi ndirigoti anja ngbaribbai ma ri kʉ bblo pli nari. Ri ngaddi ko dho nari kʉ, Mungu kʉ nyodyu na bbo. Ndirigoti addinga ko adi hwè ba dho ná nyo djo di. Føri adi ke jirie ndrŭ ji nari dhǒ. Njati ko di Yova dhó sifa nja ke nongʉe ná ritsi chulu ró, ko si ke chu bblo pli ndirigoti føri si ko ronga cho ko kana nga ngʉ chøchø ke na. Kpadjo akonja Yova njingʉe njí nononi ná ritsi na ndiro ndi ddi bbo na mana kʉ ná somo ndrŭ dho ná chu ro di.

6. Ko ká ka ko ba ngbá somo tsɨ adi tsɨ ná re dhó loroji nǎ ro?

⁶ Yova kperie lo njini ná saa krʉ kpe. Krʉ cho ró Bi 2 dzá mwisho ma kana Bi 5 na Waizraeli ngʉ adi sigonye dhi re tsɨ angønga laidjo nari nja. Mungu pongʉeri Waisraeli dho “Rakpa ró sigonye dhi re  churie ndima dhó saa chu.” (Yer. 8:7) Fø re dhó saa ndi kpe nari bbai, ke kperie i dz’ ndi si sa ná saa ma b’lo ddi. Njʉ tsɨtsɨ ná re ko di nja ná saa djo, ko adi ngano nari kʉ ko ka ko li ko thí li Yova djo “b’lo ndi kperie saa” ndi si che kʉ ná i dz’ sa ro.​—Hag. 2:3.

7. Re adi ta ná chu ko nja nari nǎ ro ká ko ka ko ba ngbá somo? (Isaya 40:31)

⁷ Yova adi kpakpanga bbʉ ndidzá njí dhi ndrŭ dho. Nabi Isaya chulu Yova tsongʉeni ndi si kpakpanga bbʉ ndidzá ndrŭ dho nja “kpa ngbeni røna bbǔ dhi re (aigle) bbai” bʉ ndima thí bʉni ná saa djo d’e. (Azø Isaya 40:31.) Izraeli ngʉ adi bbǔ ta nzá ndima nji kpakpanga bbo ro nari njanja, ri adi ta fø, røna vʉ ná vʉvʉ na ndi ndi li nari chulu. Fø lo adi ngano ko dho nari kʉ, Yova ka ndi bbʉ kpakpanga bbʉ ko dho fø re dho ndi adi kpakpanga bbʉ nari bbai. Ni di bbobbo re ta bbo ngbeni ná ngalu nzá ndima nji kpakpanga bbo ro nari nja ró, anonga nari kʉ Yova ka ndi bbʉ kpakpanga bbʉ ni dho ndiro ni si nidhó kpakpalo djolu d’e.

8. Mungu no ná ritsi nǎ ro ká Yobu bangʉe ngbá somo, ndirigoti fø lo ká addu ngaddi ko dho?

⁸ Yova djo ko ka ko li ko thí li. Yova kongʉe Yobu tsotso nja ndi li ndi thí bbo ndi djo d’e. (Yob. 32:2; 40:6-8) Yobu na ndima ngʉ loti ná saa djo, Mungu tingʉelo nononi ná bí kʉ ná ritsi djo, føri i kʉ dyødyø ma, ndundu ma, nga adi í ná nja ritsi ma na. Føri kina Yova tingʉelo ke dho zǎ djo maddi, føri ngʉe bɨ (tso nǎ tsí) ma, kana ma na. (Yob. 38:32-35; 39:9, 19, 20) Fø ritsi krʉ nzɨ adi Yova dhó kpakpanga dhé dhǒ ri, ro kedhó jidha ma, kedhó bbo nyodyu ma na maddi. Ndi dhǒ na ndi nanga jini ngbà nari d‘e, Yobu ngangʉe ndi thí lidha tso Yova djo anziro ndi ngʉ adi rinji ná nga djolu. (Yob. 42:1-6) Føri bbai, ko di lochu nononi ná ritsi djo ró, ko si chu nari kʉ Yova kʉ nyodyu na bbo ndirigoti ke kʉ kpakpanga na ko djolu. Føri kina, ke ka ndi si ndirigoti ke si kodhó kpakpalo krʉ sisi. Fø lo ka ndi kó ko tsotso ndiro ko di ko thí li ke djo bbo d’e.

9-10. Dji ma, dyi ma na ká adi ngbá longaddi ko dho Yova djo?

⁹ Yesu chungʉe lo bbo nononi ná ritsi djo. Ke ngʉe “njí dhi fundi” nari bbai, ke ma njingʉe njí ndidzá Baba na ritsi le ngʉ no ná saa djo. (Mez. 8:30) Luti dz’ djó Yesu ngʉe ná saa na, ke njingʉe njí nononi ná ritsi na ndi ddi na longa ndi unakpa dho ndidzá Baba djo d’e. Akotilo ro karnø ke ddingʉe ná somo djo.

¹⁰ Yova adi ndidzá jidha dhǒ ndrŭ krʉ dho. Ngøtsɨ djó Mahubiri nǎ, Yesu pongʉeri ndi unakpa ddinga nononi ná nzɨ djo ndrŭ adi ngaddi bí ina ná aro kʉ ná ritsi djo, føri kʉ: dyi ma, dji ma na. Fø ritsi krʉ na mana e bbo kodhó shinga dho. Yova ka ndi bbʉe fø ritsi nzá maddi nzɨ njínji ndi dho ná ndrŭ dho. Føri rɨngana ke adi dyi ma, dji ma na bbʉ ndrŭ krʉ dho jidha na. (Mt. 5:43-45) Fø somo chulu Yesu ngʉ riji ndi ddiri ndi unakpa dho nari kʉ, Yova adi riji ko dhǒ jidha ndrŭ krʉ dho. Dyi tsu nari ma, nini dji dju kó nari ma na ko di nja ró, ko ka ko ddiri nari kʉ Yova adi jidha dhǒ ndrŭ krʉ dho. Kedhó loroji ka ndi cho ko ko dhǒ jidha lo ko d’ra ndrŭ krʉ dho nari chulu.

11. Re ko nja nari ká ka ndi li ko kpakpa ngbaribbai?

¹¹ Yova adi ko ndí ronga dhi ritsi bbʉ ko dho. Ngøtsi djó mahubiri nǎ Yesu pongʉeri ki: “Aninja rakpa ró re; ri nzɨ adi nga ro  zʉ inga nyo tso ro njú depo na ri, nì mai ri kʉ føro nidhi ra nǎ Baba adi nyo bbʉbbʉ dhé ri dho.” Njaro Yesu ngʉ loddi dho ná ndrŭ ka ndima ée nì ndima re ro nja i ke dhungʉeri kpa tso ná saa na ro: “Ni ká kʉ mana na bbo nga re djolu?” (Mt. 6:26) Jidha na Yesu rid’ra ko dho nari kʉ, Yova si kodhó lo u ná ritsi bbʉbbʉ ko dho! (Mt. 6:31, 32) Fø somo adi chi ndima tøni ro njínji Yova dho ná ndrŭ li kpakpa. Espagne nǎ painia ngʉe ná ddikpa jadda le-ve thí bʉngʉeni bʉ ndi di bblo ná nga ro kʉ nga nari dho. Ro, re nganyo nari le njangʉe nari lingʉe le kpakpa, le pori, “Fø re nongʉe nga ma djǒ na nari kʉ, Yova adi ndima ronga b’ob’o ndirigoti føri lingʉeri ma famu nari kʉ Yova si madhó lo u ná ritsi maddi bbʉbbʉ ma dho.” Ná føri goti tsé le singʉe didha dhi nga ba.

12. Matayo 10:29-31 ridho nari bbai, wanyoi ká addu ddi ko dho Yova djo?

¹² Yova adi ko nja ddiddiro mana na. Lod’radha dho ndi ndi unakpa cho nari njí Yesu kongʉe kpa tsotso nzɨ kpa nji ndima si pinga ná ndrŭ do. (Azø Matayo 10:29-31.) Ke njingʉeri fø ddikpa bbo chungʉeni Izraeli bbá ná re djo ndi tilo nari chulu, føri kʉ: Wanyoi. Yesu dhó saa na nga fø re na mana ngʉe bbo ri. Ro, ke pongʉeri ndi unakpa dho: “Ri kana ddikpa ri ro ma nzɨ ddi adi d’e gʉna nzá nidhi Baba chu ndi ro ri.” Ke ndringʉeri ki: “Ni na mana kʉ bbo bí kʉ ná wanyoi djolu.” Fø chu nǎ Yesu dhongʉeri ndi unakpa dho nari kʉ, Yova adi ko ddiddiro nja mana na, føri dzá lo dho nzadha do kpa nji dho ná sababu ro nga ngʉeri. Lo ndima ngʉ d’ra njonjo kʉ ná bbagʉ lu ná saa djo, wanyoi ndima nja ró kpa ka ndima é ngʉe no ndima ngʉ adi Yesu dhó fø lo ngano ro. Ni nja nini re dju na saa djo adi ngano nari kʉ, Yova adi ni nja mana na dhonalo “ni na mana maddi dada bí kʉ ná wanyoi djolu.” Kedhó nga tsotsokodha na ni ka ni sisi upinzani djolu.​—Zb. 118:6.

13. Ko tsotso ká addu ka ndi kó nja ko ba somo nononi ná ritsi nǎ ro d’e?

¹³ Ko ka ko chu bí kʉ ná nja lo Yova djo nononi ná ritsi chulu. Ká ngbaribbai? Ya Kwanza, ringani ko di saa ba ko nja nononi ná ritsi d’e. Ya pili, ringani ko di ngaddi addu ma riddi ko dho Yova djo nari djo. Fø ko rinji nari ngae sʉsʉ krʉ ddo ró ri. Cameroun nǎ Géraldine ró dho kʉ ná ddikpa le-ve pori, “Ma dhingʉe vile nǎ nari dzá lo dho nononi ná ritsi le nja nari ngʉe kpakpa ma dho.” Alfonso ró dho kʉ ná ddikpa muzee pori, “Ma rangʉe ri utso d’i nari kʉ madhó lo riu ma di saa ba ma é ddiro ndiro ma nja Yova no ná ritsi ndirigoti ma ddinga addu ma ri ddi ma dho ke djo nari djo d’e.”

14. Mungu no ná ritsi djo ndi ngaddi nari nǎ ro ká Daudi bangʉe ngbá somo?

¹⁴ Daudi ngʉ adi ngaddi bbo Mungu no  ná ritsi djo. Ke pongʉeri Yova dho: “Ma di nidzá ra ma, ni thó dzá njí ma, bi ma, dyødyø ma na ni kperie ná chu nja ró, dhe ka ndi dhe ná ke ká kʉ addu ni ddinga ndi djo d’e?” (Zb. 8:3, 4) Bbʉbbʉ dhé, rakpa ronga ndi nja kuna ná saa djo, Daudi nyǒ nzɨ dyødyø dhé ngʉ adi tho ri. Ke ngʉ adi ngaddi ri ddi ndi dho Mungu djo ná lo djo maddi. Ke chungʉe lo Yova dzá bbonga djo. Ddikpa saa djo, Daudi ngʉ ngaddi ngbaribbai ma ndi dhingʉe ndidzá mama zz nǎ nari djo. Ndi noni ná ddù dhi chu djo ke di ngaddi ná saa na ke ngʉ adi mbai po bbo Yova dhó nyodyu dho.​—Zb. 139:14-17.

15. Abbʉ ngbaribbai ma ni adi Yova dhó sifa nja nononi ná ritsi chulu nari dhǒ ná loroji. (Zaburi 148:7-10)

¹⁵ Daudi bbai ko dho maddi rie sʉsʉ ko ba bbo djo ko ka ko ddinga ná ritsi nononi ná ritsi kana. Nja ko chu Yova bblo pli d’e ka ndi kó ko tsotso ná ritsi kʉ bí. Loroji na, addinga Yova dhó kpakpanga djo dyi ni bɨ ná saa djo di. (Yer. 31:35) Addinga Mungu dhó nyodyu djo re ndidhó dza chi nari ni nja na saa djo. Addinga Yova adi hwè bbʉ ko dho ná chu djo, tsɨ kalʉ kpa ndi veti na nari ni nja ná saa djo di. Ndirigoti apo mbai Yova dhó jidha dho ddikpa ngba dzá mama kpa ndidzá kalʉ ngba na nari ni nja ná saa djo. Yova djo ko lochu lu ná chu e bí dhonalo ke no ná ritsi krʉ, nini ri ma, bbobbo ri ma, chøchø kʉ nari ma, dadá ngalu kʉ ná ri ma na krʉ adi ke má.​—Azø Zaburi 148:7-10.

16. Ri ká ngani ko vʉri ko njí addu?

¹⁶ Kodhi Mungu e nyodyu na, jidha na, kpakpanga na ndirigoti ke no ná ritsi krʉ e bblo pli. Ko di ko kuso lu kʉ ná ritsi nja li ko li ko dyu ro ró, føri si rili ko chu lo bbo kedhó fø sifa ma, njari ma na djo. Akodi ngaddi nononi ná ritsi ma, ri ddi ko dho Yova djo ná lo ma na djo bí ina. Njati ko di rinji fø ró ko kana nga si ngʉ chøchø bbo ko no ná ke na. (Yak. 4:8) Gosi ná lo nǎ, ko si ngbaribbai ma gø dhi ndrŭ ka ndima njinjí nononi ná ritsi na ndima kó na ndima dhi nzø tsotso nja ndima kana nga ngʉ chøchø Yova na d’e nari nja.