1. Ko ká do ka ndi njí addudho?

 NDRŬ krʉ adi do ro nji nì dhé ddikpa saa djo. Bbʉbbʉ dhé, Biblia zødha tso ko ngangʉe ná nga djó ro ko nzɨ adi bʉ ma, gó ma, gosi ná saa ma na do ro nji ri. Føro mai, i ddo ró ko ishi ná saa na “ndrŭ adi do nji bbo.” Føri i kʉ lɨ do ma, fudjo ndrŭ nji nari ma, dhe do ma na. (Lu. 21:11) Føri kina, ko ka ko njí ndrŭ do maddi, føri kʉ guvernema ko nza nari ma inga kodhó familia nǎ ndrŭ ddani bbʉbbʉ ibada tso ró nari ma na. Nja ndrŭ adi do nji nari kʉ, karrnga goti inga gosi ná saa djo si ngaba ná kpakpalo tso si veni ndima dho nzɨ nari mai.

2. Ad’ra ngbá lo lu ma Daudi dangʉe Gati nǎ nari.

² Daudi ro ma dangʉe fø di ná lo lu ddi. Loroji na, Pi Sauli ngʉ rine ndi hwi ke ná saa na, Daudi vʉngʉeri ndi nyinga Filistini bbá ngø na Gati na. Luti Gati nǎ pi Akishi rangʉe richu Daudi kʉ bbò sødda b’lo ndi cherie Filistini “elfu kumi djolu ro.” Daudi “do løngʉe che bbo.” (1 Sa. 21:10-12) Ke Akishi ka ndi njie ndi ró ná lo do ngʉ nji. Daudi ká singʉe fø do djolu ngbaribbai?

3. Zaburi 56:1-3, 11 ridho nari bbai, Daudi ká singʉe ndi nǎ do djolu ngbaribbai?

³ Zaburi 56 nǎ, Daudi d’ra ngbǎ ma ndi ngʉ ndi mbu Gati nǎ ndi ngʉe ro nari. Fø Zaburi dho Daudi ngʉe na ná do pʉlʉpʉlʉ, ro ri dho ngbaribbai ma ke singʉe ri djolu nari maddi. Do na ndi ngʉe ná saa djo, Daudi lingʉe ndi thí Yova djo. (Azø Zaburi 56:1-3, 11.) Daudi ngʉe bblo kʉ ná sababu na ndi li ndi thí Yova djo. Yova dhó ngatsotsokodha chulu, ke vʉngʉeri ndi njí nzá djo ndrŭ ka ndima ddienga ná lo. Ke ngʉngʉe ndi rɨ (mazimu)! Akishi njangʉe  Daudi rɨ chu ná ke ná føri na Daudi gøngʉe ndidhó shinga gø.​—1 Sa. 21:13–22:1.

4. Kpakpa ká ko ka ko li ko thí Yova djo ngbaribbai? Abbʉ loroji.

⁴ Ko maddi ko ka ko si do djolu Yova djo ko ko thí li nari chulu. Ro, bbo pli do ko nji ná saa djo ká ko ka ko li ko thí kpakpa Yova djo ngbaribbai? Anja ddikpa loroji di. Njati ni d’i ri utso ni ró kʉ ddikpa dhe ró, ya kwanza ni ka ni é do na. Nì mai ri kʉ fø ro, ni ka ni sisi fø do djolu njati ni li ni thí li nidhó dokter djo ró. Njaro ke korie fø di ná dhe kʉ ró ná ndrŭ tsotso ro bí b’lo. Ke ka ndi rr ni bblo pli ndirigoti ndi liri ni uri nari kʉ ndi famu ni ngbà. Ndirigoti ke ka ndi bbʉ b’lo kongʉe nja ndrŭ tsotso ro ná dawa ni dho. Føri bbai, ko ka ko li ko thí Yova djo bbo njati ko di ngaddi b’lo ke nji ná lo ma, njʉ ke nji ná lo ma, go ke si nji ná lo ma na djo ró. Daudi ma njingʉeri fø i. Zaburi 56 djo ko loti nari kana, addinga ngbaribbai ma ni ka ni li ni thí kpakpa Yova djo ndirigoti ni si do djolu nari djo.

B’LO KÁ YOVA NJI ADDU?

5. Nja ndi si do djolu d’e ká Daudi ngʉ adi ngaddi ngbá lo djo? (Zaburi 56:12, 13)

⁵ Hatari nǎ Daudi dhó shinga ngʉe ro, ke lingʉe ndi thí b’lo Yova nji ndi dho ná lo djo. (Azø Zaburi 56:12, 13.) Føri i kongʉe Daudi tsotso ndidhó maisha lu nǎ. Loroji na, nja saa na ke ngʉ adi ngaddi nononi ná ritsi djo, ná føri ngʉ Yova kʉ kpakpanga na ndirigoti ke jirie ndrŭ ji nari ngano Daudi dho. (Zb. 65:6-9) Føri kina ke ngʉ adi ngaddi nja ndrŭ dho Yova nji ná lo djo. (Zb. 31:19; 37:25, 26) Goti bbo pli Daudi ngʉ adi ngaddi b’lo Yova nji ndi nganga dho ná lo djo. Yova kongʉe Daudi tsotso ndirigoti ke b’ongʉe ke ronga jaddanga nǎ ro. (Zb. 22:9, 10) Bbʉbbʉ dhé, fø ndi rinji nari lingʉeri Daudi li ndi thí bbo Yova djo!

6. Do di ko nji ró ká addu ka ndi kó ko tsotso nja ko li ko thí Yova djo d’e?

⁶ Do di ni nji ró, adhuri ni tsó, ‘B’lo ká Yova nji addu ma dho?’ Addinga ke nongʉe ná ritsi djo. Loroji na, njati ko di ngbaribbai ma Yova re ma, maua ma na  ronga b’o nari nja “li ko li ko dyu ro ró” ná føri ka ndi liri ko uri u nari kʉ, ke si ko tsotso ma ko ddi. Dhonalo ke adi fø ritsi ronga b’o nzá mai ri nongʉeni ndi ró ji na ro goti nzɨ mai ri adi madha ro bbʉ ndi dho ro. (Mt. 6:25-32) Føri kina addinga ngbaribbai ma Yova kongʉe ndidzá njí dhi ndrŭ tsotso nari djo. Ni ka ni zø bbo pli kʉ ná chu nǎ dhongʉe udha ná ke dhó loroji, inga azø Yova dho njínji njʉ ná kpa dalu ná lo. a Føri kina, addinga b’lo ká Yova ko ni tsotso ngbaribbai nari djo. Ke ká ko ni tsotso ni chu ndi d’e ngbaribbai? (Yoh. 6:44) Nidhó sala goti ká ke ngʉngʉe ngbaribbai? (1 Yo. 5:14) Ndidzá bbo ndi jingʉe ná Ngba ke bbʉngʉe nari nǎ ro ká ni adi faida ba ngbaribbai?​—Efe. 1:7; Ebr. 4:14-16.

7. Nabi Danieli dangʉe lu ná lo ká kongʉe Vanessa tsotso ngbaribbai nja ndi si ndi nǎ do djolu d’e?

⁷ Haiti nǎ ddikpa le-ve Vanessa b ngʉ hwini do tá ndi na ná lo na. Ddikpa ke ngʉ adi le nzǐ, ke ngʉ adi mesaje chó le dho krʉ ddo ró ndirigoti ke ngʉ adi le cho nja ndi ddoddo le na d’e. Vanessa gʉngʉe ndi ke dho pʉlʉpʉlʉ. Ro, føro ke ngʉngʉe che bbo ndirigoti ke pongʉeri ndi si le nji che. Le pori “Ma ngʉe do na bbo.” Nde, Vanessa ká singʉe fø do djolu ngbaribbai? Le njingʉe ringangʉeni ndi njí ná lo ndiro ndi b’o ndi ronga d’e. Ddikpa muzee kongʉe le tsotso le tilo bbobbonga na. Ro, le lingʉe ndi thí ngbaribbai ma Yova b’ongʉe ndidzá njí dhi kpa ronga drrdrr nari djo maddi. Vanessa pori, “Ya kwanza djo ma ddingʉe nga nari ngʉe nabi Danieli. Ke le bungʉe ù hwi ná simba kʉ na ná bbù na nga mai kosa ro ngʉe ndi nǎ ro. Føro mai, Yova b’ongʉe ke ronga b’o dhé. Ma nzingʉeri Yova liri nzɨ fø ke di ngaddi ma djo, ndirigoti ke si fø kpakpalo si, føri ró ro ma ka ma njie ná d’ilo ro nga ngʉe ri. Føri goti, ma ngʉe na ná do singʉeni théi.”​—Da. 6:12-22.

NJɄ KÁ YOVA ADDU NJI?

8. U Daudi ungʉe nari ká ngʉe ngbá lo? (Zaburi 56:8)

⁸ Nì mai Daudi ngʉe bbo pli kʉ ná hatari nǎ Gati nǎ ro, ke nzɨ ngʉ adi ngaddi do tá ndi na ná lo djo dhé ri. Føri rɨngana, ke lingʉe ndi thí fø saa na Yova ngʉ nji ndi dho ná lo djo. Daudi chungʉeri chu nari kʉ Yova ngʉ chutso ddá ndi dho ndirigoti ke ngʉ ndi ronga b’ob’o goti ke ngʉ ngbaribbai ma ndi ndi mbu nari famu nì. (Azø Zaburi 56:8.) Føri kina, Daudi tsotso ndidhó bbakau kongʉe føri kʉ Yonatani ma, Bbò Kuhani Ahimeleki ma na. (1 Sa. 20:41, 42; 21:6, 8, 9) Ndirigoti nì mai Pi Sauli ngʉ rine ndi hwi ke hwi ro, Daudi gøngʉe ndidhó shinga gø. Ke ungʉeri u nari kʉ Yova chu ndi da lu ná lo ngbà ndirigoti ke chu ngbaribbai ma ndi ndi mbu nari ngbà.

9. Ko ddiddiro krʉ ká Yova adi nja ngbaribbai?

⁹ Do tá ni na ná lo na ni di bani ná saa na, anonga nari kʉ, Yova ni bani na ná lo nja nì ndirigoti ke ngbaribbai ma ni ni mbu nari ma nja ddi. Loroji na, Yova nzá njangʉe Mizri nǎ Israeli ngʉ bani nga kʉ chø ná lo na nari dhé ri, ro ke njangʉe kpa “ngʉ [nzani] nari maddi.” (Kut. 3:7) Daudi ngongʉe ri ɨ, Yova njangʉe ndidzá “nzadha” ma, ndi kʉ na ná “bbò njedha” ma na. (Zb. 31:7) Goti nza Mungu dzá ndrŭ ngʉ nzani ná saa djo, rie kpa vʉ lonanga che nari djotsina ma kpa nzani ró, “Mungu dho ma føri ngʉ adi njedha i bbʉ.”  (Isa. 63:9) Do tá ni na ná lo na ni di hwini ná saa na, Yova adi ngbaribbai ma ni ni mbu nari famu nì ndirigoti ke jiri bbo ndi kó ni tsotso ni si fø do djolu.

10. Addu dzá lo dho ká ni uri u Yova adi ni nja nì ndirigoti ke si ni tsotso ko nì kpakpalo na ni bani ná saa na?

¹⁰ Ni di hwini do ka ndi tá ni na ná lo tso ró ná saa na nzá ni ka ni nja Yova ni tsotso kó nari ri. Nde, ni ká ka ni njiri ngbǎ? Anziri ke kó ni tsotso ni nja kedhó le tsotsokodha. (2 Fa. 6:15-17) Føri goti addinga ɨ lo djo: Njudha dhi ngana ni rr e ná ddikpa hotuba inga komatere ká lie ni ro kpapka ddi? Ddikpa kichapo, video, inga ddikpa dyi ká lie ni ro kpakpa ddi? Ni dho ká ddikpa le dhoe kpakpa ka ndi li ni ná ngaddidha inga ddikpa andiko ro ddi? Ko djo-i ma, ko ve-i ma na dhó ro ko ba ná ngatsotsokodha ma, Mungu dzá lo koe ko tsotso ná nja chu ma na nga ka ndi vivi maddi ko ró. Ro, akononga nari kʉ føri kʉ Yova dhó ro si ná kado. (Isa. 65:13; Mk. 10:29, 30) Ri ridho nari kʉ ke adi ndi dyu lili ko ro. (Isa. 49:14-16) Goti ri ridho ko ka ko li ko thí li ke djo.

11. Addui ká kongʉe Aida tsotso nja ndi si do djolu d’e?

¹¹ Sénégal nǎ adi ná Aida njangʉe ngbaribbai ma Yova kongʉe ndi tsotso kpakpalo dhi saa djo nari nja. Le ngʉe ya kwanza ngba nari bbai, le dzá gø dhi ndrŭ ngʉ rib’o le ba mbø ndi ri na le kó ndi tsotso ndirigoti ndima tsotso maddi d’e. Ro, le ngʉngʉe ndidhó maisha sʉsʉ ndi ngʉ painia d’e, ro Aida bangʉeni mbø badha dhi kpakpalo na. Ledhó familia nǎ ndrŭ nanga kangʉeni bbo goti kpa ngʉ adi le ʉʉ. Le pori “Ma madhó gø dhi ndrŭ tsotso kó nzɨ nari ma, ndrŭ ka ndima bbae bbá nari ma na do ngʉ adi ma nji. Ma ngʉ adi chelo ma ti ni dhé Yova djo ke ribba lo gʉ ngʉ che nari dho.” Føri goti le rrngʉe ddikpa hotuba njudha dhi ngana. “Hotuba bbʉ ná ke pongʉeri nari kʉ rie ngbabø ma ko thí ronga vo ri ro, Yova chu føri chu dhé. Dzodzo, wazee ma nja ndrŭ ma na bbʉngʉe ma dho ná shauri chulu ma ungʉeri u nari kʉ Yova ji ma ji. Ma ngangʉe nganzidha tso Yova tsó u ma uri nari kʉ ke si ma tsotso koko ro, goti ma mbungʉe ma bbò  ngoi na ndirigoti ma ngʉ adi madhó sala goti ke ngʉ nari njanja.” Luti, Aida bangʉe njí ná njí na nzɨ le ngʉ adi ndi tsotso dhé kó upainia ndi nji nari kana ri, ro le ngʉ adi ndidzá gø dhi ndrŭ ma, nja ndrŭ ma na tsotso ma kó ddi. Le pori “Ma chungʉe ma thí nǎ ro krʉ ma ma thí li Yova djo nari, njʉ, b’lo ma nji sala nari goti, bí ina ma nǎ do adi sini théi.”

GO KÁ YOVA SI ADDU NJI?

12. Zaburi 56:9 ripo nari bbai, u Daudi ungʉe nari ká kʉ ngbá lo?

¹² Azø Zaburi 56:9. Fø verse dho Daudi singʉe ndi nǎ do djolu ná nja chu: Nì mai kedhó maisha ngʉe hatari nǎ ro, ke ngʉ adi ngaddi ndi dho Yova sie nji ná lo djo. Daudi chungʉeri chu nari kʉ Yova si ndi gø bblo saa djo nì. Føri djolu pli, Yova pongʉeri Daudi ka ndi sie ngʉ Israeli bbá pi. (1 Sa. 16:1, 13) Føri dho Daudi dho Yova njí ngbá tsodha ma ró, ke ngʉ adi føri nja b’lo njini nari bbai.

13. Ko ká ka ko u ngbá lo Yova djo?

¹³ Yova ká tsoni ndi si addu nji ni dho? Ko nzɨ adi rib’o Yova si kodhó kpakpalo krʉ ri. c Ro, anonga nari kʉ, rie ngbá kpakpalo na ma ni bani i dz’ djó ró, Yova si ri tso d’ø krʉ ø dz’ djó. (Isa. 25:7-9) Ko no ná Ke kʉ kpakpanga na ndi ga checheni ná ndrŭ, ndi gø ko ró dhe, goti ndi d’ø ko tso ró ddani ná ndrŭ tso krʉ.​—1 Yo. 4:4.

14. Ko ká ka ko ne longa bbo ngbá lo djo?

¹⁴ Do di ni nji ná saa djo, adi ngaddi gosi ná saa djo Yova si nji ná lo djo. Addinga nga shetani ma, chelo dhi ndrŭ ma, nzá le ka nari ma, ndirigoti chølo dhi ndrŭ dhé ka sie dz’ djó ná saa na ká ni ka ni si ni mbu ngbaribbai ma nari djo. Cho 2014 dhi asamble nǎ le dhongʉe ngbaribbai ma ko ka ko ddinga kodhó ngab’odha djo nari. Ddikpa nzø ba ma ngʉ loti ndidhó familia na ndrŭ na ngbaribbai ma le ka le si 2 Timoteo 3:1-5 na kʉ ná lo zø njonjo kʉ ná chu na Paradiso nǎ nari djo: “Ø dz’ djó ri sie hwè dhi saa. Dhonalo ndrŭ si jini ji ndima kana, ndrŭ si bbʉbbʉlo ji, ri sie ngbà chu ndima dhó mipaka ná ndrŭ, nyenyenga dhi ndrŭ, Mungu má ná ndrŭ, ngarr gø dhi ndrŭ dho ná nzø, mbai po ná ndrŭ, chi kʉ ná ndrŭ, jiji ndima dhó familia ná ndrŭ, nì rrni ndima kana ná ndrŭ, bblo lo ti ná ndrŭ, nì ndima tso cho ná ndrŭ, djødjøni ná ndrŭ, bblo lo ji ná ndrŭ, li djo le ka le li le thí ná ndrŭ, nzɨ ndima be ø ná ndrŭ, nzá djo dyu kpakpa ná ndrŭ, jiji Mungu ná ndrŭ nga pli ji hwè ná ndrŭ ri, goti bbʉbbʉ ndima ji Mungu ro; goti fø ndrŭ kuso adi chøchø.” Ni ká adi lo ro ti nì ngbaribbai ma maisha sie ø dz’ djo nari djo nidhó familia na inga ni lai Wakristo na?

15. Nì mai ndingʉe do na ro addui ká kongʉe Tanja tsotso nja ndi si ndi nǎ ddo djolu d’e?

¹⁵ Macédoine nǎ dyi adi si ná nga laidjó ddikpa le-ve Tanja singʉe ndi nǎ do djolu gosi ná saa djo ko si ba ná ledha djo ndi ngaddi nari chulu. Le dzá gø dhi ndrŭ tøngʉeni le tso ro Biblia zødha tso le nga ro. Le pori: “Nji do ma ngʉ nji ná njalo nganga i njingʉeni di. Madzá mama ngʉ adi ma nji krʉ ddoro njudha dhi ngana ro ma ngʉ nari goti. Madzá gø dhi ndrŭ pongʉeri ndima ma hwihwi njati ma ngʉ Yova dzá Dimu ró.” Luti, Tanja le dingʉe di ndima bbá ro. Le ká njingʉe ri ngbǎ? Le pori: “Njati ma tøni chi Yova dho ró ma sie na cho ro nŭnŭ ná hwè djo ma adi ngaddi. Føri kina ma adi ngaddi ngbaribbai ma Yova si ma ronga le Paradiso nǎ, i dz’ djó ma vi ná ritsi krʉ rɨngana nari djo ndirigoti  ngbaribbai ma chelo krʉ nga vivi nari djo.” Tanja tøngʉeni chi dhé. Ndirigoti Yova dhó le tsotsokodha chulu, le vengʉe ra didha dhi nga ba té. Njʉ, Tanja kørieni chi tøni ná ddikpa le-djo dho ndirigoti kpa adi njínji ddinga krʉ saa ró le nji ná njí kana.

ALINI THÍ YOVA DJO KPAKPA NJɄNGA DJÓ RO

16. Luka 21:26-28 nǎ kʉ ná lo ko nja ná saa na addui ká ka ndi kó ko tsotso ndiro ko tøni chi nga na do ro d’e?

¹⁶ Bbò mbudha dhi saa na, bí kʉ ná ndrŭ sie “do na bbo.” Ro, Mungu dzá ndrŭ si tøni chi goti ngana do ro. (Azø Luka 21:26-28.) Ko ká si do nji nzɨ addudho? Dhonalo ko sie b’lo ko chu Yova djo le le thí li nari ro. Anziro ko tielo djo ná Tanja pori, anziro ndi dangʉe lu ná lo kongʉe ndi tsotso ndi ve nja kpakpalo tso. Le pori. “Ma chungʉeri nari kʉ nzá Yova ka ndi si ná kpakpalo ro nga kʉ ri. Nja saa na ri adi njani nza ko nza ná ndrŭ dhó kpakpanga kʉ bbo nari bbai, ro kpa ko nzá Yova bbanga ndima dho nari dho dhé. Ndirigoti mbudha tso é ngbabø ma ndi o li ro ró, ri tso i si d’ød’ø dhé.”

17. Cho 2024 nǎ andiko ká ka ndi kó ko tsotso ngbaribbai? (Anja ri chuti ji.)

¹⁷ Njʉ do ka ndi njí le ngbà dhé. Ro, Daudi bbai nzɨ ko bba do si ko djolu. Kodhó cho 2024 dhi andiko nǎ kʉ Daudi nzingʉe Yova tso ná lo: “Ma do di nji ná saa na, ma adi ma thí li ni djo.” (Zb. 56:3) Biblia djo tilo ná ddikpa buku po fø verse djo nari bbai, Daudi “nzɨ ngʉ ngaddi ndi ngʉ bani na ná lo djo dhé ri inga ndidhó kpakpalo djo dhé ri.” Føri rɨngana ke ngʉ ndi thí li ndi tsotso ka ndi si ko ná Ke djo. Gosi ná bi kana addinga kodhó cho dhi i andiko djo, bbo pli njati rie do ta ni na ná lo tso ró ni hwini ri ró. Aba saa ni di ngaddi b’lo Yova nji ná lo ma, njʉ ke nji ná lo ma, gosi ná saa na ke si nji ná lo ma na djo. Føro Daudi bbai ni ka ni pori: “Ma li ma thí Mungu djó, ma nzɨ do ro njiri.”​—Zb. 56:4.