1. Bí ina ká ngbá lo do adi ndrŭ nji?

 AKONJA njinjieni ná i loroji. Nestor ma, ndibbá le María ma na jingʉeri ndima rá ngatsotso ko bbo uhitaji ngʉe ná ngana. * Ndiro ndima njí fø lo d’e, ringangʉeni kpa ngʉ ndima dhó maisha tso dhʉdhʉ. Ro kpa do ngʉ nji dhonalo kpa ngʉ riddi ndima nga ka ndima é bbʉbbʉ kʉ ná hwè na ri, njati ndima dhó mbø e bbo nga ro. Biniam ngʉngʉe Yova dzá Dimu gʉ kodhó lo gʉni ná bba gʉ, ke chungʉeri ndi kʉ Mungu dzá ndrŭ kana ddi ke nari dho, ndi ndrŭ ka ndima nzanza. Fø lo ngʉ do tá ke na. Ro bbo do ngʉ ke nji dho ná lo kʉ, ke ngʉ riddi ndidhó familia nǎ ndrŭ si ndi nja che ndi ngʉ d’i dini na ró. Valérie ró le bangʉe che pli kʉ ná kaser ná saa na, le ngʉ rine ndidhó operasio si nji nari é nì heshima bbʉ Biblia d’ra ju djo ná yadha dho ná ke. Føri dho, le do ngʉ nji dhonalo le ngʉ riddi ndi si dhedhe.

2. Ká addudho ringani ko njí kpakpanga ndiro ko si do djolu d’e?

² Ni ro ká fø di ná do njirie b’lo? Ko kana bí kʉ ná ndrŭ ro fø di ná do njirie b’lo. Njati ko é wangalifu nga fø di ná do kana ró, ko ka ko vʉ lo nanga che ndirigoti ri ka ndi lø Yova na kʉ ko kana ná kau ronga ma krʉ ddi. Føri i kʉ shetani ji ná lo. Ke adi do tá ko na ndiro nzɨ ko rrnga Yova dhó yadha dho ró, føri tsu lo ko d’ra nari ma ndi na ddi. (Ufu. 12:17) Shetani  kʉ che dha sani ná ke, nga nǎ zø kʉ ná ke ndirigoti kpakpa kʉ ná ke. Ro ri ka ndi kaka ni b’o ni ronga ke ró. Ká ngbaribbai?

3. Addui ká si ko tsotso ko, ko sisi do djolu?

³ Njati ko uri nari kʉ, Yova ji ko ji ndirigoti ke kʉ nì ko laidjó ró, ko ka ko sisi Shetani do tá ko na nari djolu. (Zb. 118:6) Loroji na, Zaburi 118 ndi ná ke ngʉ hwini kpakpa kʉ ná lo tso ró. Ke ró mbubai ngʉe bí, fø kpa kana ngʉe bbo chungʉeni ná kpa maddi (verse 9, 10). Nja saa na, ndrŭ ngʉ adi ke cho chelo njidha dho (verse 13). Ndirigoti ke bangʉe kpakpa kʉ ná malipizi Yova dhó ro (verse 18). Nì mai ri kʉ føro, ke ngongʉeni ɨ: “Ma nzɨ do ro nji ri.” Nde, addui ká lingʉeri ke mbu ndi ngoi na? Ke chungʉeri nari kʉ, ngbà mai Yova bbʉ malipizi ndi dho ro, ndidzá ra nǎ Baba ji ndi bbo. Zaburi ndi ná ke ungʉeri u nari kʉ, krʉ kpakpalo kana ndidzá ji dhi Mungu kʉ krʉ ddo ró tayari ndi tsotsokodha dho.​—Zb. 118:29.

4. Njati ko uri u Mungu ji ko ji ró, ká ko ka ko sisi ngbá do djolu?

⁴ Ringani ko uri u nari kʉ, Yova ji ko ddiddi ro krʉ. Njati ko u fø lo u ró, ri si rili ko sisi bí ina ndrŭ adi do nji ná gbo kʉ ná i lo djolu: (1) kodhó familia dhó lo tso ko gba nari do ko nji nari, (2) ndrŭ do le nji nari ndirigoti (3) dhe do le nji nari. Anziro e ná paragrafu nǎ le tielo djo ná le-djoi ma, le-vei ma na sie si do djolu dhonalo kpa ueri u Mungu ji ndima ji.

5. Ri ká kʉ ngbá lo i ka ndi liri dzaba nanga ri di d’o bbo? (Anja ri chuti ji.)

⁵ Mukristo kʉ ná dzaba dho ringani ndi gba ndidhó familia dhó lo tso. (1 Ti. 5:8) Njati ni é dzaba ró, njaro Corona dzá lo dho ni vi nidhó njí vi. Njaro ni doe nji nidhó familia ni ngu ndirigoti dza tso ni dzi kpa dho nari dho. Njaro ni e do na dho ná lo kʉ, njati ni vi nidhó njí ró ni nzá ka ni ba d’i njí ki ro ri. Inga anziro ko tielo djo ná Nestor ma, María ma na bbai, njaro ni riddi sese kʉ ná mbø nzá ka ndi gba nidhó lo tso ri. Afø di ná lo chulu Shetani liri bí kʉ ná ndrŭ bbá Yova dho ndima njínji nari tso bbá.

6. Shetani ká adi rine ko u ngbá lo?

⁶ Shetani adi riji ko uri nari kʉ, Yova nzá ji ko ri ndirigoti ke nzá ka ndi kó ko tsotso ko gba kodhó familia dhó lo tso ri. Føri dho, ko ka ko di riddi nari kʉ, ringani ko njí krʉ kʉ ná lo ndiro nzɨ kodhó njí bba ko ró. Ko ka ko di rine ko njí krʉ kʉ ná njí ri é sa ma ri ka ndi sa ko kana kau Mungu na ri ró.

7. Ko ká ka ko u Yesu pongʉe ná ngbá lo?

⁷ Yesu chungʉe ndidzá Baba bblo pli krʉ kʉ ná ndrŭ djolu, ke pongʉeri nari kʉ: “Nidhi Baba chu nidhó lo ji ná ritsi, ri ni nzǐ nari njí.” (Mt. 6:8) Ndirigoti Yesu churi nari kʉ, Mungu kʉ tayari ndi gba kodhó lo ji ná ritsi tso. Ko kʉ Wakristo nari bbai ko churi nari kʉ, ko kʉ Mungu dzá familia kana. Yova kʉ familia djǒ nari dho ko ka uri u nari, ke ka ndi njí dzábai dho ndi po 1 Timoteo 5:8 nǎ ná lo nganga.

8. (a) Addui ká ka ndi kó ko tsotso ko sisi kodhó familia dhó lo tso ko gba nari do ko nji nari djolu? (Matayo 6:31-33) (b) Ji djó kʉ ná nyo bbʉ ddikpa le-ve dho ná dza dhi ndrŭ dhó loroji ká ko ka ko dyø ngbaribbai?

⁸ Njati ko uri u Yova ji ko ji ndirigoti ke ji kodhó familia maddi ró, ko ka uri u nari kʉ ko ka ko ba kodhó lo ji ná ritsi ngbà. (Azø Matayo 6:31-33.) Yova kʉ jidha na ndirigoti ritsi adi bbʉ ná ke nari dho, ke jiri ji ndi gba kodhó lo tso! Loroji na, dz’ ke nongʉe ná saa na ke nzá bbʉngʉe shi ko ka ko di dho ná ritsi dhé ri, jidha djotsina ke nongʉe hwè ka  ndi bbʉ ko dho ná bí kʉ ná ritsi. (Mwa. 2:9) Njati nja saa na, kodhó ritsi é bbo nga ma ró ringani ko no nga nari kʉ kodhó kʉ ná ritsi ko ba dho nari kʉ Yova i liri ko ba ri. (Mt. 6:11) Ringani ko no nga nari kʉ, Yova si bbʉ ko dho ná ritsi si dada bba ko bba ná ritsi djolu. Ndirigoti go si ná saa na Mungu si choro nŭnŭ di ná shinga bbʉ ko dho. Føri i kʉ Nestor ma, María ma na famungʉe ná lo.​—Isa. 65:21, 22.

9. Nestor ma, María ma na dhó loroji nǎ ro ká ni ba ngbá somo?

⁹ Nestor ma, María ma na ngʉe Colombia nǎ ná saa na, kpadhó ngʉe bblo kʉ ná dza ndirigoti bblo kʉ ná njí. Kpa pori “Ko ddingʉe nga dhʉdhʉ ko ka ko ngʉ ko dhó maisha tso ndirigoti ko rá anzi kodhó lod’radha dhi njí na nari djo, ko do ngʉ nji dho nari kʉ, ko nga ka ko é hwè na kodhó mbø é sese ró ri.” Nde, kpa tsotso ká addu kongʉe ndiro ndima si fø do djolu d’e? Kpa ddingʉe nga Yova dho jidha ndima dho ná bí kʉ ná chu djo. Kpa ungʉeri u Yova gba ndima dhó lo tso krʉ ddo ró nì nari dho, kpa bbangʉe ndima dhó bblo e ná njí bba. Kpa dzingʉe ndima dhó dza nanga ndirigoti kpa tsɨngʉe bbo wahubiri dhó uhitaji kʉ ná ngana. Kpa ká mbungʉe ndima ngbaribbai ndima vʉngʉe lo nanga fø nari dho? Nestor pori: “Ko njangʉe Matayo 6:33 nǎ kʉ ná lo dzá bbʉbbʉ nga nja. Ko nzá kosangʉe kimwili nǎ ddikpa ritsi ro maddi ri. Ndirigoti kpadjo ko kʉ hwè dhi maisha na.”

10. Ndrŭ ndima lai ndrŭ do nji nari kʉ ngbà le ka le famu ná lo dho nari ká kʉ addu?

¹⁰ Adamu ma, Eva ma na tsangʉe Yova ro ná nga djó ro, ndrŭ adi che kʉ ná lo nji ndima lai ndrŭ ró. (Muh. 8:9) Loroji na, bbobbonga na kʉ ná kpa adi njini d’idhé ndrŭ na, jeuri dhi kpa adi che kʉ ná lo nji ndrŭ ró, darasa nǎ fudjo dhi nzø adi ndima lai nzø dhudhu ma, nzø adi njini ndima lai nzø na d’idhé ma, ndirigoti nja ndrŭ adi ndima dhó familia nǎ ndrŭ nzá bbo. Føri dho ndrŭ ndima lai ndrŭ do nji ná føri nzá ka ndi ke le nanga ri! Ndrŭ do ko nji ná saa na, ká Shetani adi rine ndi ba ngbá faida ko nǎ ro?

11-12. Shetani ká adi ndrŭ do tá ko na ngbaribbai?

¹¹ Shetani adi rili ko njí ndrŭ do ndiro ko bbá lod’radha dhi njí tso d’e. Shetani adi guvernema cho ndiro kpa gʉ kodhó njí gʉ ndirigoti kpa nzá ko nza d’e. (Lu. 21:12; Ufu. 2:10) Shetani dhó dz’ djó, bí kʉ ná ndrŭ che kʉ  ná loti ndirigoti kali sha Yova dzá Dimu djo. Fø kali dhi lo u ná ndrŭ adi ko bé pá ndirigoti kpa adi che lo nji ko ró kimwili nǎ. (Mt. 10:36) Ko nanga ká ka ndi keni ke Shetani njínji na ná fø ufundi dho? Nzá nganga. Dhonalo fø di ná ufundi na ke njingʉe njí ro karne ya kwanza na maddi.​—Mdo. 5:27, 28, 40.

¹² Guvernema ko nzá nari do ko nji, ná føri dhé nga kʉ Shetani la nji ko na ná chu ri. Nja kʉ ná ndrŭ ndima dhó familia ká si ndima nja ngbaribbai ma, ndima ngʉ Yova dzá Dimu ró nari do adi nji. Kpa jirie ndima dhó familia bbo ndirigoti kpa adi riji ndima dhó familia chu Yova ndirigoti kpa ji ke. Ro kpa thí adi njedha ba njati kpa rá riutso d’i ndima dhó familia nzɨ heshima bbʉ bbʉbbʉ Mungu dho ndirigoti ke má ná ndrŭ dho ri ró. Nì mai ri kʉ føro, familia nǎ gʉe lo gʉ anziro ná ndrŭ adi ra bbʉbbʉ lo uu luti. Ro ko ká ka ko ddiri ko ngʉ Yova dzá Dimu nari dho, kodhó familia nzá ka ndi njí ddikpa lo maddi ko dho ri? Nde, ko ká ka ko njini ngbaribbai?

13. Mungu ji ko nari ko u nari ká ka ndi kó ko tsotso ngbaribbai, kodhó familia bbá ko bbá ná saa na? (Zaburi 27:10)

¹³ Ko iso ka ndi pɨ ná bblo kʉ ná lo bani Zaburi 27:10. nǎ (Azø.) Ko ka ko é ngoi na nza ndrŭ ko nzá ná saa na, ko di ngaddi ngbá ngatsi ma Yova ji ko nari djo ró. Ndirigoti ko uri u nari kʉ, ke si ko kobe bbʉ ko ngatsove nari dho. Yova si maisha nǎ kodhó lo ji krʉ ná ritsi bbʉ ko dho, ke si ko tsotso ko ko é ngoi na ndirigoti hwè na. Ko kana nga sie chøchø ke na krʉ kʉ ná ndrŭ djolu. Føri kʉ anziro ko tielo djo ná Biniam, famungʉe ná lo dzá bbʉbbʉ nga.

14. Biniam dhó loroji nǎ ro ká ni ba ngbá somo?

¹⁴ Biniam ngʉngʉe Yova dzá Dimu, ngbà mai ke chungʉeri føri dho ndi si bani njonjo kʉ nzadha na ro. Akonja ngbaribbai ma Yova ji ndi nari Biniam chungʉe nari kongʉe ke tsotso ndi si ndrŭ do ndi nji nari djolu nari. Ke pori: “Ndi bangʉe ná nzadha dada ndi ngʉ riddi nari djolu. Ro madhó familia dhó ro ma ngʉ ba ná upinzani ngʉ do tá bbo ma na, serikali dhó ro ma ngʉ ba nari djolu. Ma ngʉ do nji ma vʉri ma ngʉ Yova dzá Dimu nari dho, dhonalo madzá baba nanga nzá ka ndi jini ri ndirigoti madhó familia ka ndi njaeri ma nzá vʉ longa bblo ri.” Nì mai ri kʉ føro, Biniam ungʉeri u, Yova adi ngaddi ngbà ji ndi ná ndrŭ krʉ ddo ró. Biniam pori: “Ma ddingʉe nga ngbaribbai ma, Yova kongʉe nja ndrŭ  tsotso ndima ve mbø le kosa nari ma, ubanguzi ma, ndirigoti chelo ndrŭ nji le ró nari ma na tso nari djo. Ma chungʉeri nari kʉ, ma tøni chi ngbà Yova dho ró, ke si ma ronga le le. Bí ina, kpa sʉngʉe ma ndirigoti kpa njingʉe ma ná saa na, ma njangʉeri ma ma ro nari kʉ Yova adi ko tsotso kó nì njati ko tøni chi ngbà ndi dho ró.” Biniam njangʉe Yova ndidzá Baba nganga bbai ndirigoti kedzá ndrŭ dhongʉe ndima Biniam dho bbʉbbʉ kʉ ná familia bbai.

15. Dhe do le nji nari nga kʉ che ri dhonalo ká kʉ addu?

¹⁵ Biblia ri d’ra nari kʉ dhe kʉ mbuba. (1 Ko. 15:25, 26) Ko ró ji ko ji ná le é dhe na bbo inga ko é dhe na bbo ró, dhe djo ko ngaddi nari ka ndi tá do ko na bbo. Dhe do ká ko adi nji addudho? Dhonalo Yova no ko nǎ ná tamaa kʉ ko njí maisha hwè theinga dho. (Muh. 3:11) Ro ko di dhe do nji nari ka ndi kó ko tsotso ko b’o kodhó shinga ronga b’o. Loroji na, ri ka ndi cho ko ronga ko vʉ lo nanga bblo nyo djo ma, mazoezi djo ma ndirigoti ri ka ndi kó ko tsotso ko rá munganga dhi ngana kodhó lo ú matunzo ró, ndirigoti ri ka ndi kó ko tsotso ko pʉ hatari na ka ndi tsu kodhó shinga ná lo ko ró ro.

16. Shetani ká adi rine ndi njinjí dhe do ko nji ná chu na ngbaribbai?

¹⁶ Ko ji rie kodhó shinga ji nari Shetani chu ngbà. Nì mai ri kʉ føro, ke rine ko uri nari kʉ ko ka ko bbʉ krʉ kʉ ná ritsi ndiro kodhó njʉ kʉ ná shinga ronga b’oni d’e njati rie sa ma ndi dhiri ka ndi sa ko kana kau Yova ma na ri ró. (Yob. 2:4, 5) Ro, Shetani kʉ kali sha na ke! Shetani kʉ “dhe si dhó ro ná ke,” nari dho ke adi rine ndi njinjí dhe do ko nji ná fø chu na ndiro ko bbá Yova dho ko njínji nari tso d’e. (Ebr. 2:14, 15) Nja saa na, Shetani dhó bbonga tsena kʉ ná ndrŭ adi rine ndima che ko che, ko nzɨ Yova dho ko tøni chi nari tso ro bbari nari dho. Nja saa na, kodhó lo u lelé kʉ ná matunzo ró, Shetani adi njínji fø chu na ndiro ko bbá chi ko tøni nari tso d’e. Kodhó munganga inga kodhó familia nǎ nga kʉ Yova dzá Dimu ná ndrŭ ka ndima cho ko, ko uri le tsu ju ko ndí na ndiri na ko tani Mungu dhó yadha dho d’e. Inga nja saa na, nja ndrŭ ka ndima cho ko, ndiro ko u nzá tso gbani Biblia nǎ kanuni na ná matunzo d’e.

17. Waroma 8:37-39 ripo nari bbai, ká addudho ringani nzɨ le nji dhe do?

¹⁷ Nzá mai ko ji ko dhedhe ro, ko churi nari kʉ, njati ko dhedhe ma ró Yova nzɨ dhé bba ko dho ndi jidha dhǒ nari tso ro ri. (Azø Waroma 8:37-39.) Yova adi ndidzá bbakau nga no nì njati kpa dhedhe inga kpa é shi ma ró. (Lu. 20:37, 38) Ke jiri ndi si b’lo dhedhe ná kpa ki ngʉ shi. (Yob. 14:15) Yova dzingʉe ko bbo kʉ na dzi na ndiro ko “ba . . . nŭnŭ di ná shinga d’e.” (Yoh. 3:16) Ko chu ngbá ngatsi ma Yova ji ko ndirigoti ke ngaddi ko djo nari ngbà. Føri dza lodho, dhe ko nji ná saa na, ko njínji Yova dho nari tso ko bba nari rɨngana, ringani ko li ko thí kedhó leisopɨdha ma, nyodyu ma, kpakpanga ma na djo. Føri kʉ Valérie ma ndibbá ke ma na njingʉe ná lo nganga.​—Zb. 41:3.

18. Valérie dhó loroji nǎ ro ká ni ka ni ba ngbá somo?

¹⁸ Valérie dhó cho ngʉe 35 ná saa na le ro le bangʉe che pli kʉ ná kaser dhi dhe. Anja ngbaribbai ma jidha koe le tsotso ndiro ndi si dhe do ndi nari djolu nari. Le pori: “Ma chungʉeri ma ró kʉ kaser ná saa na, føri bbʉngʉe njedha ko dho ma bbá ke ma na. Madhó lo ungʉe bbo operasio ndiro ma di shi d’e. Ma tingʉelo bí kʉ ná wanganga na, ro kpa krʉ gʉngʉe ngadhi ju ro ndima madhó operasio  nji nari gʉ. Ma do ngʉ nji bbo, ro ma chu Mungu dhó yadha nari dho ma gʉngʉe ju le tsu ma ndí na nari gʉ! Madhó maisha lu kana Yova dhongʉe jidha bbo ma dho. Ndirigoti ma bangʉe saa ndiro ma dhǒ jidha ke dho d’e. Krʉ saa ró, wanganga dhó ro ma ngʉ rr ná chelo ngʉ adi rili ma nanga vʉ ná lo liri Yova mbu ndi bblo, ndirigoti nzɨ ma bbá nga Shetani dho. Føri dza mwisho djó, le njingʉe madhó operasio ngadhi ju ro dhé. Fø hali krʉ kana Yova kongʉe ko tsotso ko ba kodhó lo ji ná ritsi krʉ ddo ró. Loroji na, ma ro le ba fø dhe nari njí ko njingʉe yenga dyi ná njudha nǎ, le tingʉe lo djo ná lo ngʉ ripo ‘Kupambana na Matatizo ya Leo kwa Ujasiri.’ * Fø lo lingʉe ko kpakpa bbo. Ko zøngʉe ri ndirigoti ko zøngʉe ri nanga ki bí ina. Fø lo ma, lo ko d’ra nari ma, njudha ko nji nari ma na kongʉe ko tsotso ko é ngoi na ndirigoti ri lingʉeri ko vʉ longa bblo.”

19. Karr goti ká ngbá lo si njini?

¹⁹ Yova dhó letsotsokodha chulu, dz’ djolu gble kʉ ná Wakristo adi sisi njonjo kʉ ná kpakpalo djolu ndirigoti Shetani dhó ro si ná upinzani djolu. (1 Pe. 5:8, 9) Ni dho ma føri ka ndi ka ddi. Karr nga goti Yova si rusha bbʉ Yesu ma dho, pi ke ma si nyo na ná kpa ma na ndiro kpa “sa Ibilisi dhó njí d’e.” (1 Yo. 3:8) Føri goti Mungu dho njínji dz’ djó ná ndrŭ nzɨ si “do ro nji ri ndirigoti do ta kpa na ná ritsi ro ma ngaddi sie ri.” (Isa. 54:14; Mik. 4:4) Føri dho, kpadjo nga djo ro ringani ko njí kpakpanga ndiro ko si do djolu d’e.

20. Ko tsotso ká addu si ko ndiro ko si do djolu d’e?

²⁰ Ri ngani ko li kodhó udha kpakpa Yova ji ndidzá njí dhi kpa ji ndirigoti ke adi kpa ronga b’ob’o nari djo. Ndiro ko njiri fø d’e, si ko tsotso ko nari kʉ, ngbaribbai ma Yova b’ongʉe ndidzá ndrŭ ronga anziro nari djo ko ngaddi ndirigoti ko loti ri djo nari. Ndirigoti ko ka ko ddinga ke koe ko tsotso anziro ko hwini ko baeni na ná kpakpalo na nari djo maddi. Yova dhó letsotsokodha chulu ko ka ko sisi do djolu!​—Zb. 34:4.