SOMO 33
Mungu dhó Pidhinga si nji ná lo
Mungu dhó Pidhinga kʉ b’lo ndi nga pinyodha tso ro. Karr nga goti, ri si dz’ djó lo thika ø bbo. Akonja Mungu dhó pidhinga si nji ná bblo lo.
1. Mungu dhó Pidhinga ká si ngoi ma, chølo ma na ngʉ dz’ djo ngbaribbai?
Mungu dhó Pidhinga nǎ Pi, Yesu si chelo nji ná ndrŭ sasa ndirigoti ke si ndrŭ dhó che kʉ ná guvernema krʉ tso d’ød’ø Armagedoni dhi lɨ na. (Ufunuo 16:14, 16) Fø saa na si njini nari kʉ Biblia nǎ ɨ tsodha: “Karr nga goti chelo dhi ndrŭ ki ro ka sie nga.” (Zaburi 37:10) Mungu dhó Pidhinga chulu, Yesu si bbʉbbʉ kʉ ná ngoi ma, chølo ma na ngʉ dz’ djo.—Azø Isaya 11:4.
2. Mungu ji ná lo si njini dz’ djo ná saa na ká maisha sie ngbaribbai?
Mungu dhó Pidhinga tse na, “chølo dhi ndrŭ si dz’ wɨ ba ndirigoti ndrŭ si di ri djó theinga dho.” (Zaburi 37:29) Anzi ngaddi i lo djo! Dz’ djó ndrŭ krʉ sie bblo, chølo ndima nji ro, ji ndima jini ndima kana ro. Ddikpa le ro ma nzɨ ddi dhe si njì ri, ndirigoti ndrŭ krʉ si di cho ró nŭnŭ.
3. Mungu dhó Pidhinga ká si addu nji b’lo chelo dhi ndrŭ sani nari goti?
Chelo dhi ndrŭ le sa nari goti, Yesu si pinyo cho 1000 dho. Fø cho kana, Yesu ma si pinyo na ná 144 000 kʉ ná kpa ma na, ke ma si dz’ djó ndrŭ ngʉ kaka ná ndrŭ. Fø cho tso dyani nari goti, dz’ lu si ngʉ bblo thonga ná paradiso. Ri djó kʉ ná ndrŭ sie hwè na dhonalo ndrŭ si ngarr Yova dhó yadha dho. Føri goti Yesu si pidhinga ngʉ ndidzá Baba, Yova dho na. “Yova ró dho [si] tsetse” nzá ri ro d’erie tse ná ngatsi. (Matayo 6:9, 10) Ri si dhoni dho pʉlʉ nari kʉ, Yova kʉ ni ngaddi ndidzá ndrŭ djo ná Pi. Føri goti Yova si Shetani ma, gó ma, ndirigoti tsatsá ndidhó Pidhinga ró ná ndrŭ krʉ sasa. (Ufunuo 20:7-10) Mungu dhó Pidhinga si nji ná bblo lo si di theinga dho.
ANE LONANGA BBO
Anja addudho ma ko ka ko uri u Biblia nǎ kʉ ná tsodha Mungu si njinji ndidhó Pidhinga chulu nari.
4. Mungu dhó Pidhinga si ndrŭ dhó guvernema tso d’ød’ø
“Ndrŭ pinyo ndrŭ djo ndima vú na vu ndrŭ ró d’e.” (Muhubiri 8:9) Yova si nga kʉ chø ná fø lo njini nari sisi ndidhó Pidhinga chulu.
Azø Danieli 2:44 ndirigoti 2 Watesalonike 1:6-8, ndirigoti anitilo i ngadhudha djo:
-
Ndrŭ dhó Pidhinga ma, ri tsotso kó ná ndrŭ ma na ró ká Yova ma si rinji ngba ndidzá Ngba Yesu ma na?
-
Yova ma, Yesu ma na djo ni chu ná lo ká rili ni uri nari kʉ, kpa si chø kʉ ná lo nji ndrŭ dho ngbaribbai?
5. Yesu kʉ kaka ná Pi
Mungu dhó Pidhinga nǎ Pi, Yesu si ndrŭ tsotso ko njonjo kʉ ná chulu. Aninja VIDEO ndiro ni nja ngbaribbai ma Yesu dhongʉeri nari kʉ, ndi jiri ji ndi kó ndrŭ tsotso ndirigoti ndi kʉ Mungu dhó ro si ná kpakpanga na ndi nji føri d’e nari.
Yesu ngʉe dz’ djó ná saa na, ke ka Mungu dhó Pidhinga si nji ná lo dho dho. I liste djó kʉ ná ledha kana ro, bbo ni adi b’o nari ká kʉ ngba ri? Azø fø ledha goti ro le ndi ná maandiko.
|
DZ’ DJÓ YESU NGɄE NÁ SAA NA . . . |
RA NǍ RO YESU SI . . . |
|---|---|
|
|
|
|
|
|
|
|
6. Mungu dhó Pidhinga si bblo lo nji gosi ná saa na
Mungu dhó Pidhinga si ndrŭ dho Mungu pɨngʉe anziro ná lo krʉ njinji. Ndrŭ si di theinga dho paradiso kʉ ná dz’ djó. Aninja VIDEO ndiro ni nja ngbaribbai ma Yova si ndi pɨngʉe ná lo nji Yesu chulu nari d’e.
Azø Zaburi 145:16, ndirigoti anitilo i ngadhudha djo:
-
Yova si “shi di ná ritsi krʉ dhó tamaa tso gbagba” nari ni chu nari dho ká ni ni mbu ngbaribbai?
NJA NDRŬ ADI RIPO: “Njati ko tso gbani ddi ró, ko ka ko si dz’ djó kpakpalo si.”
-
Mungu dhó Pidhinga ká si ngba lo si, nzá ndi ro ka ndi sini ndrŭ dhó guvernema dho ro?
LO DZÁ DɄNGA
Mungu dhó Pidhinga si Mungu ji ri njí ná lo nji. Dz’ lu djó nga ri si ngʉ paradiso, lɨ ndi djó nga lɨ Yova dho si madha bbʉ theinga dho ná ndrŭ na ro.
Lo djolu le ngʉ nari
-
Mungu dhó Pidhinga ká si rili Yova ró dho tsetse ngbaribbai?
-
Addu dzá lodho ká ko ka ko uri u, Mungu dhó Pidhinga si Biblia tsoni djo ná lo njinji?
-
Mungu dhó Pidhinga si nji ná lo kana ro, bbo ni b’o nari ká kʉ ngba lo?
NI KA NI CHU NÁ NJA LO
Aneri ni chu Armagedoni na mana.
“Vita ya Armagedoni Ni Nini?” (Jw.org djó kʉ ná lo)
Aneri ni chu cho 1000 kana Yesu si pinyo ro si njini ná lo ndirigoti fø cho goti si njini ná lo.
“Mambo Gani Njo Itafanyika mu Siku ya Hukumu?” (Munara wa Mulinzi, 1 Mwezi wa 9, 2012)
Anja ngbaribbai ma familia nǎ ndrŭ ka ndima ddinga Mungu dhó Pidhinga si bbʉ ná ledha djo nari.
Anja gʉ ngʉ adi serikali gʉ ná ke bangʉe ndi ngʉ adi ne ná lo nari, ɨ djǒ ripo ná lo nǎ “Maulizo Mingi Sana Ilikuwa Nanihangaisha.”
“Biblia Inabadilisha Maisha ya Watu” (Munara wa Mulinzi, 1 Mwezi wa 1, 2012)
