Yesu pongʉeri Wakristo dho ringani ndima ba batiso. (Azø Matayo 28:19, 20.) Nde batiso ká kʉ addu? Ndirigoti ddikpa le dho ká ringani ndi njiri ngbǎ ndiro ndi tso si fø muradi djo d’e?

1. Batiso ká kʉ addu?

“Batiso” si Kigiriki nǎ ro, nari na mana kʉ “lu lé le ti” dda na nari. Yesu bangʉe batiso ná saa na, ke le tingʉe lu Yordani dhi dda na ndirigoti ke vʉngʉe vʉ “dda nǎ ro.” (Marko 1:9, 10) Føri bbai bbʉbbʉ Wakristo le adi ti lu dda na.

2. Batiso ká adi ngba lo dho?

Batiso ddikpa le ba nari na, le ridho ndi jiri ndi bbʉ ndi Yova Mungu dho. Ddikpa le ká ka ndi bbʉ ndi Mungu dho ngbaribbai? Batiso lé ba nari nji, ddiro le nji ná sala nǎ, lé adi ripo Yova dho le jiri le njínji ke dho ledhó maisha lu nǎ. Le adi tsoni le bbʉ madha Yova ddiro dho dhé ndirigoti ke ji nari le nji nari sie bbo na mana kʉ ná lo ledhó maisha nǎ. Le adi rivʉ “le gʉ le leléro . . . ndiro le dyø” Yesu dhó mafundisho ndirigoti kedhó loroji d’e. (Matayo 16:24) Yova dho le bbʉ le ndirigoti le ba batiso nari ka ndi liri le kana kau e chøchø Yova na ndirigoti nja Wakristo mana.

3. Ddikpa le dho ká ringani ndi njí addu batiso ndi ba nari nji?

Batiso ni ba nari nji nidho ringani ni chulo Yova djo ndirigoti ni e kpakpa kʉ ná udha na ke djo. (Azø Waebrania 11:6.) Njati nidhó lochudha ma, nidhó udha ma na di dhidhi ró, nidhó jidha ma si dhidhi ddi Yova djo. Fø ro ni si riji ni d’ralo ke djo ndirigoti ni si riji ni di kedzá yadha nji. (2 Timoteo 4:2; 1 Yohana 5:3) Ddikpa le di “ngarr Yova dho ke nyo tho ná lo dhé ndi nji nari chulu ró,” le ka ndi vʉri ndi bbʉ ndidhó maisha Yova dho ndirigoti ndi ba batiso.​—Wakolosai 1:9, 10. a

 ANE LONANGA BBO

4. Yesu dhó batiso nǎ ro ko ka ko chu ná lo

Azø Matayo 3:13-17 ndiro ni chulo bbo Yesu dhó batiso djo d’e. Ndirigoti anitilo i ngadhudha djo:

• Yesu ká bangʉe batiso kalʉ ro?

• Ke ká bangʉe batiso ngbaribbai? Ke djo ká le ddongʉe dda ddo?

Yesu ngangʉe Mungu bbʉngʉe ndi dho ná bbo na mana kʉ ná njí tso batiso ndi ba nari goti. Azø Luka 3:21-23 ndirigoti Yohana 6:38, ndirigoti anitilo i ngadhudha djo:

• Batiso Yesu ba nari goti, ká ke lingʉe ngbá njí anziro ndidhó maisha nǎ?

5. Batiso kʉ ngbà djo ni tso ka ndi si ná muradi

Mungu dho lé le bbʉ ndirigoti le ba batiso nari ka ndi njani kpakpa nja saa na. Ni mai ri kʉ fø ro, ni ka ni njí maendeleo nja ni vʉ bbo na mana kʉ ná fø longa d’e. Ndiro ni chu fø njingʉeri ná kpa ro d’e, aninja VIDEO.

Azø Yohana 17:3 ndirigoti Yakobo 1:5, ndirigoti anitilo i ngadhudha djo:

• Addui ká ka ndi kó ddikpa le tsotso ndiro le e tayari batiso dho d’e?

1. Yova dho ko ko bbʉ nari chulu, ko adi ridho ko jiri ko njinjí ke dho theinga dho

2. Batiso chulu ko adi ridho nja ndrŭ dho nari kʉ, ko bbʉ ko bbʉ Mungu dho

 6. Batiso ko ba ná saa na, ko adi tsu Yova dzá familia kana

Batiso ko ba ná saa na, ko tso adi gbani ddi dz’ lu djó ddi tso gbani ná familia na. Yova dzá Dimu krʉ dhó udha e ddikpa ndirigoti kpa adi ngarr ddikpa yadha dho rie ngbaga ro ma kpa si inga rie ngbaga ma kpa di ri ró. Azø Zaburi 25:14 ndirigoti 1 Petro 2:17, ndirigoti anitilo i ngadhudha djo:

• Batiso ká ka ndi liri ddikpa le ma kana kau e ngbaribbai Yova na ndirigoti nja Wakristo na?

 LO DZÁ DɄNGA

Yesu ddingʉeri Wakristo dho ringani ndima ba batiso. Ndiro le tso si fø muradi djo d’e, ringani le li ledhó udha kpakpa Yova djo, le dyø kedzá yadha ndirigoti le bbʉ le ke dho.

Lo djolu le ngʉ nari

• Batiso ká kʉ addu, ndirigoti ri ká kʉ mana na addudho?

• Mungu dho lé le bbʉ ndirigoti le batiso ba nari ká dhǒ ngbá lo?

• Mungu dho lé le bbʉ ndirigoti le batiso ba nari nji ká ringani le njí ngbá lo?