SOMO 17
Yesu ká kʉ ngba di ná ke?
Ko di lochu ɨ dz’ djó Yesu ngʉe ná saa na, ke ngʉ po ndirigoti ke ngʉ nji ná lo djo ró, ko adi lochu bbo kedhó sifa djo ndirigoti føri ka ndi liri ko kana nga ngʉ chøchø ke na ndirigoti kedzá Baba Yova na. Kedhó pʉlʉpʉlʉ adi njani nari ká kʉ ngbá sifa? Ndirigoti ko ká ka ko dyø Yesu ngbaribbai kodhó maisha nǎ?
1. Yesu ká kʉ ndidzá Baba bbai ngbá chu nǎ?
Ra nǎ, Yesu ngʉ adi ngbaribbai ma ndidzá jidha dhi Baba adi njini nari njanja ndirigoti ke chungʉe lo bbo kedhó ro cho bí kana. Føri lingʉeri ke di ngaddi, ke di ndi mbu ndirigoti ke di njini ndidzá Baba bbai. (Azø Yohana 5:19.) Ndirigoti Yesu ngʉ adi ndidzá Baba dhó sifa dyø kaka nari bbai, føri dho ke pongʉeri: “Ddikpa le nja ma b’lo ró, fø le nja Baba b’lo.” (Yohana 14:9) Njati ni chulo Yesu dhó sifa djo ró, ni ka ni chu Yova bblo pli. Loroji na, Yesu ngʉ adi zølo dho ndrŭ dho nari ngbaribbai ma Yova adi ndi mbu ni djo nari dhǒ.
2. Yesu ji Yova ji nari ká ke dhongʉe ngbaribbai?
Yesu pongʉeri ɨ: “Ndiro dz’ churi nari kʉ ma ji Baba d’e, ma adi Baba po ma njí ná lo dhé nji.” (Yohana 14:31) Dz’ djó Yesu ngʉe ná saa na, ke dhongʉe jidha bbo ndidzá Baba dho nga ndi rr ke dho nari chulu, ni mai nja saa na ringʉe kpakpa ke njiri fø ro. Ndirigoti Yesu jingʉeri bbo ndi tilo ndidzá Baba djo ndirigoti ke ngʉ adi nja ndrŭ tsotso kó ndiro fø ndrŭ kana nga ngʉ chøchø Yova na d’e.—Yohana 14:23.
3. Yesu ká dhongʉe ndi ji ndrŭ ji nari ngbaribbai?
Biblia ripo Yesu kʉ “bbo pli ji ndrŭ ná ke.” (Mezali 8:31, maelezo ya chini) Fø jidha ke dhongʉe kpakpa ndi ngʉ ndrŭ li ndirigoti pá ndi ngʉ ndrŭ tsotso kó nari chulu. Ke ngʉ nji ná ddù nzá dhongʉeri nari kʉ, ke kʉ kpakpanga na dhé ri, ro ri ngʉ ke kʉ na ná zølo ma dho ddi. (Marko 1:40-42) Ke ngʉ adi njini ndrŭ na bblo ndirigoti nzá ndi krø ndrŭ nanga krø ro. Ke tso nǎ lo ngʉ ndrŭ iso pɨpɨ ndirigoti ri ngʉ rili kedzá lo rr ná ndrŭ kana ro, nì thí kʉ bblo ná ndrŭ krʉ é ngab’odha na. Yesu ungʉeri ndi nzani nza ndirigoti ndi dhedhe dhonalo ke jingʉe ndrŭ krʉ ji. Ro bbo ke ji nari kʉ ndidzá mafundisho dyø ná ndrŭ.—Azø Yohana 15:13, 14.
ANE LONANGA BBO
Aneri ni chulo bbo Yesu dhó sifa djo. Ndirigoti anja ngbaribbai ma le ka le dhǒ jidha ndirigoti le kó ndrŭ tsotso ke ngʉ rinji nari bbai nari.
4. Yesu jirie ndidzá Baba ji
Yesu dhó loroji ngbaribbai ma ko ka ko dhǒ jidha Mungu dho nari dhǒ. Azø Luka 6:12 ndirigoti Yohana 15:10; 17:26. B’lo ni zø maandiko nari goti, anitilo i ngadhudha djo:
-
Ko ká ka ko dhori ngbaribbai nari kʉ ko ji Yova ddiddi Yesu jingʉe ke nari bbai?
Yesu jingʉe ndidzá ra nǎ Baba ji ndirigoti ke ngʉ adi loti ke na bí ina sala chulu
5. Yesu ngʉ adi ngaddi ndrŭ djo
Yesu ngʉ adi nja ndrŭ dhó mahitaji li anziro. Ngbà mai ke njengʉeni nje ro, ke bangʉe saa ndirigoti ke njingʉe kpakpanga ndi kó ndrŭ tsotso. Azø Marko 6:30-44, ndirigoti anitilo i ngadhudha djo:
-
I maandiko nǎ, addui ká ridho Yesu thí ronga nja ndrŭ dhi lo ngʉ lølø?—Anja verse 31, 34, 41, ndirigoti 42.
-
Addui ká ngʉ Yesu ronga cho ndiro ndi kó nja ndrŭ tsotso d’e?—Anja verse 34.
-
Yesu ngʉ adi Yova dhó sifa dyø, fø lo ká ngba lo ddi ni dho Yova djo?
-
Yesu thí ronga nja ndrŭ dhi lo ngʉ adi lølø nari ká ko ka ko dyø ngbaribbai?
6. Yesu kʉ ritsi adi bbʉ ná ke
Nga mai Yesu dhó ritsi ngʉe bí ro, ke ngʉ adi ndidhó kʉ ná ritsi ro bbʉ nja ndrŭ dho maddi, ndirigoti ke d’rari ko ma di ritsi ro bbʉ ddi nja ndrŭ dho. Azø Matendo 20:35, ndirigoti anitilo i ngadhudha djo:
-
Yesu pongʉeri nari bbai, addui ká ka ndi liri ko é hwè na?
Aninja VIDEO, ndirigoti anitilo i ngadhudha djo.
-
Ko ká ka ko bbʉ ritsi ro ngbá chulu njati kodhó ritsi é bbo nga ma ró?
Ni ká churi ngbà?
Biblia riddi ko di nganzi Yova tsó Yesu ró dho chulu. (Azø Yohana 16:23, 24.) Njati ko di nganzi føri bbai ró, føri na ko ridho ko chu Yesu nji ko dho ná lo ngbà ndiro ko kana nga e chøchø Yova na d’e.
NJA NDRŬ ADI RIPO: “Mungu nzɨ adi ngaddi ko nzani nari djo ri.”
-
Yesu dhó sifa ma, ke ngʉ nji ná lo ma na ká ridho ngbaribbai nari kʉ Yova ngaddi nì ko djo?
LO DZÁ DɄNGA
Yesu jirie Yova ji, ndirigoti ke jirie ndrŭ maddi. Ddiddi Yesu kʉ ndidzá Baba bbai nari dho, ni di lochu ke djo bbo ró, ni ka ni chulo Yova djo ma bbo ddi.
Lo djolu le ngʉ nari
-
Yesu bbai ká ko ka ko dhǒ jidha Yova dho ngbaribbai?
-
Yesu bbai ká ko ka ko kó ndrŭ tsotso ngbaribbai?
-
Yesu dhó sifa kana ro bbo ni ji nari ká kʉ ngbá ri?
NI KA NI CHU NÁ NJA LO
Anja Yesu dhó ko ka ko dyø ná sifa ro.
“Ili Kufuata Mufano wa Yesu, Ukuwe . . .” (Yesu—Ni Njia, Kweli, na Uzima, paje 317)
Aneri ni chu addudho ma ringani ko njí sala Yesu ró dho chulu nari.
“Juu ya Nini Tusali mu Jina ya Yesu?” (Munara wa Mulinzi, 1 Mwezi wa 2, 2008)
Biblia ká tilo ngbaribbai ma Yesu nyǒ djonga dingʉe nari djo ddi?
“Yesu Alifanana Namna Gani?” (Jw.org djó kʉ ná lo)
Yesu ngʉ njini nja ndrŭ na nari nǎ ro ká ko ka ko ba ngbá somo?
