Bibila malongi mambote dituhanaka mu bonga nzengolo. Dilendi tu bakisa mu “baka ndwenga [na] mayela.” (Bingana 4:5) Ntangu zakaka, beto ditêlaka nzengolo ya mbote ni ye. Ntangu zakaka mpe beto dihanaka malongi malendi tu twarisa mu bonga nzengolo ya mbote.

Mu timoko ti mbo tumona

•  Malongi makubakisa mu bonga nzengolo ya mbote

•  Ngano mfweti soba nzengolo yi nitibongeleke?

•  Tala ti nzengolo ya mbi nabongele yi ndendi lembo soba?

•   Kubongandi nzengolo mu ntinu. Bibila ditêle: “Muntu we na meso ma tia, mbo wukengerelaka ntambi zandi.” (Bingana 14:15) Tala ti bongele nzengolo mu ntinu, lendi zimbakana nsangu za mfunu. Bonga ntangu ya tomo dimbitila mu mio mi yirika.—1 Bisi-Tesalonike 5:21.

•   Kubongandi nzengolo zisikamanaka kwa mu mbanzulu zaku na mu mabanza maku. Bibila ditulwengese mu lembo sikirilaka mutima’eto ntangu zazansoni. (Bingana 28:26; Yeremi 17:9) Mu tifwani, ka tubongaka nzengolo za mbote ko bu tubâka mu nkesi, na maniongo, banôka, bu tukondoko luvivululu peleko bu tubâka bafwatika.—Bingana 24:10; 29:22.

•   Sambila mu baka ndwenga. (Zaki 1:5) Nzambi nsayi yi bâka nandi mu hana mvutu mu tusambulu twa mpila yo. Bu ke Tata die na luzolo, ka zololo’â ko ti bala bandi babwabana na mpasi. “Yehova Yandi beni hanaka ndwenga; luzabu na lenda dia swasikisa mu munwa’andi bitûkaka.” a (Bingana 2:6) Ntete, mu nzila ya Zu diandi Bibila katuhanaka ndwenga zandi.—2 Timote 3:16, 17.

•   Dinga. Mu bonga nzengolo ya mbote, nsangu za matieleka mfunu zena. Ntiana bu tâka Bibila, “muntu we na ndwenga mbo wuwirikila mpe mbo wuyikaka luzabu lwandi.” (Bingana 1:5) Kâ kwe tulendi bakila nsangu za mbote mpe za matieleka?

   Ntete,dinga mu zaba mio mi tâka Bibila mu mutu-diambu. Mu bungu ti Mvangi’eto zebi mio mi yôkele mfunu kwe beto, mu Zu diandi malongi me mo mayôkele bubote. (Mikunga 25:12) Mu nzengolo zakaka, Bibila malongi ma delakana dihanaka, mu tifwani tia misiku peleko ntumunu. (Izaya 48:17, 18) Kâ ntangu zakaka, ka ditomo’â tu têlaka ko nti tufweti sa. Beto ditwarisa mu nzila ya mitieno, mitubakisaka mu bonga nzengolo za mbote bu tu kwe se mpe nsololo za beto beni. Mu baka verse za Bibila zita delakana na musamu’aku, dinga mu mitu-diambu na mu mikanda misikamane mu Bibila, ntiana mio milendi baka mia mpamba mu site yi. b

   Mu nzengolo zakaka, kampe fweti dinga mu mbuka zakaka za mbote mu baka nsagu. Mu tifwani, ntete wasumba tima—nsungula tima tia ntalu—bubote bwena watoko dinga mu baka nsangu za tima tita zolo sumba na za muntu wayirikiri tio, mu ndandu zi baka na bio bihomobesa. Diangana, fweti bâ na lukwikulu mpe ti tima ni tio ta dingaka.

   Bibila ditêle: “Makani ka malunganaka ko bu balembo dingaka malongi.” (Bingana 15:22) Buna, ntete wabonga nzengolo, dinga mu zaba mabanza ma muntu wakaka wutomono zaba misamu. Mu tifwani, mu musamu wutariri tikolela, mbo sarila ndwenga bu monekena doktere. (Matie 9:12) Mu misamu miakaka, bubote bu monekene muntu watoko bwabana na musamu wo. Kâ bambuka ti ni nge bonga nzengolo ya mansukina, mpe ni nge korela misamu mi tulumuna nzengolo yo, ka muntu’â ko wukwe monekena.—Bisi-Ngalate 6:4, 5.

•   Dinga mu zaba mpasi na ndandu zimoneka. Bu mana kutika nsangu zazansoni, lendi sa liste ya nsololo ze naku, za ndandu na mpasi zilendi moneka mu muna nsololo. Mpe na bunsungu bwabwansoni, dimbitila mu misendo milendi tûla. (Lubambu 32:29) Mu tifwani, ntia nsobolo nzengolo’aku yilendi nata kwe nge beni, kwe kanda diaku, peleko kwe bantu bakaka? (Bingana 22:3; Bisi-Rome 14:19) Bu dimbitila mu biyuvu bio na lubakusu lwa Bibila, bilendi ku bakisa mu bonga nzengolo za ndwenga mpe za delakana.

•   Bonga nzengolo. Ntangu zakaka tulendi kekama mu bonga nzengolo, mu bungu ti bunkuta bwe neto bwa wubakana. Kâ tala ti tutatamane mu bâ na mabanza yeko-yeko, tulendi hombesa bweso bwa bonga nzengolo peleko mpasi zilendil tu tûrila. Dieka bo, tulendi nionga bu tulembolo bongaka nzengolo, yôka bu tuketi bonga nzengolo ya mbi. Bibila ditêle: “Sungamana tembo, ka kuna ko, taririla matuti, ka tia ko.”—Ekleziaste 11:4, BÎBILA KIA KINTUÂDI.

 Bambuka mpe ti, nzengolo yi yôkele bubote ka wuta zolo tâ ko ni nzengolo ya lunga. Vula-vula, bu solaka tima, tufweti hombesa tima tiakaka. Mpe misamu mi tulembolo waya milendi tûla. (Ekleziaste 9:11) Buna, sarila nsangu za mbote ze naku, mpe sa nsololo yikunatina ndandu ziyôkele bubote.

 Nzengolo zazansoni zi tubongaka ka nizozo’â ko tuvulu simbaka. Misamu mieno milendi soba, peleko wizi bakula ti nzengolo yi bongeleke misendo mie ko zikunatina zi lembolo banzaka. Buna, fweti vutu taluzula misamu mpe bonga nzengolo yikunatina ndandu yita zolo.

 Kâ nzengolo ze ko tufweti lembo soba. (Mikunga 15:4) Mu tifwani, nzengolo yitariri makwela. Nzambi zololo ti bantu ba kwelana bazitisa nzengolo’awu. c (Malaki 2:16; Matie 19:6) Misamu bu mitûlaka mu makwela, mukento na bakala bafweti sarila ngolo mu yirika mio, kani babanza ti bubote bu bahondele makwela.

 Beto bansoni wawututûrilaka mu bonga nzengolo za mbi, na mu tâ makuba. (Zaki 3:2, note) Buna ka bwena bubi ko mu bâ na maniongo. (Mikunga 69:5) Maniongo ka mena ma mbi ko, tala ti matubakisi mu lembo vutu kârila kuba dieto! (Binga 14:9) Kâ mu mabanza ma Bibila, maniongo mamingi malendi bembesa mabanza meto na mbanzulu zeto. (2 Bisi-Korente 2:7) d Bibila ditêle: “Yehova tiari tia lemvokela tie nandi na tiari tia mutima.” (Mikunga 103:8-13) Buna, tala ti ka tulendi’â tasoba nzengolo ko, bubote bu tudingiri mu baka malongi mu nzengolo yo na mu sarila ngolo mu tomesa misamu.