Ku Ciudad Obregón nabutukila, ku nore ya Mexique, mwana wa batanu ha kati dia bala vwa. Mu mbuka ye mala na mumvuka (ville) tweri bâka mu bungu ti tata’eto misitu mia bâ nandi kûna. Mbuka ya mbote yeri mpe kanda dieto mu nsayi dieri. Musamu wa tiara ni we ti, bu ndieri na mvula tanu, titembo tia ngolo ti batâka ouragan tiayizi bebesa misitu mieto, mpe ni tayenda ku hata diakaka.

 Tata’ani wabatika mu halangana bubote mu bakaka mbongo. Kâ, yandi wayizi batika mu nwa malavu mamingi. Musamu wo watomo sobesa longo lwandi na beto bala. Tayizi batika mu nwaka fumu di tweri labaka kwe tata’eto. Bu nayizi bâ na mvula sambanu, malavu mayizi kumbaka mbala ya ntete. Ntangu fioti ha manima, bibuti biani baiyizi hambana, mpe ndiatulu’ani biatomo beba.

 Nguri’eto watunatana bu kaye bâ na bakala diakaka. Bakala diango ka dieri mu hanaka mbongo ko, mpe zo zi keri bakaka ka zeri’â tu lungilaka ko. Buna meno na mpangi zani tayizi sarila ngolo, kâ mu mpasi kwa mpe tweri bêlaka. Mapapa ma bantu ndieri kusunaka na mampa ndieri tekaka, zurmale, chewing-gum na bima biakaka. Bima bia dia mpe ndieri kwe tote mu mazala ma bamvwama.

 Bu nabâ na mvula 10, bakala dimosi diakundomba nasala na yandi ku mbuka yiberi kutakasaka mazala ma hata diadiansoni. Nayizi tambula, ni nabika lukolo mpe ni nakatuka ku nzo. Mbongo zi keri kumfutaka ka zeri’â yôkaka 1 dollars (600 FCFA) ko, mpe bidia bi keri totaka ku zala keri kunganaka. Mu tivula ndieri bâka ti nayirikika mu bima bia zala. Bantu ba tizunga tiani nzonzolo ya nsoni yeri nawu mpe bunsuza beri sarilaka. Babingi beri nwaka bima bia ngolo na malavu mamingi. Yina ni ntangu yiyôkele bubi ya luzingu lwani; mpe mpimpa zazansoni mbo ndieri dilaka mpe mbo ndieri teketaka mu bunkuta. Mu bungu dia bumputu bwani na lukolo lu nalembo tomo sa, nguri’â nsoni ndieri kwe mone. Mvula tatu nayizi bâ mu mbuka yo. Ha manima nakatuka mpe nayenda ku tizunga tiakaka tia ku Mexique. Kûna nayizi sala ku misitu, bu ndieri kwe tie bifulu, furi (coton), mintie (canne à sucre) na pomme de terre ndieri kwe tote.

 Mvula yà ha manima, nakâla ku Ciudad Obregón. Tibusi tia tata’eto, tieri nganga, tiakungana chambre ku nzo’andi. Nabatika mu lotoko ndozi za mbi, mu tiari ndieri vulu bâka mpe mabanza ma tihonda mieri vulu bâka nani. Mpimpa yimosi nayizi sambila Nzambi: “Mfumu, tala ti kô wena, nzololo nakuzaba mpe mbo nikusarila ntangu yayansoni. Tala ti dibundu dia matieleka die kô, nzololo nazaba dio.”

 Ntangu zazansoni, nsatu yeri kwe bê nani ya longoka mu zaba Nzambi. Ni bu sa ti mwana fioti ndieri, nayenda mu mabundu mamingi, kâ nayizi nionga. Kani dimosi diakunzonzela Bibila mpe diayizi kumbakisa mu lungisa nsatu zani za timpeve. Mabundu makaka mbongo kwa meri kekoloko; mpe mu mabundu makaka mfumu bunsuza zeri sarilaka.

 Bu nayizi bâ na mvula 19, bakala dia tibusi tiani diakuntêla ti Mbangi za Yehova zamusongela misamu milongesaka Bibila mu bungu dia bifwiti bi basarilaka mu nsambululu. Yandi wakuntangila Ndukulu 20:4, 5. Verse yo yitâka ti ka tufweti’â tasalaka bifwiti ko. Verse 5 yitêle: “Kufweti’â bia fukamana ko mpe kufweti’â bika ko bakutuma mu sarila bio, mu bungu ti meno Yehova Nzambi’aku, Nzambi ndiena yilombaka ti bakangama kwa kwe meno.” Buna bakala dia tibusi tiani dia kundiyula: “Tala ti Nzambi bifwiti kasarilaka mu sa bimangu peleko Yandi zololo ti tasarilaka bio mu nsambululu, mu bungu dia nti kayiminaka bio?” Musamu wo wakuntuma natomo dimbitila. Ha manima, tayizi bâ na bimoko biabingi mu misamu mia Bibila. Bimoko biango bia ndieri tomo zoloko, mpe ka ndieri’â monaka ntangu yeri yôkaka ko.

 Ntangu yayingi ha manima, yandi wayizi kunata ku lukutakanu lwa Mbangi za Yehova. Natomo susumuka mu misamu mi namona na mi nawâ. Bantwenia mpe, mvutu beri hanaka, mpe bizonzi beri saka ha estrade! Nayizi banza ti: ‘Ntia mpila ndongosolo bantu ba babakaka kû!’ Ntono nsuki zani za zila na ndwatulu yalembo bâ ya mbote, Mbangi za Yehova zatomo kumbwana. Kanda dimosi diakuntâ mbila ku nzo’awu mu dia ha manima ma lukutakanu!

 Ndongokolo’ani ya Bibila na Mbangi za Yehova yakundongesa ti Nzambi, Yehova Tata dia luzolo diena ditubelokelaka lwaka; ka talaka misamu mieto mita yirika um ntama ko, lukolo lu tasa ko, mbongo ze neto ko, peleko kanda di tatûka ko. Yandi kena na tihambula ko. (Bisalu 10:34, 35) Dieka bo, nsatu zani za timpeve za batika mu lungana. Maniongo mani mawa mpe ka ndieri’â vutu banzaka ko ti tima tieri kunkondoko mu luzingu.

 Luzingu lwani lwalwansoni lwabatika mu tomo toma! Nabika mu nwa fumu, malavu mamingi, mpe nabika nzonzolo ya nsoni. Mbanzulu za mbi zeri nani tûka bumwana za batika mu zimbakana, na ndozi za mbi mpe. Nayizi telamana tifu tia banzaka ti bantu bakaka bakundiyôkele mu bungu ti bumwana bwa mbi nayôkesa, mpe ka natomosa lukulo lwa mbote ko.

 Mukeno wa mbote we nani, wuzoloko Yehova mpe wukumbakisaka. Bwawu bu, meno munkengi wa tizunga ndiena wa Mbangi za Yehova, bimvuka nikwe tari mu tindisa na mu longesa mpangi zani za timpeve. Mu nzila ya nsobolo zakunatina Bibila, na ndongosolo ya Nzambi, ka nasala vutu mone nsoni ko.