1. Bwe 2 Bisi-Korente 3:1-3 yitubakisilaka mu zolo bweso bwe neto bwa twarisaka ndongokolo za Bibila zinataka ku bateme? (Tala tifwani ha tinima tia ntete.)

BWE monaka ku mutima mu ntangu yi monaka mulongoki wa Bibila wa timvuka tiaku wuta batusu? Kampe mbo wutomo ku tâka nsayi. (Mat. 28:19) Mpe tala ti na nge kalongokaka, nsayi ya nkatika ya yôka yibâ naku mu ntangu yi kabatusu! (1 Tes. 2:19, 20) Milongoki mia môna mizi batusu ka miena kwa nkatika ‘mikanda mia mbwanunu’ mia bantu balongokaka nawu Bibila ko, kâ mpe mia timvuka tiatiansoni miena.​—Tanga 2 Bisi-Korente 3:1-3.

2. (a) Ntia tiyuvu tia mfunu tufweti taluzula, mpe mu bungu dia nti? (b) Ndongokolo ya Bibila ni nti? (Tala note ye ha banda.)

² Musamu wa nkatika wa mbote wena mu mona ti mu mivu miyà miyôkele, bantu kampe 10 000 000 balongokaka Bibila tayizi hana mu rapore * za ngonda mu nza ya mukaka. Mpe mu mivu mio kwa, tulendi tâ ti mu muvu wumosi, bantu 280 000 babele kwizi bâka Mbangi za Yehova mpe milongoki mia Yezu Kristo mu bungu ti bayizi batusu. Bwe tulendi bakisila milio zo za milongoki mia Bibila ngatu babatusu? Yehova watiri hana bweso kwe bantu mu kwizi bâ Mbangi. Ntiangu tusarilaka ngolo zeto zazansoni mu ba bakisa ngatu bakulu batusu. Ntangu nkatika dioka yita dioka!​—1 Kor. 7:29a; 1 Pi. 4:7.

3. Nti tutaluzula mu timoko ti mu musamu wutariri twarisa ndongokolo ya Bibila?

 ³ Mu bungu ti nkatika mfunu wena mu kubika milongoki lumbu ti, Timvuka titwarisaka tialombele ku biro za filiale nti tulendi sa ngatu milongoki mieto miamîngi mizi miabatusu. Mu timoko ti na tita landa, mbo tukwizi mona bwe tulendi landa tifwani tia mipasuri-nzila, tia bamisionere na tia minkengi mia bizunga beka ntama mu bisalu bio. * (Bin. 11:14; 15:22) Mbo babangulaka nti milongi na milongoki bafweti sa ngatu babakila ndongokolo’awu ya Bibila ndandu. Mu timoko ti, mbo tumona misamu tanu (5) milongoki mia Bibila mi bê na mio nsatu ngatu basa nsobolo zibanata ku bateme.

4. Nti tufweti bakula mu musamu wutariri ndongokolo ya Bibila yi basilaka ha mwelo nzo?

⁴ Mpangi zazingi zilongokaka Bibila na mfumu-kanda mu mitela ha mwelo wa nzo. Ni bu sa ti mbatukulu ya mbote yena mu kurisa luzolo lwa Bibila mu mutima wa mulongoki, bimoko bio bia nkufi kwa bivulu bâka, mpe ka bivulu’â salamaka tumingu twatwansoni ko. Ngatu batomo kurisa luzolo lwa Bibila kwe milongoki, mpangi zakaka mbo zilombaka nsangu zitariri mulongoki, mpe mbo babatâka mbila peleko mbo babatsonekenaka mwa mabanza ma Bibila mu telefone. Bimoko bia mpila yo, bilendi tatamana ngonda zazingi, kâ ndongokolo yango ka yibutaka mbutu ko. Ngano mulongoki wa Bibila wulendi tihana kwe Yehova mpe wulendi batusu, tala ti ka wuta yôkesa ntangu yayingi ko mpe ka wuta * sarila ngolo ko mu longoka Zu dia Nzambi? Kampe kâni.

5. Tintwari na Like 14:27-33, ngano Yezu nti kazonzela bilendi tu bakisa mu tisalu tieto tia kubika milongoki?

⁵ Lumbu timosi, Yezu wasarila tifwani mu bangula nti muntu wufweti sa mu kwizi bâ mulongoki’andi. Wazonzela muntu weri zolo tungaka nzo ya zangama, wazonzela mpe mutinu weri zolo kwe nwana muzingu. Yezu watâ ti titungi tifweti ‘toko zakala mu zaba ntalu’ ngatu kamanisa nzo ya zangama, mpe mutinu wufweti “toko zakala [na milongi miandi]” mu tala tala ti mukangu’andi wa binwani wulendi yirika musamu wu bata banza. (Tanga Like 14:27-33.) Mpila mosi, Yezu wazaba ti muntu wuzololo mu kwizi bâ mulongoki’andi wufweti tomo taluzula mu zaba ka nti bimufwanakane mu mu landa. Ntiangu, tufweti tindisa milongoki mieto mu longokaka tumingu twatwansoni. Bwe tulendi bwa sila?

6. Ngano nti tulendi yêla mu sa ngatu tatwarisaka ndongokolo za Bibila zibutaka mbutu?

 ⁶ Batika mu lalumuna ntangu ya ndongokolo ya Bibila yo yi yôkelaka ha mwelo wa nzo. Kampe lendi yikaka verse zi luzonzela bu kwe talaka mulongoki’aku. Mfumu-kanda bu kakwizi yukunu na bimoko bia bila, mu lomba tala ti mbuka ye kô yi lulendi zakala tintwari ngatu lwalanda timoko. Mvutu ya mfumu-kanda mbo yisongela ka bwe kabongelaka ndongokolo ya Bibila. Kâ, ngatu mulongoki walongoka mu ntinu, lendi mpe mu lomba tala ti lulendi longokaka mbala zole mu lumingu lumosi. Bantu babingi bazoloko mu longoka mbala mosi peleko mbala zole lumingu batêle lumingu.

7. Bwe mulongi wulendi kubama mu bungu dia ndongokolo za Bibila zazansoni?

⁷ Bu we mulongi, fweti tomo kubamaka mu bungu dia ndongokolo zazansoni za Bibila. Lendi batika mu toko tanga misamu mi lulongoka mpe wataluzula verse. Lunda mabanza ma nguri mu mutu. Dimbitila mu mutu-diambu wa timoko, mu mitu-diambu mia fioti, mu biyuvu bia ndongokolo, mu verse za “tanga”, mu bifwani, na mu video zilendi bakisa mu bangula musamu wu luzonzela. Ha manima, dimbitila mu mulongoki’aku wa Bibila na mu mpila ya mbote yi mu têla misamu ngatu kalembo mia mona mpasi mu bakula mpe kasarila mio.​—Neh. 8:8; Bin. 15:28a.

8. Misamu mia tâ ntumwa Paulo mie mu Bisi-Kolose 1:9, 10 nti mita tu longesa mu musamu wutariri sambirila milongoki mieto?

⁸ Bu takwe kubame, sambirila mulongoki’aku mpe zonzela nsatu zandi kwe Yehova. Lomba kwe Yehova kakubakisa mu longesa mu mpila yi lendi simbila mitima mia bantu. (Tanga Bisi-Kolose 1:9, 10.) Yêla mu tidimbitila misamu mi lendi lembo bakula mulongoki’aku na mi kalendi lembo tambula. Lunda mu mutu ti kani diaku ni mu bakisa mulongoki’aku ngatu wabatusu.

9. Bwe mulongi wulendi bakisila mulongoki’andi mu kubika ndongokolo’andi ya Bibila? Bangula.

⁹ Lukwikulu lwe neto ti ndongokolo ya Bibila yi tuta sa ntangu zazansoni, mbo yibakisa mulongoki mu vutula matondo mu mio miamiansoni mia yirikiri Yehova na Yezu mu bungu dia yandi mpe mbo kadinga mu vutu tomo longoka. (Mat. 5:3, 6) Ngatu kabaka ndandu ya ndongokolo’andi, mulongoki wufweti tûla mabanza mandi mamansoni mu mio mi kata longoka. Mu mu bakisa ngatu kasila bo, mu bangurila ti mfunu wena mu toko titangilaka timoko ti lulongoka mpe katalaka  bwe timoko tiango tita mu tarila. Bwe lendi mu bakisila? Kubika timoko tintwari na mulongoki mpe mu songela bwe bakubamanaka. * Mu bangurila bwe kalendi bakila mvutu za biyuvu bia ndongokolo, mpe mu songela bwe kasila bidimbu ha ntelo za nguri zisa ti kabambukila mvutu. Mu lomba kahana mvutu mu mpila ya yandi beni. Bu kasila bo, mbo kwizi bâ na lenda dia zaba bwe kata bakurila misamu mi kata longoka. Tima tiakaka tie kô ti lendi tindisila mulongoki’aku mu sa?

10. Mu bungu dia nti we mfunu mu tangaka Bibila bilumbu biabiansoni mpe mulongoki nti wufweti sa mu bakila ntangulu’andi ya Bibila ndandu?

¹⁰ Ha zulu longoka tumingu twatwansoni, mulongoki wulendi saka bima biakaka yandi beni bilumbu biabiansoni. Fweti mokaka na Yehova. Bwe? Bu kakwe wirikiri na bu kakwe zonze na Yandi. Lendi wirikila Yehova bu kakwe tangi Bibila bilumbu biabiansoni. (Yos. 1:8; Mik. 1:1-3) Mu songela bwe kalendi sarila “Programme de lecture de la Bible” ye mu jw.org. * Kâ, mu mu bakisa mu baka ndandu mu ntangulu’andi ya Bibila, mu tindisa mu dimbitilaka mu mio mi ta longesa Bibila mu musamu wutariri Yehova mpe bwe kalendi sarila mio mi kata longoka mu luzingu lwandi.​—Bis. 17:11; Zaki 1:25.

11. Bwe mulongoki wulendi longoka mu sambilaka na bunsungu bwabwansoni, mpe mu bungu dia nti we mfunu kavulu sambilaka Yehova?

¹¹ Tindisa mulongoki’aku mu zonzaka na Yehova bilumbu biabiansoni mu nzila ya lusambulu. Sambilaka mu mutima’aku wawansoni bu lubatikaka na bu lumanisaka mu longoka. Sambilaka na mulongoki’aku, mpe bu lusambilaka, mu zonzelaka kwe Yehova. Bu kakwe wê tusambulu twaku, mbo kakwizi longoka mu sambilaka Nzambi’eto Yehova mu mutima wawansoni, mpe na bunsungu bwabwansoni mu nkumbu ya Yezu Kristo. (Mat. 6:9; Za 15:16) Banza’eti bwe ntangulu ya Bibila ya bilumbu biabiansoni (wirikila Yehova) mpe lusambulu (zonza kwe Yehova) bilendi bakisila mulongoki’aku mu pusana kwe Nzambi! (Zaki 4:8) Bu kakwe siri bo bilumbu biabiansoni, bifu bio mbo bibakisa mulongoki’aku mu kwizi tihana kwe Yehova mpe mu kwizi batusu. Kâ, nti biakaka bimubakisa.

12. Bwe mulongi wulendi bakisila mulongoki mu kurisa tindiku na Yehova?

¹² Misamu mi longokaka mulongoki ka mifweti’â miabâ kwa mu mutu’andi ko, kâ mifweti bâ mpe mu mutima’andi. Mu bungu dia  nti? Mutima’eto​—wuzololo tâ nsatu zeto, mio mi tumonaka ku mutima na mbanzulu zeto​—mbo wusaka ti tasarila mio mi tulongokaka. Yezu walongesa misamu miamingi kwe bantu, mpe mbo beri zoloko mu longoka misamu mu yandi. Kâ, bantu mbo beri kwe mu landi mu bungu ti mbo keri simbaka mpe mitima miawu. (Like 24:15, 27, 32) Mulongoki wufweti bongelaka Yehova ntiana muntu wa matieleka, ntiana muntu wu kalendi sa tindiku na wo, mpe wufweti mu bongelaka ntiana Tata’andi, Nzambi’andi mpe Ndiku’andi. (Mik. 25:4, 5) Mu ntangu yi lulongokaka, sa ti mulongoki wamonaka bifu bia toma bia Nzambi. (Ndu. 34:5, 6; 1 Pi. 5:6, 7) Mu timoko ni timoko ti lusa, songelaka ntia mpila muntu Yehova kena. Bakisa mulongoki kazolo bifu bia toma bia Yehova​—luzolo, nsayi, na tiari tiandi tia mutima. Yezu watâ ti ‘zolo Yehova [. . .] ni mutieno wuyôkele, [. . .] mpe wo ni mutieno wa ntete.’ (Mat. 22:37, 38 NWT) Sarila ngolo mu kuna luzolo lwa Nzambi mu mutima wa mulongoki’aku.

13. Hana tifwani tita songela bwe lendi bakisila mulongoki mu longoka bifu bia toma bia Yehova.

¹³ Mu bimoko biaku na mulongoki’aku, mu bangurila mu bungu dia nti zoloko Yehova. Kampe mbo wusa ti mulongoki’aku wizi wabakula ti fweti kwizi bâ ndiku ya Yehova mpe fweti longoka mu mu zolo. (Mik. 73:28) Mu tifwani, ngano ntelo ye kô mu buku di lulongokaka peleko verse yizonzelaka musamu wutariri Yehova​—luzolo, ndwenga, buderede, peleko ngolo zandi​—yisimbaka mutima’aku? Zonzela wo kwe mulongoki’aku, mpe mu zabikisa ti, tio ni timosi tia bima biabingi bisaka ti wazolo Tata’eto die ku mazulu. Tima tiakaka tie kô, milongoki miamiansoni mia Bibila mifweti sa ngatu miabatusu.

14. Ngano Bahebre 10:24, 25 ntia musamu yita tu têla mu musamu wutariri tukutakanu twa timvuka tulendi bakisa mulongoki ngatu wakula mu timpeve?

¹⁴ Beto bansoni tuzololo ti milongoki mieto miabatusu. Mpila yakaka yi tulendi ba bakisila, ni mu ba tindisa ngatu bizaka ku tukutakanu twa timvuka. Milongi milongesaka tuka ntama mbo mitâka ti milongoki mivulu kwizaka ku tukutakanu mbo mikulu kulaka mu timpeve. (Mik. 111:1) Milongi miakaka mbo mibangulaka kwe milongoki miawu ti mbo bakwizi zaba misamu miamingi mu ndongokolo’awu ya Bibila, mpe miakaka mbo balongoka mio ku tukutakanu. Tanga Bahebre 10:24, 25 na mulongoki’aku, mpe mu bangurila ndandu yi kabaka tala ti wiziri ku lukutakanu. Mu songela video Que se passe t-il dans une  Salle du Royaume? * Bakisa mulongoki’aku mu lembo mangisaka tukutakanu.

15. Nti tulendi sa mu bakisa mulongoki ngatu wavulu kwizaka ku tukutakanu?

¹⁵ Nti lendi sa tala ti mulongoki’aku ka weka’eti kwiza ku lukutakanu ko peleko tala ti ka wuvulu’â kwizaka ko? Na tiya twatwansoni, mu zonzela misamu mi walongokele ku lukutakanu lwayôkele ka ntama ko. Bu kamona mio mi banzaka mu bungu dia tukutakanu, lendi kwizi zolo mu kwizaka ku tukutakanu. Mu hana Nzo ya Zangama ya Munkengi peleko Cahier pour la réunion Vie chrétienne et ministère yi bata longokaka mu ntangu yo ku tukutakanu. Mu songela nti bazonzela ku lukutakanu luta kwiza, mpe mu yula ntia tima titomo mu tâ nsayi. Mio mi wâ mpe mi mona mulongoki’aku ku lukutakanu lwandi lwa ntete mbo miyôka mio mi katoko mona mpe mi katoko wâ ku tukutakanu twa mabundu makaka. (1 Kor. 14:24, 25) Mbo kakwizi bwabana na bantu ba mbote ba kalendi landa tifwani, mpe balendi mu bakisa ngatu kabatusu.

16. Nti bifwanakane mu twarisa ndongokolo ya Bibila yinataka ku bateme, mpe nti tukwizi longoka mu timoko tita landa?

¹⁶ Bwe tulendi twarisila ndongokolo za Bibila zinataka ku bateme? Tulendi bakisa mulongoki mu bongela ndongokolo ya Bibila mu bunsungu tala ti tumutindisi mu longokaka tumingu twatwansoni na mu tikubamanaka ntete talongoka. Tulendi mpe mu tindisa mu zonzaka na Yehova bilumbu biabiansoni na mu kurisa tindiku tia yandi beni na Yandi. Tulendi mu tindisa mpe mu kwizaka ku tukutakanu. (Tala kaku tie na mutu-diambu “ Mulongoki nti bie nandi nsatu ngatu wabatusu.”) Kâ, ntiana bu songela wo timoko tita landa, bima tanu (5) biakaka bie kô milongi mifweti sa mu nata milongoki miawu mu kwizi batusu.