Mu 1983 nabutuka. Bu ndieri wa fioti, tikolela tia mbote tiabâ nani, kâ bu nayizi lungisa mvula kumi (10), nitu’ani yayansoni yabatika mu tomo yama. Kampe mvula zole zayôka, bu navumbuka mu pari ka ndieri’â vutu lendaka ko mu ningana. Bu ndieri yêlaka mu ningisa malu mani kani kabwe ka ndieri’â lendaka ko. Tuka buna ka nasala telame ko. Timbevo tiani tiasa mpe ti ka nivutuandi kula. Tii lumbu ti ntiana mwana fioti kwa ndiena.

Tuka bala ba ngonda mu nzo kwa ndieri bâka mu ntangu Mbangi zole za Yehova zayizi kuntala. Mu ntangu bantu beri kwizi tu talaka mbo ndieri yêlaka mu swama, kâ lumbu tîna nayizi bika bakento bakunzonzesa. Bu beri zonzelaka Paradi nayizi bambukila misamu mi nawâ bu ndieri na mvula 5. Mu ntangu yîna, misionere yeri bâka ku hata dia Suriname weri na nkumbu Jethro weri kwizaka ku hata dia beto mbala mosi mu ngonda, mpe mbo keri saka ndongokolo ya Bibila na tata’ani. Jethro mbo keri kumbongelaka na nsayi yayansoni. Yandi ndieri tomo zoloko. Nkaka zani mpe mbo zeri ku nataka ku tukutakanu twa Mbangi za Yehova tweri yôkaka ku hata dieto. Mu ntangu Florence, wumosi wa bakento bayizi kuntala kakundiyula tala ti nzololo nazaba misamu miakaka, nayizi tambula.

Florence wakâla na bakala diandi, Justus, mpe tintwari tabatika mu sa nawu ndongokolo ya Bibila. Mu ntangu yi bayizi bakula ti ka nazaba mu tanga ko bayizi kundongesa mu tanga. Ha manima ma ntangu fioti, nayizi batika mu tanga me beni. Lumbu timosi, Florence na Justus bayizi kuntêla ti ku Suriname babatambikiri mu kwe samuna. Musamu wa tiari, ku Orealla ka kwabâ muntu ko wu taketi tatamana mu longoka Bibila. Kâ, musamu wa nsayi, Yehova wakundunda mu mabanza mandi.

Ntangu fioti kwa ha manima, mupasuri-nzila wumosi weri na nkumbu Floyd wayiza ku Orealla, mpe bu keri kwe samuni mu nzo na nzo wayizi kuntala. Bu kakunzonzela ndongokolo ya Bibila, nayizi seha. Floyd wakundiyula: “Mu bungu dia nti ta sehela?” Nayizi mu têla ti mukanda wa Ce que Dieu attend de nous wa natilongokela mpe nabatika mu longoka buku dia La connaissance qui mène à la vie éternelle. * Nayizi mu têla mu bungu dia nti ndongokolo’ani ya Bibila yazengokela. Floyd wamanisa mu longoka buku dia Connaissance na meno, kâ yandi mpe bamusoba mbuka ya samunina. Nayizi vutu manga mulongi wa Bibila.

 Kâ mu 2004, batambika Granville na Joshua mieri mipasuri-nzila miole mia minene ku Orealla. Bu beri kwe samuni mu nzo na nzo, bayizi kumbukila. Bu bakundiyula tala ti nzololo nalongoka Bibila, nayizi seha. Nabalomba takârila mu longoka buku dia Connaissance tuka ku mbatukulu. Weri nani nazaba tala ti misamu mi nalongoka na milongi mia ntete ni mio kwa mpe baketi kundongesa. Granville wayizi kuntêla ti tukutakanu tweri salamaka ku hata dieto. Ni bu sa ti mvula 10 zayôka tuka ti nalembo duka mu nzo’ani, weri nani nabâka ku tukutakanu to. Granville wayizi kumbonga mpe wakuntûla mu fauteuil roulant mpe wakumpusa tii ku Nzo ya Nsambululu.

Ha manima, Granville wakuntindisa mu tsonekesa nkumbu ku École du ministère théocratique. Watâ: “Tifuma tie naku, kâ lendi zonza. Lumbu tie kô mbo tâ tinzonzi tia bantu babansoni. Mbo lenda.” Misamu mi katâ miatomo kuntindisa.

Nayizi batika mu samuna na Granville. Kâ, nzila zazingi ku hata zeri na matari ngatu fauteuil roulant yatomo kwe yende. Ntiangu nalomba kwe Granville kakuntûla mu brouette mpe kakumpusa. Mpila yi tasarila yatomo simba. Mu avril 2005, nayizi batusu. Ntangu fioti ha manima, bampangi bakunkubika mu kipaka mabuku na mikanda mia timvuka na sono ya ku Nzo ya Nsambululu.

Kâ, musamu wa tiari, mu 2007 tata’ani wayizi fwa bu kasa accident mu bato. Kanda dieto diatomo bâ mu tiari. Granville wasambila na beto mpe watuhana lutindusu mu nzila ya Bibila. Mvula zole ha manima, musamu wakaka wavutu tutâ tiari​—Granville wafwa bu kasa accident mu bato.

Ka tavutu’â sâla na mukuluntu ko mu mwa timvuka tieto tiafwilulu, mpe tibakisi mu tisalu timosi kwa tieri neto. Lufwa lwa Granville lwatomo kuntâ tiari mu bungu ti nguria ndiku’ani yeri. Mbo keri kumbakisaka ntangu zazansoni mu bâ penepene na Yehova, mpe nsatu zani za tinsuni keri kipaka. Ku lukutakanu lwalanda ha manima ma lufwa lwandi, dema diabâ nani dia tanga paragrafe bu tweri saka ndongokolo ya Nzo ya Zangama ya Munkengi. Paragrafe zole kwa natitangila ni nabatika mu dila. Dila kwingi ndieri dilaka, ni nakôka ha estrade.

Nayizi batika mu mona bubote mu ntangu mpangi za timvuka tiakaka zayizi tu bakisa ku Orealla. Musamu wakaka, filiale yatambika mupasuri-nzila wa wunene wumosi weri na nkumbu Kojo. Nsayi yabâ nani mu ntangu nguri’ani na mpangi’ani babatika mu longoka mpe bayizi batusu. Mu mars 2015, nayizi bâ tibakisi mu tisalu. Ntangu bu yayôka ha manima, nayizi tâ tinzonzi tiani tia bantu babansoni tia ntete. Lumbu tîna, nayizi bambuka na nsayi yayansoni kâ mpe na mansangaza mu meso, misamu mia kuntêla Granville mvula zayôka: “Lumbu tie kô mbo tâ tinzonzi tia bantu babansoni. Mbo lenda.”

Mu nzila ya programe ya JW Télédiffusion^®, nayizi bakula ti kwe na mpangi zakaka ze ntiana meno. Kâ, ntono bifuma biawu, misamu miamingi bayirikaka mpe mu nsayi bena. Meno mpe ndendi vutu yirika misamu miakaka. Nazolo mu hana ngolo zani zazansoni kwe Yehova, ntiangu nayizi batika mu sala tisalu tia mupasuri-nzila wa ntangu zazansoni. Mu septembre 2019 nayizi baka nsangu zi nalembo kekolo! Ngonda yîna nayizi bâ mukuluntu mu timvuka tieto tie na bisamuni kampe 40.

Matondo nita vutula kwe mpangi za zibakala na za zikento zayizi longoka na meno mpe zakumbakisi mu sarila Yehova. Kâ mu miamiansoni, matondo nita tomo vutula kwe Yehova wakundunda mu mabanza mandi.