1-2. Ngano bwe tulendi landila ntambi za Yezu? Hana tifwani.

BANZE’ETI, zeba luta kwe zebe na bantu bakaka ku mbuka ye na mutoto wa sese mpe yitâka bunkuta. Muntu wutomono zaba mbuka wuta kwe lu twarisi. Bu kata kwe yende mbo kata kwe sisi ntambi zandi. Ha manima ma mwa ntangu, ka luta vutu mu mona ko! Kâ ka lwena na bunkunta ko; mu bungu ti nge na bampwana’aku, mbo luta kwe landi ntambi zandi buna bufwanakane

² Mu bungu ti Bakristo ba matieleka twena, nza yi ya mbi yi tuta bêla yifwanakane na mbuka ye na mutoto wa sese mpe yitâka bunkuta. Mbo tutondaka Yehova mu bungu ti watuhana Ntwarisi yiyôkele bubote​—Mwana’andi Yezu Kristo, watusisila ntambi zi tulendi landa buna bufwanakane. (1 Pi. 2:21) Mu mabanza ma buku dimosi dizonzelaka misamu mia Bibila, Piere wafwanakasa Yezu na ntwarisi. Ntiana ntwarisi yisisaka ntambi zandi, Yezu watusisila ntambi zi tulendi landa. Tazonzeleno biyuvu ebi bia bitatu bitariri landa kwa ntambi zandi: Landa ntambi za Yezu bwe wuta zolo tâ? Mu bungu dia nti tufweti za landila? Mpe bwe tulendi za landila?

3. Ngano landa ntambi za muntu bwe wuta zolo tâ?

³ Ngano landa ntambi za muntu bwe wuta zolo tâ? Mu Bibila, ntelo ya “mwendo” na ya “malu” ntangu zakaka mbo zizolo zonzelaka luzingu lwa muntu. (Mba. 6:9; Bin. 4:26) Tifwani tisisaka muntu balendi tia fwanakasa na ntambi zi kasisaka bu kakwe yende. Buna, landa ntambi za muntu wuzololo tâ landa tifwani tiandi.

4. Ngano landa ntambi za Yezu bwe wuta zolo tâ?

 ⁴ Ngano landa ntambi za Yezu bwe wuta zolo tâ? Mu bukufi wuzololo tâ landa tifwani tiandi. Mu verse’eto ya mutu-diambu, ntumwa Piere tifwani tia mbote tia Yezu kazonzela titariri korela mpasi; kâ, mpila zakaka zazingi ze kô zi tulendi landila tifwani tia Yezu. (1 Pi. 2:18-25) Wa matieleka, luzingu lwa mukaka lwa Yezu​—misamu miamiansoni mi katâ na mi kayirika—​tifwani tiena ti tufweti landa.

5. Ngano bantu ba masumu balendi landa tifwani tia Yezu? Bangula.

⁵ Bu twena bantu ba masumu, ngano tulendi landa tifwani tia Yezu? Yee, tulendi tia landa. Ntumwa Piere ka tâ ko ti talanda tifwani tia Yezu mu mpila ya lunga. Kâ watutindisa mu landa tio buna bufwanakane. Tala ti tutomono landa ntambi zandi, bu tukwe sariri ngolo ni bu sa ti bantu ba masumu twena, mbo tusarila misamu emi mia tâ ntumwa Za: ‘Diatila [. . .] buna [Yezu] bu kadiatila.’​—1 Za 2:6.

6-7. Mu bungu dia nti tulendi têla ti tamana landa ntambi za Yezu mbo tukwizi bâ penepene na Yehova?

⁶ Bu tulanda ntambi za Yezu mbo tubâ penepene na Yehova. Mu bungu dia nti tulendi têla bo? Musamu wa ntete, Yezu wahana tifwani tia nzitukulu mu mpila yi tulendi bêla na luzingu lutâka Nzambi nsayi. (Za 8:29) Buna, bu tukwe landi ntambi za Yezu mbo tutâ Yehova nsayi. Mpe tulendi bâ na lukwikulu ti Tata’eto dia ku mazulu mbo kapusana kwe bô basarilaka ngolo zawu mu bâ ndiku zandi.​—Zaki 4:8.

⁷ Musamu wa nzole, Yezu walanda tifwani tia Tata’andi mu mpila ya lunga. Ntiangu katâ ti: ‘Wô kumweni, mweni mpe Tata.’ (Za 14:9) Tulendi landa bifu bia Yezu na mpila yi keri bongelaka bantu bakaka. Mu tifwani, wasongela tiari kwe muntu weri na bwazi, wasongela tiari tia bakaka kwe mukento wumosi weri na  timbevo tia ngolo, mpe wasongela tiari tia mutima kwe bantu bafwilulu bantu ba beri zoloko. Bu tulandaka tifwani tia Yezu, mbo tulandaka tifwani tia Yehova mu mpila ya mbote. (Mak. 1:40, 41; 5:25-34; Za 11:33-35) Bu tutomo landa bifu bia Yehova, mbo tutomo bâ penepene nandi.

8. Bangula ka mu bungu dia nti landa ntambi za Yezu, kutubakisila mu tatamana mu bâ ba kwikama.

⁸ Tala ti tulendi ntambi za Yezu, ka tubika nza yi ya mbi ko yatukabakasa mu tûla mabanza meto mamansoni mu tisalu tia Yehova. Mu mpimpa’andi ya mansukina ha mutoto, Yezu watâ ti: ‘Meno mutoto wa nanungini.’ (Za 16:33) Mbo keri zolo tâka ti wakala mu bika nza yi yasobesa mbanzulu zandi, makani mandi na ndiatulu’andi. Kani kabwe, Yezu ka zimbakana musamu wu bamutambikila ha mutoto ko​—mu sa ti nkumbu ya Yehova yabâ ya santu. Ngano bwe tutâ mu bungu dia beto? Mu nza yi, misamu miamingi milendi tu kabakasa mu tûla mabanza meto mamansoni mu tisalu tia Yehova. Kâ tala ti ntiana Yezu, tutatamane mu tûla mabanza meto mu sarila luzolo lwa Yehova, beto mpe mbo ‘tununga’ nza.​—1 Za 5:5.

9. Nti tufweti sa mu tatamana mu diatila mu nzila yinataka ku luzingu lwa mankululu?

⁹ Tala ti tulendi ntambi za Yezu, tulendi baka luzingu lwa mankululu. Mu ntangu ntwenia mosi ya mvwama yayula kwe Yezu ka nti kafweti sa mu baka luzingu lwa mankululu, Yezu wamuvuturila ti: ‘Yiza, kundanda.’ (Mat. 19:16-21) Kwe Bayuda bakaka beri lembo kwikilaka ti yandi ni Kristo, Yezu watâ ti: ‘Bimeme biani [. . .] me bikwe landi. Mboko meno luzingu lwa mankululu nita bahana.’ (Za 10:24-29) Kwe Nikodeme, muntu weri salaka ku Sanedre mpe weri zoloko mu tomo zaba ndongosolo za Yezu, Yezu wamutêla ti wô ‘sarilaka timinu mu yandi’ mbo ‘kabaka luzingu lwa mankululu.’ (Za 3:16) Mbo tusongelaka ti timinu tie neto mu Yezu bu tusarilaka misamu mi kalongesa na bu tulandaka misamu mi kayirika. Tamana sila bo, mbo tutatamana mu diatila mu nzila yinataka ku luzingu lwa mankululu.​—Mat. 7:14.

10. Nti tufweti sa mu tomo zaba Yezu?

¹⁰ Ntete talanda Yezu buna bufwanakane, tufweti toko longoka mu mu zaba. (Tanga Za 17:3.) ‘Longoka mu zaba’ Yezu ka kusukaka ko. Tufweti tatamana mu longoka misamu miamingi mimutariri, bifu biandi, mbanzulu zandi na mitieno miandi. Ni bu sa ti ntama peleko ka ntama ko tweka mu matieleka, tufweti tatamana mu ‘longoka mu zaba’ Yehova na Yezu.

11. Ntia misamu mie mu kati dia Evanzile za ziyà?

¹¹ Mu tu bakisa mu zaba Mwana’andi, Yehova watsonekesa Evanzile ziyà (4) mu Zu diandi na luzolo lwalwansoni. Mu Evanzile zo mwe na tinsamu tia luzingu lwa Yezu mpe na tisalu tiandi  tia samuna. Evanzile zo mbo zitutêlaka misamu mia tâ Yezu, misamu mi kayirika na mbanzulu zandi. Mabuku mo ma 4 mbo matubakisaka mu landa tifwani tia Yezu buna bufwanakane. (Ebr. 12:3) Diangana, ntambi za sisa Yezu ze mu kati. Buna, bu tukwe taluzuri Evanzile, tulendi tomo longoka mu zaba Yezu. Ha manima mbo tubâ na lenda dia landa ntambi zandi buna bufwanakane.

12. Bwe tulendi tomo bakila ndandu bu tulongokaka Evanzile?

¹² Mu tomo baka ndandu za Evanzile zo, ka tufweti’â tasukisinaka kwa mu tanga zo ko. Tufweti bongaka ntangu ya tomo za longokaka na ya tomo za dimbitilaka. (Fwanakasa na Yoswa 1:8, note.) Tazonzeleno misamu miole milendi tu bakisa mu dimbitila mu Evanzile na mu sarila misamu mi tutangaka mu kati.

13. Bwe lendi kotela mu kati dia binsamu bia Evanzile?

¹³ Musamu wa ntete, kota mu kati dia binsamu bia Evanzile. Sarila mabanza maku mu mona mu meso, mu wâ na mu mona misamu mieri yôkaka ku mutima’aku. Mu ku bakisa mu sila bo, dinga mu bisalulu bia ndongokolo bi tuhanaka organizasio ya Yehova. Taluzula misamu miamiansoni​—mie ku mbatukulu na mie ku nsuka ya misamu mi ta tanga. Dinga nsangu zita bangula mpila yeri mbuka, na mpila yeri misamu mu ntangu yîna. Fwanakasa tinsamu ti ta longoka na mpila yi batêla tio mu Evanzile zakaka. Misamu miakaka mi batsoneka mu Evanzile yimosi, batomo mia bangula mu Evanzile yakaka.

14-15. Bwe muntu wulendi lendela mu sarila binsamu bia Evanzile mu luzingu lwandi?

¹⁴ Musamu wa nzole, sarila binsamu bie mu Evanzile mu luzingu lwaku. Wuzololo tâ ti, mu luzingu lwaku fweti sarila misamu mi longokaka mitariri Yezu. (Za 13:17) Buna, bu mana tomo longoka tinsamu tie mu Evanzile, tiyula: ‘Ngano malongi me kô ndendi sarila mu luzingu lwani? Bwe ndendi sarila tinsamu ti mu bakisa bantu bakaka?’ Yêla mu banza muntu wu zebi, mpe mu ntangu yifwanakane, na luzolo mpe na buzitu, zonzela malongi ma longokele.

 ¹⁵ Tazonzeleno tifwani titubakisa mu sarila misamu mia miole mi tuzonzele. Mbo tuzonzela tinsamu tia mufwiri mosi wa mputu, Yezu wu kamona ku Tempelo.

16. Zonzela tinsamu tie mu Marke 12:41.

¹⁶ Kota mu tinsamu. (Tanga Marke 12:41.) Banza tinsamu. Mu tilumbu tia 11 Niza tia 33 mu M.B. twena​—bilumbu fioti kwa bisiri ntete Yezu kafwa. Wayizi yôkesa bilumbu biabingi mu longesa ku Tempelo. Kâ mfumu za mabundu zamutelamana. Bakaka mbo beri mu yulaka ka nani wamutuma mu sala tisalu tio. Bakaka mpe bayêla mu mu tambakasa mu biyuvu bi beri mu yulaka. (Mak. 11:27-33; 12:13-34) Ha manima, Yezu wayenda ha tibuka tiakaka tia Tempelo. Ha tibuka tio​—kampe ti batâka nkumbu tibuka tia bakento (Cour des femmes)—​lenda dieri nandi dia mona kese (caisse) za makabu. Wazakala, mpe wabatika mu tala bantu beri tûlaka mbongo mu kati dia kese. Wamona mvwama zazingi zeri tûlaka mbongo zazingi. Kampe penepene keri mu wâ lwaza lwa mipata mi beri tûlaka mu kati dia kese.

17. Zonzela mufwiri wa mukento weri mputu wubazonzelaka mu Marke 12:42?

¹⁷ Tanga Marke 12:42. Ha manima ma mwa ntangu, Yezu watûla meso mandi kwe mukento wumosi weri mufwiri mpe weri mputu. (Like 21:2) Luzingu lwa mpasi lweri nandi; kampe keri’â na mbongo zazingi ko mu sumba bima bia nguri bia luzingu. Kâ, wayenda mu mansweki mu kwe tûla mipata miole mu kati dia kese. Mipata miango ka miatomo’â sa lwaza ko bu miabwa mu kati dia kese ya makabu. Yezu wazaba ka nti katûla mu kese yo. Watûla mipata miole mia lepta, mieri mipata mia nguria mia fioti muna ntangu yîna. Mipata mio, ka mieri’â lungaka ko mu sumba tindia-makonko (moineau) timosi, yeri nuni yalembo bâ ntalu mu nuni zazansoni zi beri diaka.

18. Tintwari na Marke 12:43, 44, Yezu bwe katâ mu bungu dia kabu diahana mufwiri wa mukento?

¹⁸ Tanga Marke 12:43, 44. Yezu watomo yituku mu bungu dia mufwiri wo. Watâ milongoki miandi mbila, mpe wabatêla: ‘Kabu dia mufwiri wo wa mputu, diyôkele makabu mo makaka mamansoni.’Mpe wavutu ba bangurila ti: ‘Babansoni bakaka [bamvwama], ntenso kwa baheni. Yandi konga, mu bumputu bwandi, heni biabiakulu bie nandi mu luzingu lwandi.’Mufwiri wo wa kwikama bu kahana mbongo zeri nandi mu tilumbu tio, wasongela ti Yehova keri sikirilaka mu mu kipa.​—Mik. 26:3.

19. Ntia musamu wa mfunu tulendi longoka mu misamu mia tâ Yezu mu bungu dia mufwiri wa mukento?

¹⁹ Sarila tinsamu tio mu luzingu lwaku. Tiyula: ‘Ntia malongi ndendi baka mu misamu mia tâ Yezu mu bungu dia musamu wo?’ Dimbitila mu mufwiri wo. Ntembe kâni wazolo mu hana kabu dia dinene kwe Yehova. Kâ, wasa miamiansoni mi kalenda; tima tieri ntalu kwe yandi, wahana tio kwe Yehova. Mpe Yezu watâ ti kabu diandi ntalu dieri ha meso ma Tata’andi. Malongi ma ntalu ma tuta baka mu musamu wo ni ema: Yehova nsayi yibâka nandi bu tumuhanaka bima bieto bia ntalu​—bu tumusarilaka mu mutima’eto wawansoni na mu tilundi tieto tiatiansoni. (Mat. 22:37; Kol. 3:23) Bu tusaka miamiansoni mi tulenda, mpe bu katumonaka, Yehova nsayi yibâka nandi! Musamu wo mpe wutariri ngolo zi tusarilaka na ntangu yi tuyôkesaka mu sa nsambululu, ntiana tisalu tia samuna na tifu tia kwendaka ku tukutakanu.

20. Bwe lendi sarila malongi me mu tinsamu tia mufwiri wa mukento? Hana tifwani.

²⁰ Bwe lendi sarila malongi me mu tinsamu tia mufwiri wo? Yêla mu dimbitila mu bantu bê  na nsatu lutindusu mu bungu dia ngolo zi basarilaka mu tâ Yehova nsayi. Mu tifwani, ngano mpangi ya nuna ya yikento zebi, yimonaka ti kena salu ko, mu bungu ti timbevo tie nandi peloko ka sâla na ngolo ko mu sala tisalu tia samuna ntiana bu keri tia sarilaka mu ntama? Peleko, lendi dimbitila mu mpangi ya yibakala ye na timbevo timumwisaka mpasi mpe tilembo wasaka, timunôkesaka, mu bungu ti ka lendi’â kavutu bâka ku Nzo ya Nsambululu ko mu bungu dia tukutakanu twatwansoni? Bakisa bantu bo bu ba têla “misamu mia mbote [mu ba tunga].” (Efz. 4:29, NWT) Kabana nawu malongi ma tubakiri mu tinsamu tia mufwiri wo weri mputu. Misamu mitindisaka mi tâ milendi ba hana lukwikulu ti Yehova nsayi kamonaka mu bawu bu bamuhanaka bima biawu bia ntalu. (Bin. 15:23; 1 Tes. 5:11) Bu sîkaka bantu bakaka mu bungu ti bima biawu bia ntalu bahanaka kwe Yehova​—ni bu sa ti bia fioti kwa bimonekaka—​ntambi za Yezu landaka buna bufwanakane.

21. Ntia nzengolo bongele?

²¹ Diangana mbo tutondaka mu bungu dia Evanzile zituhanaka nsangu zazingi zitariri luzingu lwa Yezu na zitubakisaka mu landa ntambi zandi buna bufwanakane! Ngano lendi kubika programe ya ndongokolo ya nge beni peleko ya nsambululu ya kanda mu longoka Evanzile zo? Tabambukeno ti mu tomo baka ndandu mu ndongokolo yo, tufweti kota mu binsamu, mpe tufweti bia sarila mu luzingu lweto. Tufweti landa misamu mia yirika Yezu, kâ mpe tufweti wâ mio mi katâ. Mu timoko tita landa, mbo tutaluzula misamu mi tulendi longoka mu misamu mia mansukina mia tâ Yezu ntete kafwa.