1. Bu zebi matieleka mamingi me mu Bibila, ngano ntia tiyuvu lendi tiyula?

BU TAKWE longoke buku di, matieleka ma Bibila mamingi wayizi longoka. Mu tifwani, wizi zaba matieleka matariri bantu ba fwa, vuvu tia mvumbukulu ya ba fwa na kani dia luzingu lwa mankululu. (Ekleziaste 9:5; Like 23:43; Za 5:28, 29; Nzabukusu 21:3, 4) Kampe ku tukutakanu twa Mbangi za Yehova kwendaka, mpe lukwikulu lwe naku ti mu mpila ya mbote basambilaka Nzambi. (Za 13:35) Tindiku tiaku na Yehova tiabatikiri  mu kula mpe zololo wamusarila. Kâ, kampe mbo tiyulaka: “Ngano nti mfweti sa mu sarila Nzambi?”

2. Mu bungu dia nti Musi-Etiopi mosi wayizi dinga mu batusu?

² Musi-Etiopi mosi wa mu mbandu ya Yezu watiyula nti kafweti sa mu sarila Nzambi. Ntangu fioti ha manima ma mvumbukulu ya Yezu kwe ba fwa, Filipe, mosi wa milongoki mia Yezu, wayizi samuna kwe Musi-Etiopi wo. Filipe wamusongela ti Yezu ni Masiya. Misamu mia longesa Filipe miasimba mutima wa Musi-Etiopi, ntiangu kayizi kulu tâ ti: “Tala! Banda die ho; nti bita kunkabakasa mu batusu?”​—Bisalu 8:26-36.

3. (a) Ngano Yezu nti katuma kwe milongoki miandi? (b) Ngano ntia mpila tufweti batusuku?

³ Bibila ditomono songela ti: tala ti zololo wasarila Yehova, fweti batusu. Yezu watuma milongoki miandi: ‘Yendeno mu mutoto wa mukaka, kubikeno milongoki, babatiseno.’ (Matie 28:19) Yezu wasongela tifwani mu bungu ti yandi beni wabatusu. Ka bayizi â mu tsamuna mamba ma mpamba ko ha zulu mutu: Mu mamba bamuvwika yandi wansoni. (Matie 3:16) Mukristo bu wubatusuku, bafweti mu vwika yandi wansoni mu mamba.

4. Bu tubatusuku, ngano nti tusongelaka kwe bantu bakaka?

⁴ Bu tubatusuku, kwe bantu bakaka tusongelaka ti tuzololo tabâ ndiku ya Nzambi mpe tamusarila. (Mikunga 40:7, 8) Bwawu bu, mbo tatiyula kampe: “Ngano nti mfweti sa mu batusu?”

5. (a) Ntete wabatusu, ngano nti fweti sa? (b) Mu bungu dia nti tukutakanu twa Bakristo twe mfunu?

⁵ Ntete wabatusu, fweti longoka mu zaba Yehova  na Yezu. Wa watibatikiri mu yirika bu takwe longoke Bibila. (Tanga Za 17:3.) Kâ, ka wufweni â ko. Bibila ditele ti, fweti bâ ‘wa fuluka mu nguria luzabu’ lwa luzolo lwa Yehova. (Bisi-Kolose 1:9) Tukutakanu twa Mbangi za Yehova mbo tukubakisa mu ba na tindiku tia ngolo na Yehova. Ntiangu we mfunu mu kwama kwendaka ku tukutakanu tô.​—Bahebre 10:24, 25.

6. Ntete wabatusu, ngano ntia ndongosolo za Bibila fweti zaba?

⁶ Yehova ka tulombaka ko tazaba Bibila diadiansoni ntete tabatusu. Yehova ka yizi â lomba kwe Musi-Etiopi ko kazaba misamu miamiansoni ntete kabatusu. (Bisalu 8:30, 31) Bu tomo tala, longoka mu zaba Nzambi ka kwena na nsuka ko. (Ekleziaste 3:11) Kâ, ntete wabatusu, fweti zaba, mpe fweti tambula ndongosolo za nguri za Bibila.​—Bahebre 5:12.

7. Ngano bwe ndongokolo’aku ya Bibila yayizi ku bakisila?

⁷ Bibila ditele ti, tala ti timinu kâni, ka tulendi â tatâ Nzambi nsayi ko. (Bahebre 11:6) Fweti ba na timinu mu Nzambi ntete wabatusu. Bisi-Korente bakaka, bu bayizi wâ ndongosolo ya milongoki mia Yezu, ha manina ‘bayizi kwikila mu Nzambi; ni babatusu.’ (Bisalu 18:8) Ndongokolo’aku ya Bibila ni bo mpe yayizi ku bakisila mu ba na timinu mu makani ma Nzambi. Ndongokolo’aku yayizi ku bakisa mpe mu ba na timinu mu mukayulu wa Yezu wulendi tu kûla mu masumu na mu lufwa.​—Yoswa 23:14; Bisalu 4:12; 2 Timote 3:16, 17.

8. Ngano nti bikuhana nsatu ya zonzela kwe bantu bakaka misamu mi longokaka?

⁸ Bu tomo longoka misamu mia Bibila, mbo tomo  zaba ti Bibila salu diena, timinu tiaku mpe mbo titomo kula. Mbo kwizi ba na nsatu ya zonzela kwe bantu bakaka misamu mi longokaka.​—Yeremi 20:9; 2 Bisi-Korente 4:13.

9, 10. (a) Ngano kwe nani lendi toko zonzela misamu mi longokaka? (b) Tala ti zololo wasamuna tintwari na timvuka, ngano nti fweti sa?

⁹ Kampe mbo kwizi ba na nsatu ya zonzela misamu mi longokaka kwe bantu ba kanda diaku, kwe bangwala, kwe ndiku zaku na kwe bantu basalaka na bo. Bubote bwena mu sarila bo, kâ, fweti bwa sa na nsayi mpe na bulembami ntangu zazansoni. Ha manima, mbo kwizi dinga wasamuna tintwari na timvuka. Bu kwizi mona ti tomono kubama, zonzela wo kwe Mbangi yikulongesaka Bibila. Tala ti, kata banza ti nge wa kubama wena, mpe mitieno mia Bibila mia zitisaka, mbo lukutakana na nkuluntu zole za timvuka.

¹⁰ Ngano nsasa ya lukutakanu lo ni ye? Bankuluntu mbo bazonza na beno mu zaba tala ti ndongosolo za nguri za Bibila za sarilaka, mpe za kwikilaka. Bankuluntu mbo badinga mu zaba tala ti misamu mi tâka Bibila mia sarilaka bilumbu biabiansoni mpe tala ti tomono zolo wabâ Mbangi ya Yehova. Kubândi na bunkuta mu zonza na bankuluntu. Bambukaka ti: bankuluntu mpangi zazansoni za timvuka bakipaka, na nge mpe. (Bisalu 20:28; 1 Piere 5:2, 3) Ha manima ma lukutakanu lweno, bankuluntu mbo bakutêla tala ti lendi samuna tintwari na timvuka.

11. Tala ti bankuluntu bakutelele ti fweti sa nsobolo zakaka, mu bungu dia nti fweti za sa?

¹¹ Bankuluntu balendi ku têla ti, fweti toko sa nsobolo zakaka ntete wasamuna na timvuka. Mu bungu  dia nti fweti sa nsobolo? Mu bungu ti, bu tuzonzelaka Yehova kwe bantu bakaka, Yehova tumonekesaka. Tufweti ba na mbelo yikembelaka Yehova.​—1 Bisi-Korente 6:9, 10; Bisi-Ngalate 5:19-21.

12. Mu bungu dia nti beto bansoni twe na nsatu ya soba mabanza?

¹² Ntete wabatusu, fweti sa tima tiakaka. Ntumwa Piere watâ ti: ‘Sobeno mabanza mpe vutukeno, ngatu masumu meno makusunu.’ (Bisalu 3:19) Ngano “soba mabanza” ni nti? Wuzololo tâ ti tufweti nionga mu bungu dia misamu mia mbi mi tayirika. Mu tifwani, tala ti bunsuza weri sarilaka, fweti soba mabanza. Ni bu sa ti mbote kwe yeleke mu sarila ntangu zazansoni, fweti soba mabanza. Diangana, beto bansoni bankwa masumu twena. Buna, nsatu ya lombaka mulemvo kwe Nzambi ye neto beto bansoni.​—Bisi-Rome 3:23; 5:12.

13. Ngano “vutuka” ni nti?

¹³ Ka wufweni â ko mu nionga mu bungu dia misamu mia mbi mi wayirika. Ntumwa Piere watâ mpe, tufweti “vutuka.” Wuzololo tâ ti tufweti soba ndiatulu mpe tufweti tatamana mu sarila mbote. Tabongeno tifwani: Zololo wenda ku mbuka yilembolo zaba. Ngano nti lendi sa tala ti mweni ti zimbakane nzila? Mbo kangama, mbo “vutuka” peleko mbo kala ha mahambu, mpe mbo dinga nzila ya mbote. Bu kwe longoke Bibila mpe, mbo kwizi bakula ti fweti sa nsobolo mu luzingu lwaku peleko fweti losa bifu bia mbi. Kubama mu “vutuka” peleko sa nsobolo zifwanakane, mpe sarilaka mbote.

14. Ngano “tihana kwe Yehova” ni nti?

¹⁴ Ntete wabatusu, fweti sa tima tiakaka tia mfunu: tihana kwe Yehova. Tihana kwe Yehova ni mu mu kanisina mu lusambulu ti ni Yandi kwa sambila mpe luzolo lwandi luyôkele mfunu mu luzingu lwaku.—Lubambu 6:15.

15, 16. Nti bitumaka muntu mu tihana kwe Yehova?

¹⁵ Kani dia sarila kwa Yehova die ntiana kani dia yôkesa luzingu lweto na muntu wu tuzololo. Tabonga tifwani: Mukento na bakala bazolosono. Bakala dio bu kadinga mu tomo zaba mukento wo, mbo katomo mu zolo; mpe mbo kadinga mu mu kwela. Nzengolo ya mfunu yena; kâ mu bungu ti yandi kazololo, mbo kakubama mu nata dema dia makwela.

¹⁶ Bu tomo zaba Yehova, mbo tomo mu zolo mpe mbo ba na nsatu yayingi ya mu sarila. Ha manima, luzolo lwaku mbo lukutuma mu sila Yehova kani dia mu sarila; mu lusambulu. Bibila ditele ti, wô zololo kabâ mulongoki wa Yezu fweti “tikala.” (Marke 8:34) Wuzololo tâ ti, tumama kwe Yehova wufweti ba musamu wa mfunu kwe nge. Mpe, misamu mi zololo Yehova mfunu miena, yôka nsatu na makani maku.​—Tanga 1 Piere 4:2.

17. Mu bungu dia nti bantu bakaka balembo tihanaka kwe Yehova?

¹⁷ Bantu bakaka ka batihanaka kwe Yehova ko mu bungu ti bunkuta bwe nawu bwa lembo lungisa kani diawu dia sarila Yehova. Ka bazololo â ko baniongesa Yehova. Kampe mbo babanzaka ti, tala ti ka batiheni â  kwe Yehova ko, Yehova ka ba landa mambu ko mu misamu mia mbi mi bayirikaka.

18. Ngano nti bilendi kubakisa mu nunga bunkuta bwa niongesa Yehova?

¹⁸ Luzolo lwaku mu Yehova mbo lukubakisa mu nunga bunkuta bwa mu niongesa. Mu bungu ti Yandi tomono zolo, mbo sarila ngolo mu lungisa kani diaku. (Ekleziaste 5:4; Bisi-Kolose 1:10) Kufweti â watâ ko ti, luzolo lwa Yehova mpasi zingi lwena mu sarila. Ntumwa Za watsoneka ti: ‘Luzolo lwa Nzambi luzololo tâ ti: tatumama mu ntumunu zandi; ntumunu zandi ka zena dema ko.’​—1 Za 5:3.

19. Mu bungu dia nti fweti lembo ba na bunkuta bwa tihana kwe Yehova?

¹⁹ Ka wena na nsatu ko wabâ muntu wa lunga mu tihana kwe Yehova. Kani kabwe, Yehova ka tu lombaka ko tayirika musamu wu tulembo lenda. (Mikunga 103:14) Yehova mbo kakubakisa mu sarila mbote. (Izaya 41:10) Tala ti mu siriri vuvu tiaku tiatiansoni, “mbo kasungika nzila zaku.”​—Bingana 3:5, 6.

20. Bu mana tihana kwe Yehova, ngano nti fweti sa?

²⁰ Ngano wakubamane mu tihana kwe Yehova? Bu mana tihana kwe Yehova, fweti batusu: tio ni titini tita landa.

21, 22. Bwe lendi zabikisila timinu tiaku ha meso ma bantu?

²¹ Tâ kwe ntwarisi ya timvuka tia bankuluntu ya timvuka tiaku ti, watiheni kwe Yehova mpe zololo wabatusu. Mbo kalomba kwe bankuluntu bataluzula naku ndongosolo za nguri za Bibila. Tala ti bankuluntu babakuri ti nge wa kubama wena, mbo bakutela ti  lendi batusu ku lukutakanu lwa lunene lwa Mbangi za Yehova, lukwiza. Ku lukutakanu lo, mbo ku ba tinzonzi tibangula nsasa ya bateme. Nzonzi mbo kayula biyuvu biole kwe bô babatusu. Bu hanina biyuvu bio mvutu, mbo zabikisa ha meso ma bantu ti nge, timinu tie naku.​—Bisi-Rome 10:10.

 ²² Ha manima, mbo batusu. Mbo bakuvwika mu mamba nge wansoni. Bateme’aku mbo yisongela kwe bantu ti nge watiheni kwe Yehova, mpe bwawu bu weka Mbangi ya Yehova.

23. Ngano batusu “mu nkumbu ya Tata na ya Mwana na ya mpeve santu” bwe kuta zolo tâ?

²³ Yezu watâ kwe milongoki miandi ti, mbo baketi batusu “mu nkumbu ya Tata na ya Mwana na ya mpeve santu.” (Tanga Matie 28:19.) Wuzololo tâ ti, tufweti tambula lutumu lwa Nzambi. Fweti tambula mpe salu tia hana Yehova kwe Yezu mu bungu dia makani mandi. Fweti vutu tambula mpe mpila yi sarilaka Nzambi mpeve santu’andi mu lungisa luzolo lwandi.​—Mikunga 83:18; Matie 28:18; Bisi-Ngalate 5:22, 23; 2 Piere 1:21.

24, 25. (a) Ngano bateme nti yisongelaka? (b) Ngano ntia tiyuvu tuhanina mvutu mu timoko tia mansukina?

²⁴ Bateme musamu wa nguria wa mfunu yizabikisaka. Bu bakuvwika mu mamba, mbo wubâ ntiana fwiri mu mbelo’aku ya ntama. Mbo wusongela ti losele mbelo’aku ya ntama. Mpe bu duka mu mamba, wuzololo tâ ti, batikiri luzingu lwa môna ngatu wasarila Nzambi. Wusongele ti, tuka ntangu yo mbo sarila Yehova. Bambukaka ti: ka wayizi â tihana kwe muntu ko, mu organizasio ko, mu salu ko, kâ kwe Yehova wayizi tihana!

²⁵ Kani di wasa kwe Yehova mbo dikubakisa mu kurisa tindiku tiaku tia toma na Yandi. (Mikunga 25:14) Ka wuzololo â tâ ko ti, mu bungu dia bateme’eto tuvukila. Ntumwa Paulo watsoneka ti: “Sarileno mvukulu’eno, mu bunkuta na mu buzitu.” (Bisi-Filipe 2:12, NWT) Bateme mbatukulu kwa yena. Kâ, ngano nti lendi sa mu bâ ndiku ya Nzambi ntangu zazansoni? Timoko tia mansukina mbo tihanina tiyuvu tio mvutu.