TIMOKO 10
Bwe tukutakanu twa Mbangi za Yehova tulendi ku bakisila?
Ngano nge beka tikisa ku lukutakanu lwa Mbangi za Yehova? Lendi kwizi mona bunkuta mu kwenda ku lukutakanu tala ti ka weka’eti kwa kwenda ko. Lendi tiyula: ‘Nti biyôkaka ku tukutakanu to? Mu bungu dia nti twe mfunu? Mu bungu dia nti mfweti kwa kwenda?’ Mu timoko ti, mbo kwizi longoka bwe kutakana na bantu bakaka kulendi ku bakisila mu pusana kwe Nzambi, mpe bwe kulendi ku bakisila nge beni.
1. Mu bungu dia nti Mbangi za Yehova zikutakanaka?
Tala bwe titsoniki timosi tia Bibila tiasongela mfunu ya kutakanka na bantu bakaka: “Mbo nikembela Yehova mu timvuka tia tinene.” (Mikunga 26:12) Mpila mosi mpe, Mbangi za Yehova bu zikutakanaka, nsayi yayingi yibâka nawu. Mu nza yayansoni, tumingu twatwansoni bakutakanaka mu kunda Nzambi, mu tanga mikunga na mu sambila. Ntangu zakaka mu muvu, tukutakanu twa tunene mpe basaka mu bungu dia nsambululu’awu.
2. Nti longoka ku tukutakanu to?
Ku tukutakanu, Zu dia Nzambi tusarilaka mu longesa, ‘[mbo] batomo dia bangulaka, mpe mbo bahaninaka dio nsasa.’ (Tanga Nehemi 8:8.) Ku tukutakanu, mbo longoka misamu mitariri Yehova na bifu biandi bia mbote. Bu tomo kwe zabi luzolo lu katusongelaka, mbo tomo kwizi bâ penepene na Yandi. Mbo longoka mpe bwe lendi bêla na luzingu lwa nsayi.—Izaya 48:17, 18.
3. Bwe lendi bakila ndandu bu vukanaka na bantu bakaka ku tukutakanu?
Yehova tu lombele ti “takipasanakeno beto na beto ngatu tasarila luzolo na nsalulu za mbote; ka tuyambirikandi tukutakanu tweto.” (Bahebre 10:24, 25, NWT) Ku tukutakanu tweto, mbo bwabana na bantu batomo zolosonoko bawu na bawu, mpe badingaka mu tomo zaba Nzambi ntiana kwa nge. Mbo wâ mvutu zitindisaka zitûkaka mu Bibila. (Tanga Bisi-Rome 1:11, 12.) Bweso mpe bubâ naku bwa zonza na bantu bayizi nunga misamu mia mpasi mi bwabanaka na bampumpa, na bantu ba kwelana. Mio ni misamu mita sa ti Yehova katutuma mu kwendaka ku tukutakanu!
YIKA NDILU
Zaba bwe tukutakanu twa Mbangi za Yehova tuyôkelaka mpe mu bungu dia nti fweti sarila ngolo mu kwendaka ku tukutakanu twango.
4. Tukutakanu twa Mbangi za Yehova
Mu mbandu ya ntete, Bakristo kutakana beri vulu kutakanaka mu kunda Yehova. (Bisi-Rome 16:3-5) Tangeno Bisi-Kolose 3:16, mpe zonzeleno tiyuvu eti:
-
Bwe Bakristo bantete beri sambirilaka Yehova?
Bwawu bu mpe, Mbangi za Yehova mu mbuka za nsambululu zivulu kutakanaka. Mu zaba bwe tukutakanu tawu tuyôkelaka, taleno VIDEO. Ha manima, taleno tifwani tia lukutakanu lwa timvuka mpe zonzeleno biyuvu bita landa.
-
Ntia tintwari tie ha kati dia misamu miyôkaka ku Nzo ya Nsambululu na misamu mi tengi mu Bisi-Kolose 3:16?
-
Mu video peleko mu tifwani, nti mweni bitariri lukutakanu wizi zolo?
Tangeno 2 Bisi-Korente 9:7, mpe zonzeleno tiyuvu eti:
-
Mu bungu dia nti ku lukutakanu lwa Mbangi za Yehova kulembo bâka nsinsani?
Tintwari na mulongi’aku, taluzuleno misamu mi bazonzela ku lukutakanu lumosi lwa lumingu lu.
-
Ntia lweka lwa lukutakanu lwe salu, mpe lwe lwa mbote kwe nge?
Ngano wa wazaba?
Mu jw.org, lendi zaba ntia kûma na ntia ntangu tukutakanu tubâka mu nza yayansoni.
-
Ku tukutakanu tweto binzonzi bibâka kô, bimoko, na video. Ku mbatukulu na ku nsuka, mukunga tutangaka mpe lusambulu tusaka
-
Mu ntangu ya bitini biakaka bia programe, bantu balendi hana mvutu
-
Muntu ni muntu lendi kwiza—makanda, bampumpa, bibunda, na bala
-
Tukutakanu tweto ofele twena. Mbangi za Yehova ka zisaka nsinsani ya mbongo ko
5. Fweti sarilaka ngolo mu kwendaka ku tukutakanu
Tabongeno tifwani tia kanda dia Yezu. Mu kwenda ku lukutakanu lwa muvu, nsatu ya bâ nawu ya diata kilometre 100 mu nzila za miongo tûka Nazarete tii ku Yerusaleme. Tangeno Like 2:39-42, mpe zonzeleno biyuvu ebi:
-
Ngano ngolo zadingana mu sa nzietolo yo ku Yerusaleme?
-
Mu bungu dia nti fweti sarila ngolo mu kwendaka ku tukutakanu?
-
Ngano tufweti bwa sa? Mu bungu dia nti?
Bibila ditâka ti kutakanaka mu kunda Yehova nguria mfunu kwena. Tangeno Bahebre 10:24, 25, mpe zonzeleno tiyuvu eti:
-
Mu bungu dia nti tufweti kwendaka ku lukutakanu ntangu zazansoni?
TALA TI BAKUTÊLELE: “Ka wena na nsatu ko ya kutakanaka na bantu bakaka. Mpasi wa longokaka Bibila ku nzo.”
-
Ntia verse peleko ntia tifwani tia Bibila tisongelaka ti Yehova zololo takutakanaka?
MU BUKUFI
Bu kwendaka ku tukutakanu mbo longokaka mu tomo zaba Yehova, mbo kurisa tindiku tiaku na Yandi, mpe mbo mu kundaka na bantu bakaka.
Biyuvu bia Mbambukulu
-
Mu bungu dia nti Yehova katulomba takutakanaka?
-
Nti kwizi longoka ku tukutakanu twa Mbangi za Yehova?
-
Ngano ntia ndandu lendi baka bu kwenda ku tukutakanu?
ZABA BIAKAKA
Mbo tala ti bunkuta bwe naku bwa kwenda ku lukutakanu? Tala bwe bakala dimosi dieri na bunkuta diayizi zolo lukutakanu.
Tala nti biatuma mwana bakala wumosi mu zolo tukutakanu mpe nti kasa mu tatamana mu kwendaka ku tukutakanu.
Zaba mabanza ma bantu bakaka mu bungu dia tukutakanu.
“Mu bungu dia nti tufweti kwendaka ku tukutakanu ku Nzo ya Nsambululu?” (Mutu-diambu wa mu Internet)
Dzukula bwe luzingu lwa muntu wumosi wa mukangu wa miangu lwayizi sobela, bu kayenda ku lukutakanu lwa Mbangi za Yehova.
“Kani kabwe, kandieri’â sisaka buta bwani ko” (Nzo ya Zangama ya Munkengi, 1er juillet 2014)
Dzukula mpe...
BIYUVU BI VULU YULAKA BANTU
Ngano ndongokolo ya Bibila yi saka Mbangi za Yehova bwe yiyôkelaka?
Mu ndongokolo ya Bibila yi saka Mbangi za Yehova, lendi sarila mbangululu ni mbangululu ya Bibila. Kutinandi mu tikisa bantu ba kanda diaku peleko ndiku zaku ku ndongokolo’aku.
