Tala ti Bibila longokaka na Mbangi ya Yehova moshi, buna mbo talaka tsimoko tsia lulongoka tekela lwalongoka. Ngati lukutakanu lwa tsimvuka lwakusarisa, bubote wakubamaka tekela wenda. Mbo buba bwabubote wasa bo ntangu zazansoni.

Sola ntangu na huma halongokela. Ntsia ntangu tamona lenda longoka bubote? Ngâna mu pari na pari tekele wabatsika salu peleko nkokela botsi bala batsisekele? Ni kuba ti kulendâ walongoka ntangu yayila ko, sola ntangu kakwa lenda longoka mpe kubikilandi tsima kani tsimoshi nzila mu kukabakasa mu longoka. Dinga huma ha dzuna, mpe katula tsima ni tsima tsio tsilenda kusa vwandi; wonda radio, televizio, mpe telefone. Mu sambila tekela walongoka mbo tsikusarisa mu katula mabanza mu mfietokoso za lumbu tsio ngati watsihana kwa mu longoka Zu dia Nzàmbi.​—Bisi-Filipe 4:6, 7.

Sa bidimbu mu tsimoko tsia lulongoka, mpe kubama mu hana mvutu. Tokodinga mu bakula ka ntsia m’samu tsimoko tsiango tsitazonzela. Tokobanza mutu wa tsimoko peleko wa tsikapu, mpe tala kabwe konso mutu wafieti wa tsimoko wuta wisana na diambu dia nguri, mpe taluzula bintsintsia na biuvu bia mvutukila bitadukisa misamu mia nguri mia tsimoko tsiango. Mboko, tsitanga konso paragrafe, mpe tanga mvutu ya biuvu bitsonamane. Tanga verse zozi balombolo tontomona, mpe banza kabwe ziwisane na tsimoko. (Bisalu 17:11) Mbomona mvutu, sa tsidimbu ha diambu peleko ha mambu ma mfunu mu paragrafe; mbo tsikusarisa mu bambukila mvutu. Mpe, ku lukutakanu, lenda nanguna koko, tala ti zololo, mpe lenda hana mvutu yankufi mu nzonza ya ngebeni.

Wamana kubikaka bimoko biabiansoni bialusaka ku tukutakanu twa kontso lumingu, mbo kwizi yika m’samu miamona mu “tsilundulu” tsiaku tsia nzayulu ya Bibila.​—Matie 13:51, 52.

• Ntsia tsifu tsiambote fweni sarila mu tomokubama mu bungu dia tukutakanu e?

• Bwe lenda kubamana mu hana mvutu ku lukutakanu e?